16/04/2026
Día Mundial do Emprendemento
Aspais Galicia, Asociación de centros especiais de emprego de Galicia, estivo presente no evento ao formar parte do Mapa de Emprendemento de Galicia e da recentemente creada Rede galega do ecosistema de emprendemento, Ultreia Galicia.
O conselleiro de Emprego, Comercio e Emigración, José González, participou hoxe en Lalín no acto institucional co gallo do Día Mundial do Emprendemento, onde celebrou que a Rede de colaboración público-privada impulsada no I Congreso Ultreia Galicia para compartir recursos, xerar sinerxías e evitar duplicidades na atención ao emprendemento teña superado xa o cento de adhesións co gallo de brindar recursos e programas adaptados ás iniciativas e contornas concretas. Unha Rede galega do ecosistema de emprendemento que pode seguir sumando inscricións na web www.ultreiagalicia.com.
No acto no que tamén participaron o secretario xeral de Emprego e Relacións Laborais, Pablo Fernández, e a directora xeral de Traballo Autónomo e Economía Social, Marta Mariño, o conselleiro deu protagonismo ás mulleres e homes que foron valentes para pasar das palabras aos feitos, facendo realidade os seus soños converténdoos en negocios.
Entre eles, proxectos como os presentados no acto de hoxe (Trasdeza Natur, de Silleda; Chorima Cosmetics, da Estrada; e Qïchen Biocociña de Lalín) que, segundo dixo, representan á perfección a simbiose entre tradición e innovación.
Colaboración institucional
Para seguir apoiando e impulsando iniciativas coma estas, José González puxo como exemplo a colaboración coa Deputación de Pontevedra, coa que se reforzará e potenciará a atención e asesoramento ao emprendemento, a través da Rede de polos autonómica, co obxectivo de ampliar e consolidar os recursos a prol do traballo por conta propia na provincia. Tamén se referiu á cooperación a nivel local, con concellos como o de Lalín no que se celebrou o acto de hoxe, neste caso dando un pulo decidido ao comercio de proximidade.
Nese senso, o conselleiro agradeceu a implicación tanto do presidente da Deputación pontevedresa, Luis López, como do alcalde lalinense, José Crespo, ambos alí presentes,comprometéndose a seguir indo da man para sacar adiante proxectos que redunden no beneficio común.
Estratexia de emprendemento ligada ao territorio
O titular de Emprego aproveitou o acto para destacar que a Xunta avanza na futura Estratexia de emprendemento ligado ao territorio de Galicia xunto con todo o ecosistema. Unha Estratexia que contempla potenciar a Rede de polos de emprendemento e apoio ao emprego, que ten atendido máis de 6.100 proxectos e promovido a creación de arredor de 600 empresas en toda Galicia.
Precisamente, segundo recordou o representantes autonómico, a semana pasada mantivo un encontro co consello asesor de Ultreia Galicia para avaliar e seguir afondando nas liñas de traballo da Estratexia. A maiores, apóstase por aproveitar o talento na Comunidade e o das persoas retornadas ou por garantir a remuda xeracional, preservar o comercio e os servizos de proximidade. Tamén por mellorar a coordinación do ecosistema emprendedor galego, por garantir financiamento adaptado e por impulsar a cultura emprendedora da sociedade galega coa sostibilidade, igualdade e innovación como eixes transversais.
