20/08/2026
U mbajt eventi i lansimit të raportit “Gratë në Media dhe Dezinformimi me Bazë Gjinore në Kosovë”
U mbajt ngjarja “Nga analiza në veprim: Forcimi i lidershipit të grave dhe luftimi i dezinformimit gjinor në Kosovë”, në kuadër të së cilës u lansua raporti “Gratë në Media dhe Dezinformimi me Bazë Gjinore në Kosovë”, i përgatitur nga Asociacioni i Gazetarëve të Kosovës (AGK), në bashkëpunim me Rrjetin e Grave Gazetare të Kosovës, me mbështetjen e Misionit të OSBE-së në Kosovë dhe financim nga Mbretëria e Norvegjisë.
Ngjarja mblodhi përfaqësues të institucioneve, organizatave ndërkombëtare, shoqërisë civile, mediave, gazetare dhe profesionistë të fushës, për të diskutuar gjetjet e raportit, sfidat me të cilat përballen gratë në media dhe mënyrat për të forcuar mbrojtjen, sigurinë dhe pjesëmarrjen e tyre në gazetari.
Në fjalën e tij hyrëse, Xhemajl Rexha, Kryetar i AGK-së, theksoi rëndësinë e adresimit të dezinformimit me bazë gjinore dhe ndikimin që ai ka jo vetëm te gratë gazetare, por edhe te pluralizmi mediatik dhe demokracia.
“Jemi shumë të lumtur që bashkë me OSBE-në e kemi mundësinë të publikojmë sot raportin që identifikon targetimin e vazhdueshëm të grave gazetare për shkak të punës së tyre, por edhe jep rekomandime për luftën e përbashkët të të gjithëve për t’u siguruar që gratë janë në gjendje të bëjnë punën e tyre të rëndësishme në interes të publikut, pa u ngacmuar e sulmuar për shkak të gjinisë”, tha Rexha.
Në hapje foli edhe Pascale Roussy, Drejtoreshë e Departamentit për Demokratizim në Misionin e OSBE-së në Kosovë, e cila theksoi se raporti synon të shërbejë jo vetëm si dokumentim i problemit, por edhe si bazë për veprim konkret.
“Le të bëhet ky raport më shumë se një publikim. Le të shërbejë si katalizator për veprim”, tha Roussy.
Ajo nënvizoi se dezinformimi me bazë gjinore nuk dëmton vetëm gratë gazetare që janë drejtpërdrejt të shënjestruara, por edhe cilësinë e debatit publik, pluralizmin mediatik dhe pjesëmarrjen demokratike, duke theksuar nevojën për parandalim, mbrojtje dhe reagim më të fuqishëm.
Ndërsa, Amanda Fisher, Zëvendësudhëheqëse e Zyrës për Komunikim Strategjik dhe Çështje Publike në UNMIK, foli për sfidat me të cilat përballen gratë në gazetari dhe rëndësinë e krijimit të hapësirave mbështetëse për gazetaret e reja.
“Mentorimi nuk është vetëm një mundësi për zhvillim në karrierë – ai është një korrigjim strukturor”, tha Fisher.
Ajo theksoi se mentorimi, rrjetëzimi dhe mbështetja profesionale janë thelbësore për fuqizimin e grave në media dhe për krijimin e një sektori mediatik më gjithëpërfshirës, përfaqësues dhe më të fortë.
Paneli i parë, “Dezinformimi gjinor në Kosovë – Gjetjet, trendet dhe rekomandimet”, i moderuar nga Xhemajl Rexha, solli diskutim të drejtpërdrejtë mbi gjetjet kryesore të raportit, format dhe tendencat e dezinformimit me bazë gjinore, ndikimin e tij te gratë gazetare, si dhe nevojën për mekanizma më të fuqishëm parandalues dhe mbrojtës.
Në panel morën pjesë Getoarbë Mulliqi, Drejtore Ekzekutive dhe Hulumtuese në AGK; Aleksandra Jovanović, Drejtore e RTK2; Leonida Molliqaj, nga QIKA dhe kontribuuese në raport; Ardiana Thaqi Mehmeti, gazetare; dhe Gynesh Veshall, aktiviste rome.
Diskutimi theksoi se dezinformimi me bazë gjinore shpesh synon të dëmtojë kredibilitetin profesional të grave gazetare, duke u fokusuar në pamjen e tyre, jetën private, familjen dhe stereotipet gjinore. U theksua gjithashtu nevoja për përgjigje më të koordinuara nga institucionet, mediat dhe organizatat e shoqërisë civile, si dhe për politika më të fuqishme të sigurisë dhe mbështetjes për gazetaret.
Ngjarja shërbeu si një hap i rëndësishëm për të kaluar nga analiza në veprim, duke e vendosur raportin dhe rekomandimet e tij në qendër të diskutimit për krijimin e një mjedisi mediatik më të sigurt, gjithëpërfshirës dhe të barabartë për gratë gazetare në Kosovë.
Raportin në tri gjuhët mund ta gjeni në këtë vegëz: https://agk-ks.org/publikime/raporti-grate-ne-media-dhe-dezinformimi-me-baze-gjinore-ne-kosove/
