25/09/2026
#ОТВОРЕНО #ПИСМО за изразување на поддршка на вработените во Основен суд Куманово поради психолошки притисок и недостиг на кадар
Почитувани колеги и пријатели,
Со ова писмо сакаме да ја изразиме нашата целосна поддршка за вработените во Основен суд Куманово, кои во изминатиот период се соочуваат со сериозен психолошки притисок и оптовареност во работењето.Покрај системските проблеми со недостиг на кадар, вработените укажуваат дека се изложени и на психолошки притисок од страна на претседателот на судот, што дополнително ја влошува атмосферата и условите за работа.
Една од главните причини за ваквата состојба е недостигот на помошен технички персонал, судска администрација, судии и стручни соработници, што значително го отежнува нормалното функционирање на судот.Според систематизацијата и одлуката на Судскиот совет, Кумановскиот суд треба да има 35 судии, но во моментот работи само со 21 судија. Судот е со проширена надлежност и постапува по предмети во граѓанска и кривична постапка, што дополнително ја зголемува оптовареноста.
За жал, бројот на вработени во судската администрација и помошниот технички персонал е значително намален, а бројот на стручната судска служба е недоволен за да обезбеди поефикасно работење. Оптималната бројка за непречена работа е најмалку 25 судии, што покажува дека моменталната состојба е под секое прифатливо ниво.Во вакви услови, вработените се принудени да извршуваат повеќе работни позиции истовремено, со цел да се обезбеди непречено функционирање на институцијата.
Ова создава дополнителен притисок и ризик за квалитетот на судските постапки, а психолошкиот притисок од страна на претседателот на судот ја засилува несигурноста и стресот кај вработените.
Со ова писмо ја изразуваме нашата солидарност и поддршка за сите вработени во Основен суд Куманово. Сметаме дека е неопходно итно да се преземат мерки за зголемување на бројот на судии, судска администрација и технички персонал, како и да се обезбеди здрава работна атмосфера без психолошки притисок, со цел да се гарантира нормално и ефикасно функционирање на судот.
Со почит,
Независен Синдикат на Судска Администрација на Македонија
#Независен #Синдикат