Komiteti Lokal për Siguri Publike - Vushtrri

10/03/2026

Sot, KLSP “Qendra” në Vushtrri pranoi një pompë për fikjen e zjarrit donacion nga OSCE.

Kryesuesi Blerim Ibrahimi dhe Bajrush Kosumi mirëpritën përfaqësuesit e OSCE-së, Rrahim Berisha dhe Migjen Abrashi, duke i falënderuar për mbështetjen e vazhdueshme. Ky donacion vjen menjëherë pas trajnimit të suksesshëm të dy vullnetarëve tanë, të cilët tashmë janë gati për të ndërhyrë në raste emergjente.

Vazhdojmë me përkushtim për rritjen e sigurisë dhe mirëqenies në lagjen tonë!

25/02/2026

Në takimin e rregullt të Komitetit Lokal për Siguri Publike “Qendra” në Vushtrri, të mbajtur në bashkëpunim me përfaqësuesit e Stacionit Policor, u vlerësua lart angazhimi i përbashkët gjatë vitit që lamë pas. Me këtë rast, kryesuesi i komitetit, Blerim Ibrahimi, ndau mirënjohje për zyrtarët që u dalluan për përkushtimin dhe bashkëpunimin e tyre gjatë vitit 2025.

Mirënjohjet iu ndanë zyrtarëve policorë, togeres Lavdije Fejzullahu dhe rreshterit Naim Begu, si shenjë vlerësimi për kontributin e tyre të jashtëzakonshëm në mbështetje të aktiviteteve të KLSP-së dhe për forcimin e vazhdueshëm të bashkëpunimit institucional. Në mungesë të rreshterit Begu, mirënjohjen në emër të tij e pranoi koordinatori i njësive, rreshteri Lutfi Melenica.

Gjatë takimit u ritheksua se partneriteti mes komunitetit dhe forcave të rendit është shtylla kryesore për një mjedis të sigurt. Komiteti Lokal për Siguri Publike “Qendra” shpreh falënderimin e tij të sinqertë për profesionalizmin e treguar nga Policia e Kosovës, e cila mbetet gjithmonë në shërbim të sigurisë dhe mirëqenies së të gjithë qytetarëve të Vushtrrisë.

12/02/2026

Kryesuesi Blerim Ibrahimi zhvilloi takim pune me Rreshter Lutfi Melenica, koordinator i sektorëve dhe komuniteteve në Stacionin Policor në Vushtrri.

Gjatë takimit biseduam për çështje që lidhen me sigurinë publike, shqetësimet e qytetarëve dhe nevojën për bashkëpunim të vazhdueshëm mes policisë dhe komunitetit. Diskutuam edhe për hapat konkretë që mund të ndërmerren për të rritur ndjenjën e sigurisë në qytet.

Takimi u vlerësua i dobishëm dhe në funksion të rritjes së sigurisë për të gjithë qytetarët e Vushtrrisë.

04/02/2026

Telegram Ngushëllimi

E nderuara familje Gërguri,

Me pikëllim të thellë morëm lajmin për ndarjen nga jeta më të dashurit tuaj, ish-zyrtarit policor, Bahri Gërguri.

Në emër të Komitetit Lokal për Siguri Publike “Qendra” – Vushtrri, ju shprehim ngushëllimet tona më të thella. Bahriu ishte shembull i përkushtimit dhe i shërbimit ndaj qytetarëve, duke lënë pas vetes një trashëgimi respekti e integriteti në radhët e Policisë së Kosovës dhe në komunitetin tonë.

Në këto momente të vështira, ne bashkëndiejmë dhimbjen me ju dhe lutemi të gjeni forcën për të përballuar këtë dhimbje të madhe. Kujtimi për të do të mbetet gjithmonë i gjallë mes nesh.

I qoftë i lehtë dheu i Kosovës!

Blerim Ibrahimi
Kryesues i KLSP “Qendra”, Vushtrri

30/01/2026

Sot, nën kryesimin e kryesuesit Blerim Ibrahimi, Këshilli Lokal për Siguri Publike “Qendra” në Vushtrri mbajti mbledhjen e radhës, ku u diskutuan çështje me rëndësi jetike për sigurinë e qytetarëve tanë.

Pikat kryesore të mbledhjes:
• Rishikimi i Raportit të Punës: Anëtarët miratuan raportin e punës për periudhën Janar – Dhjetor 2025, duke vlerësuar angazhimin dhe rezultatet e arritura gjatë vitit që lamë pas.
• Plani i Punës për vitin 2026: Pas diskutimeve, u rishikua dhe u aprovua plani i punës për vitin 2026, i cili synon rritjen e sigurisë dhe bashkëpunimin e ngushtë me komunitetin.
• Siguria Publike: U analizua gjendja aktuale e sigurisë në zonën e qendrës, duke u zotuar për hapa konkretë në parandalimin e dukurive negative.

KLSP "Qendra" mbetet e përkushtuar në përmbushjen e të gjitha obligimeve të saj, duke shërbyer si urë lidhëse mes qytetarëve dhe institucioneve të sigurisë.

27/11/2025

Kryesuesi i Komitetit Lokal për Siguri Publike “Qendra” në Vushtrri, z. Blerim Ibrahimi, mori pjesë në takimin e zhvilluar në Stacionin e Policisë në Vushtrri me komandantin z. Reshat Kovaçi dhe stafin e tij. Në takim ishin të pranishëm edhe kryesuesit e dy Komiteteve të tjera, Habib Mustafa dhe Drita Dibrani.

Gjatë takimit, z. Ibrahimi prezantoi raportin e punës së KLSP “Qendra”. Ai informoi se gjatë kësaj periudhe janë mbajtur gjashtë takime dhe rreth tetëdhjetë për qind e planit vjetor është realizuar. Ai theksoi se vendosja e kamerave inteligjente në hapësirat publike do të përforconte sigurinë dhe do ta lehtësonte identifikimin e rasteve të rrezikut.

Ai vlerësoi punën e sektorit policor dhe theksoi gatishmërinë e tyre për bashkëpunim sa herë është kërkuar.

Takimi u mbyll me dakordim për vazhdimin e bashkëpunimit dhe koordinimit ndërmjet Komiteteve Lokale dhe Policisë, në shërbim të rritjes së sigurisë në komunitet.

19/11/2025

17/11/2025

Telegram ngushëllimi

Me dhimbje morëm lajmin për ndarjen nga jeta të Sami Gërgurit, asistent i komandantit të Stacionit Policor në Vushtrri. Në emrin tim dhe të Komitetit Lokal për Siguri Publike në Vushtrri, ju shprehim ngushëllimet më të thella.

Samiu do të mbahet mend për përkushtimin dhe profesionalizmin e tij, si dhe për kontributin e çmuar ndaj komunitetit dhe kolegëve. Kujtimi për të qoftë i paharrueshëm dhe i përjetshëm.

Me respekt dhe ngushëllime,
Blerim Ibrahimi
Kryesues i Komitetit Lokal për Siguri Publike Vushtrri

12/09/2025

Sot, Komiteti Lokal për Siguri Publike “Qendra” Vushtrri mbajti takimin e rregullt, ku u ndanë mirënjohje për kontributin e dhënë në fushën e sigurisë publike dhe angazhimit qytetar.

Mirënjohjet u ndanë nga Kryesuesi i KLSP-së, z. Blerim Ibrahimi, dhe Zëvendëskryesuesi, z. Arber Hoxha, për:
• Policin e Lartë, z. Alban Halili, për mbështetjen e vazhdueshme ndaj aktiviteteve të KLSP-së;
• Aktivistin e shoqërisë civile, z. Hamëz Makiqi, për angazhimin e tij në dobi të komunitetit.

Në takim mori pjesë edhe Rreshter Lutfi Melenica, Koordinator i Sektorëve dhe Komunitet, i cili me bashkëpunimin e tij të vazhdueshëm kontribuon fuqishëm në rritjen e sigurisë publike në qytetin tonë.

Komiteti Lokal për Siguri Publike falënderon të gjithë kontribuuesit për përkushtimin e tyre të çmuar në ndërtimin e një Vushtrrie më të sigurt dhe më të qetë për qytetarët tanë.