08/10/2026
🌿💧 Coidando o río Vea, coidamos o noso territorio
O pasado domingo participamos na Limpeza Simultánea de Ríos, organizada por ADEGA a través do Proxecto Ríos. Na contorna do río Vea conseguimos retirar cerca de 70 kg de lixo. Unha xornada de traballo colectivo que continuou cun xantar comunitario e, pola tarde, coa análise do estado do río. 🧤🗑️🌱
E que atopamos?
🔹 O estado xeral do treito analizado é bo.
🔹 A calidade hidromorfolóxica permite soportar unha boa comunidade de macroinvertebrados, aínda que algúns elementos do hábitat non están ben representados, por causas naturais ou antrópicas.
🔹 A calidade do bosque de ribeira é, en xeral, boa, pero en varios puntos foi totalmente arrasado polas obras de construción da autoestrada.
🔹 A calidade fisicoquímica da auga sitúase dentro de valores normais.
🔹 A calidade biolóxica é moi boa: atopamos unha importante variedade de macroinvertebrados, incluíndo especies que só poden vivir en augas con estas características. 🦋🪲💦
🔹 En canto á biodiversidade, están presentes moitas das especies propias destes hábitats.
Pero non todo son boas noticias. ⚠️
Detectamos tamén a proliferación de varias especies exóticas invasoras, como a tradescantia, o eucalipto, a falsa acacia e a herba tintureira. A presenza destas especies, xunto co forte impacto das obras da autoestrada sobre o bosque de ribeira, resulta especialmente preocupante e ameaza a conservación do hábitat que constitúe o río Vea.
🌱 O río Vea aínda conserva un bo estado, pero cómpre coidalo e protexelo. A limpeza, a observación e o coñecemento do río son tamén ferramentas para defendelo.
Grazas a todas as persoas que participastes nesta xornada e que facedes posible que sigamos coidando dos nosos ríos. 💚
