26/10/2026
📢 НОВИОТ КОЛЕКТИВЕН ДОГОВОР ЗА ПОЛИЦИЈАТА МОРА ДА ГИ ОДРАЗУВА ИНТЕРЕСИТЕ НА РАБОТНИЦИТЕ!
Денеска во Скопје се одржа најавената тркалезна маса посветена на предлозите, идеите и размислувањата за новиот Колективен договор во Министерството за внатрешни работи.
На средбата беа поканети сите нерепрезентативни синдикати, со цел секој да добие можност да ги изнесе своите ставови и да придонесе кон создавање поквалитетен Колективен договор, кој ќе ги унапреди работничките права и условите за работа на полициските службеници.
Покрај Македонскиот полициски синдикат (МПС) и Независниот синдикат на полицијата (НСП), средбата единствено присуствуваше и Синдикатот на македонската полиција (СМП) предводен од претседателот Дејан Саздов, кој достави конкретни, образложени предлози во писмена форма и кои Одборот ќе ги достави до работната група во нивната оригинална форма, со цел истите да бидат разгледани во понатамошниот процес на подготовка на новиот Колективен договор.
За жал, останатите два синдикати: Синдикатот на полиција во Македонија (СПМ) и Самостојниот синдикат на полицијата (ССП) воопшто не одговорија на поканата и не се појавија на средбата.
❓ Дали немаат идеи предлози за подобрување на Колективниот договор или сметаат дека постојните услови и права се прашања на кои веројатно ќе треба да одговорат на своите членови.
📌 Новиот Колективен договор не е формалност, ниту тема за молчење. Тој е можност да се отворат суштинските прашања за платите, додатоците, работното време, одморите, безбедноста при работа и сите други права што директно влијаат врз професионалниот и личниот живот на полициските службеници.
Одборот за преговори ќе продолжи активно да учествува во процесот, да предлага конкретни решенија и да се залага за Колективен договор што ќе донесе реални придобивки за вработените во МВР.
Затоа што правата не се добиваат со молчење, туку со аргументи, предлози и доследна борба за интересите на работниците! 💪