Zomi Innkuan Adelaide

16/10/2026

Zomi innkuan Adelaile khuado tangko na

Ihngak lahlah le ihki zaksak sa om bang in ihngeina neih khuado zingciang hong tung ding hi ta a hih man in Adelaide khuapi aa om Zomi khempeuh ihvek in paikim ding in kithei sak phapha hang.

Pasian in mihing aa hong piansak minam le ngeina ihneih te aituam lak aa nang na kihel loh phamawh a hih na thu Pasian deih itna , dikna, kiniamkhiatna le mawhmaisakna mipihte itna mikhempeuh itna le na khempeuh thupi sim theihna lungtang tawh kihel minam ni te kihel tamtang sawm in.

Nulepa aa ding bek hi lo ihtate mit le lungtang ah ngeina pawi’ te a hilh le a tengsak ding ni khat ahih man in thupi sim tek ding kisam hi.

Hih hun sungah ngeina puan’ ihneihtuam te silh in innkuan aa kizem zilzel aa pai ding kizawn hang .

A mun ah nai 4:30 pm in mun kihong ta ding aa , shusi ( Umai Restaurent ) pan a lim mahmah le buhsih kan’ khauhsuai kan’ te le tui a vot cih te na om zihziah ding hi, man ol tak in $10 /20 tawh ihgil vah in nuamtak pawi sungah ihzaikhawm ding hi.

Hih a kizuak vante ihleisak na in mailam ah kipawlna in phattuam pih ding a hih man in thupi’san ding kiphawk sak hang.

Daaklam, khangnote naupangte laam na le Zomus te makaihna tawh lasiamte hong khuang deldel ding uh hi.

Tutna awng dimdem ahih man in nang le kei ihpai ding bek hong ngak hi .

Ahun- 4:30- 9:00 Pm

Amun-Elizabeth Civic Centre, 10 Playford Blvd, Elizabeth SA 5112

Ani- 17/10/2026

ZOMI KHUADO ADELAIDE

13/10/2026

**Australia Gam Zomite Ading Thupi Thuzaksakna**

Australia gammi (citizenship) ngah nadingin ngetna lai i khiat ciang in, Department of Home Affairs pan police clearance (mawhna neih leh neihloh theihna lai) hong ngetna uh tawh kisai a kuamapeuh in i theih ding hoihsa ka hihmanin hiah kong hawmsawn hi.

I minam sungah Department of Home Affairs pan police clearance hong ngetna tuakkha khin mi pawlkhat om a, mailam ah zong tuabang ngetna a tuak ding om toto lai ding hi hang. Tua ahih manin, tuabang hong nget uh ciangin lungkhamloh ding cih i mipihte kiangah kong theisak nuam hi.

Tua ahih manin, Department of Home Affairs pan police clearance hong nget uh leh hih a nuai a thute phawk ding kisam hi:

Malaysia gam ah galtai (refugee) a om na hihna leh galtai hihna tawh kisai in Malaysia kumpi pan police clearance ngah theihlohna thu kician takin gen ding hong zasak uh hi.

**Police clearance hong ngetna uh dawnlo in om kei un.* Email pan Police clearance tawh kisai hong hopihna tungtawn in tuabang piaktheihlohna hang thu kician takin dawng kik un.

Police clearance piak theihlohna hang bek tawh Australia citizenship ngetna hong sanglo ding uh cihna hipahlo ahihman in lungkhamna ding omlo hi.

Hih vai a thei nailo innkuanpihte, i lawmte leh i mipihte tungah i hilhsawn ding leh hawmsawn ding hong ngen ing.

*Note: Hih thuzaksakna pen Department of Home Affairs pan official in dawnna tungtawn in a kizasak ihi hi. A zenzen in official hopihna lai a mu nuam i om leh hong zasak un, hong hawmsawn thei ding hi ing.*

✍️ Tg.Pauno ( Adelaide)
☎️0469 373 071

14/08/2026

Hello Adelaide ah om U leh Nau, Zolia, Zotaang te, hong tung ding Khuado pawi 2026 ah Zolia Zotaang kidemna om ding a hi man in, a dem nuam khempeuh te a ding min ki ap thei ta hi🙏🏻

゚

14/08/2026

Social Media Zatdan tawh kisai a theihuai Thukham section 474.17 of the Commonwealth Criminal Code Act 1995

Online tungpan khat-le-khat kipatauhsakna laikhak kikhak tawh kisai in, Australia gam sungah om gambeel mi khempeuh in theih dingin kilawm thu khat ahih leh, Australia gam thukhamte pen online leh offline a kibangin kizang hi cih kiphawk sak phapha hang.

Facebook, TikTok, Telegram leh social-media platform khatpeuh a zangte’n limtakin i zat ding kihanthawn hi hang. Politics (Nainganzi) leh mimal vai ah thusandan kibatlohna leh ngaihdan kibatlohna pen suakta takin mi khempeuh in amau ngaihdan leh muhna te pulak theihna thuneihna nei uh hi.

Ahihhang, mi patausakna, thah ding a vauna, simmawhna leh lungmansakna tawh nawngkaisakna cihte pen thukham palsatna in kiciamteh ahih manin, thukham tawh kituak in dantatna hong kipia ding hi.

Online tungpan thu khatpeuh na khahkhiat ma in, hih anuai a thute phawk in:

Post, comment, ahihkeileh share khatpeuh na bawl ma in hoihtak in ngaihsun masa in.

Nang ngaihsutna tawh kituaklo ahih leh zong, thu kigelh khat manlo nasak leh a thu manlo nasakna gen inla, a mimal totna in zang kei in.

Mikhat peuh leh amau innkuan tungah patauhsakna, thah ding a vauna, simmawhna leh lungmansakna zang kei in.

Mi khat peuh i mimal vai online pan ahihkeileh offline pan in ngimna hoihlo tawh kamguh pauna zang in lausak kha kei in.

Online tungpan simmawhna leh ahoihlo kampau hong kizatkhum leh, vauna leh patauhsakna kampau tawh thuk kei in.

Thah ding ciangdong a hong vau khatpeuh a om leh, manlang takin thuneite kiangah puak pah in.

Mikhat peuh patauhsakna, thah ding a vauna, simmawhna leh lungmansakna laikhak khak khin napi in na phiatkik hang in, a thukham tawh kituak in na tuah ding thupen kiphiat kiklo hi cih phawk in.

I minam in gal, launa leh kikhenna tampi thuak khin hi hang. Tua ahih manin, Australia gam thukham tawh kituak in mikhat-le-khat kitelsiamna leh kizahtakna tawh ngaihdan kibanglo leh muhzia kibanglote kamdam takin kihona tawh vensak ding kisin ding cih kideihsak hi hang.

Ngaihdan tuamtuam pulak theihna phalna om mah hi. Ahizong in khat-le-khat kipatauhsakna leh vauna pen kikoih khonglo hi.

Social media pen i minam kikhenna, kipatauhsakna, ahihkeileh khat-le-khat kilauhsakna dingin i zang lo in, khat-le-khat kituahna leh kalsuankhopna dingin i zang zaw ni.

✍️ Tg.Pau no

12/08/2026

Khuado Pawi Tangko Na 2026!

31/07/2026

Australia Gambup Milip Simna/ Mi omzah simna:2026

Australia gamsung ah K*m 5 halin Mi omzah / Milip pahzah leh Kua Minam hi a, Kua sisan , Bang Ngeina nei, Bang Pau zang a , Bang Biakna a hi uhhiam ci te kancian na leh phuahphana kinei to zelzel in tukum inzong hong om kik ahihi..

Innkim ah Lai hong tung ding ah tuatawh inn huangsung a om khempeuh in pello census piak ding ahihi.

: ATHUPI MAHMAH AH:

"Zomi" ci-in gelh hamtang ni!

📝 Lai leh pau: Zomi
📝 Khanggui/minamhihna: Zomi

Australia a-om Zomi a kici khempeuh in "Zomi" ci-in gelh hamtangni, cih a kizawn hi hang.

i minam| i lai| i pau| i aw| i mailam|

Note: Adelaide Khuapi sung a om UleNau NulePa te in a zenzen Form fillup dan ding haksatna i nei zenzen a leh Zomi Innkaun EC te hong zasak un huhthei bangbangin hong ki huh dinghi.

01/07/2026

16/03/2026

Australia gam-a om Zomi mipi khempeuh tungah theihsakna – Census 2026!

Australia gam sungah a om Zomi khempeuh in, a hong tung ding Census (Milip Kisimna) 2026 ah angtang takin “Zomi” ci-in i gelh nadingin i kizawn hi.

Tua bangin “Zomi” ci-a na gelhna uh in, Zomite miphazah kician leh kicing i neihna ding ahi hi. Tua in i mailam kalsuan nadingah a nuai-a bangin phattuamna lianpi hong pia ding hi:

• K*mpi leh thukhente’ tungah i huzap a khauhsem nading: I minam phazah kician i lahkhiatna tungtawnin, i minam tawh kisai thukhun bawlna, nasepna leh panpihna tuamtuamte ah Zomi mipite in thusun theihna lianpi i nei ding hi.

• Nasep, panpihna leh hamphatna hoihzawte ngah nading: Census miphazah kician i neihna in kumpi leh mipi kipawlnate’ tungah i kisapnate hong theihpih ding uh a, Australia gam-a om Zomite’ adingin cidamna, pilna sinna, ngeina nasepna leh mipi huhna tuamtuamte lamsangah i kisapna tawh kituakin noptuamna lianpi hong pia ding hi.

• Australia gam sung buppi-ah Zomite’ phazah leh i omna thupitna laktel nading: Minam kician i hihna in mailam ah Australia kumpite’ tungpan ngahtheih ding huhnate a neng a tawngin i ngah theih nading kongpi i honna a suak ahi hi. Australia gam sunga i innteekpan nading leh innteekte’ hamphatna ding omte zong i hamphatpih nadingin i kizawn phapha hi.

“Zomi” ci-a na gelhna uh tungtawnin i ngeina, i pau leh i minam khantoh nading na panpihna uh ahi hi. Na innkuanpite leh na lawmte zong hih bang mahin gelh dingin hanthawn in!

Hihbang i kalsuankhopna in i mailam hun ding, i tu i tate’ mailam adingin hamphatna lampi a sial kholkhol na hihlam mangngilh kei in ci in hilaimun pan in hong zawn phapha ung.

13/03/2026

78’ cinna minam pawi

13/03/2026

78’ Cinna Minam Pawi