09/04/2026
PAHAYAG NG UP CINEMA UKOL SA PAGDIRIWANG NG ARAW NG KAGITINGAN
Ngayong araw, ipinagdiriwang natin ang Araw ng Kagitingan bilang paggunita sa pagbagsak ng Bataan noong 1942 at ang Martya ng Kamatayang kumitil sa mahigit 10,000 Pilipinong parte ng humigit-kumulang 76,000 na mga bihag-ng-digmang buong giting na pinagtanggol ang bayan sa mga mananakop. Ang araw na ito ay hindi basta pagsindi ng kandila sa mga namatay, kundi isang malagim na paalala sa’tin ng kasaysayan — sa kahalagahan ng giting sa harap ng lumalalang pangdaigdigang sitwasyon — na panghawakan ang kolektibong paglaban ng mamamayan laban sa mga nag-aastang diktador, sa atin mang sariling bakuran o sa malawak na entablado ng mundo.
Sa kasalukuyan, kinakaharap ng mamamayang Pilipino ang tumitinding sosyo-ekonomikong krisis: mataas na presyo ng langis dulot ng walang habas na gyerang agresyon ng Estados Unidos sa Iran, na agad na nagpasirit ng presyo ng mga bilihin, kawalan ng sapat na tugon mula sa pamahalaan, at ang patuloy at napakalaking tanong sa usapin ng ating pambansang soberanya.
Sa ganitong kalagayan, kailangang nating itanong: ano ang ibig sabihin ng kagitingan?
Sa matagal na panahon, pinagkaitan tayo ng isang pambansang kamalayan dulot ng monopolyadong pagkontrol ng dayuhan sa industriya ng pagpepelikula sa bansa. Nanindigan tayo, mapa-hanggang ngayon, matayo lang ang isang pambansang kamalayan na anti-kolonyal at alternatibo, nang maikuwento natin ang ating mga kuwento sa ating sariling pamamaraan.
Hangga’t wala tayong tunay na kalayaan, hangga’t sunud-sunuran tayo sa hampas ng dayuhan, hindi magkakaroon ng Pilipino at maka-Pilipinong mga naratibo.
Bilang mga manggagawang pelikula at pangkultura, bilang mga iskolar ng bayan, hindi tayo hiwalay sa lumalalang krisis ng bansa.Buong giting na magpatuloy na magkwento, maglantad, at tumindig laban sa lahat ng uri ng pang-aapi — dayuhan man o tuta ng dayuhan.
STOP THE US WAR MACHINE! CONDEMN THE US MILITARY EXPANSION IN THE PHILIPPINES!
