22/08/2026
Амьтанд яаж хандаж байгаагаар нь тэр хүнийг тодорхойлох боломжтой гэдэг.
Яг энэ зурган дээрх өтөндөө бариулж, ус хоолгүй уяулж, тураалдаа орсон нохойг асран хамгаалагчаас нь (хүмүүсийн нэрлэдгээр эзнээс нь) хулгайлж, өөр нэг нохойтой хамт халуун наранд уяж орхиод тамласан айлын хөршүүд нь тэсэлгүй тусламж дуудсанаар хэсэг сайхан сэтгэлтэй хүмүүс олж очоод тусалсан байна лээ.
Гэхдээ энэ нь зөвхөн тусламж дуудсан ганцхан тохиолдол. Монгол орны өнцөг булан бүрд гэрийн тэжээвэр амьтдыг хамгийн харгис аргаар тамлаж, хүчирхийлдэг хүн нэртэй муухай, жинхэнэ араатнууд маш олон байгаа. Гэтэл энэ бол зүгээр нэг “амьтандаа яаж хандах нь эзний асуудал” биш. Хуулиар хориглосон хүчирхийлэл.
Монгол Улсын Гэрийн тэжээвэр амьтны тухай хуулийн 36 дугаар зүйлд гэрийн тэжээвэр амьтны эсрэг хүчирхийлэл үйлдэхийг хориглосон бөгөөд зодох, тамлах, хараа хяналтгүй орхих, өлсгөх, харангадуулах, нохой муурыг байнга уях, хөдөлгөөн хязгаарласан орчинд хорих зэрэг үйлдлийг амьтны эсрэг хүчирхийлэл гэж тодорхой заасан байдаг.
Мөн асран хамгаалагч нь амьтнаа хоол хүнсээр хангах, цэвэр аюулгүй, улирлын онцлогт тохирсон орчин нөхцөлөөр хангах, өвдөж бэртсэн тохиолдолд мал эмнэлгийн тусламж авах үүрэгтэй.
Тиймээс ийм асуудлын хажуугаар та бүхэн дуугүй битгий өнгөрөөрэй. Хуулиар ч иргэн гэрийн тэжээвэр амьтны эсрэг хүчирхийллийн талаар эрх бүхий байгууллагад гомдол, мэдээлэл гаргах үүрэгтэй. Амьтдад тусалдаг, үгээ хэлдэг, бурууд буруу байгаарай.
Нөгөө талаас, Монголчууд минь хүнлэг байгаач! Бид техник технологи, хиймэл оюун ухаан өндөр хөгжсөн эрин зуунд амьдарч байна. Нохойг зөвхөн хашаа мануулах хэрэгсэл, эд зүйл мэт үздэг үзэл тэртээ ард хоцорч байна.
Амьтдыг +40 градусын халуунд, -40 градусын хүйтэнд хоолгүй, усгүй уяж тамлахаа одоо больцгооё!
Тэжээж, хайрлаж чадахгүй бол анхнаас нь амьтан битгий ав. Гаргаад явуул!
Энэ 2 амьтанд тусалсан, бас одоо ч сэтгэл зовниж, араас нь санаа тавьж байгаа олон сайхан сэтгэлтэй, амьтанд хайртай хүмүүст талархъя. ❤️
