30/05/2026
VAPIK pranohet anëtare e SCAPR
Në Asamblenë e Përgjithshme të SCAPR (Societies’ Council for the Collective Management of Performers’ Rights), të mbajtur në Krakov të Polonisë, nga data 26 deri më 29 maj 2026, morën pjesë organizata të menaxhimit kolektiv të të drejtave të performuesve nga e gjithë bota.
Më 27 maj 2026, kërkesa e VAPIK u paraqit zyrtarisht para anëtarëve të SCAPR nga Lirak Çelaj, Drejtor Operacional i VAPIK. Prezantimi përshkroi zhvillimin institucional të VAPIK, aktivitetet në mbrojtjen e të drejtave të performuesve dhe përkushtimin për përmbushjen e standardeve ndërkombëtare.
Anëtarët e SCAPR votuan me shumicë votash për pranimin e VAPIK si anëtare të kësaj organizate prestigjioze.
Ky anëtarësim në SCAPR, e cila konsiderohet organizata ombrellë më e rëndësishme në nivel global për organizatat e menaxhimit kolektiv të të drejtave të performuesve, përbën një moment të rëndësishëm për VAPIK dhe një hap të madh përpara në fuqizimin e përfaqësimit ndërkombëtar të performuesve që ajo përfaqëson.
Ky zhvillim pritet të hapë mundësi të reja për bashkëpunim ndërkombëtar, shkëmbim përvojash dhe përmirësim të mëtejshëm të mbrojtjes së të drejtave të performuesve në Kosovë dhe më gjerë.
VAPIK tashmë është anëtare edhe në organizata të tjera të rëndësishme ndërkombëtare si CISAC, SAA dhe GAVA, duke dëshmuar angazhimin e vazhdueshëm për integrim dhe përfaqësim dinjitoz në nivel global.
