KKF-NC

10/16/2026

📖 ព្រឹត្តិបត្រ #កម្ពុជាក្រោម វិលត្រឡប់មកជួបអ្នកអានវិញហើយ!
នេះជា ព្រឹត្តិបត្រ «កម្ពុជាក្រោម» ឆ្នាំទី ២២ លេខ ៩៥ ខែកញ្ញា ឆ្នាំ ២០២៦ ចេញផ្សាយដោយ សហព័ន្ធខ្មែរកម្ពុជាក្រោម នាំមកជូនខ្លឹមសារចម្រុះក្នុងកម្រាស់ ៦០ ទំព័រ ។

សូមចុច (Link) នៅលើប្រអប់មតិ (Comment) ខាងក្រោម 👇 ដើម្បីអានព្រឹត្តិបត្រ កម្ពុជាក្រោម៖

10/12/2026

សហព័ន្ធខ្មែរកម្ពុជាក្រោម នឹងរៀបចំ សន្និបាតដំណាច់ឆ្នាំ ២០២៦ នៅរដ្ឋធានីវ៉ាស៊ីនតោន ពីថ្ងៃទី ១១ ដល់ ១៣ ខែធ្នូ
------------------------
ដោយ #ថាច់ប្រីជាគឿន l Preicheakoeun Thach
------------------------
សហព័ន្ធខ្មែរកម្ពុជាក្រោម (KKF) នឹងរៀបចំ សន្និបាតដំណាច់ឆ្នាំ ២០២៦ រយៈពេលបីថ្ងៃ ចាប់ពីថ្ងៃទី ១១ ដល់ថ្ងៃទី ១៣ ខែធ្នូ ឆ្នាំ ២០២៦ នៅរដ្ឋធានីវ៉ាស៊ីនតោន ឌីស៊ី សហរដ្ឋអាមេរិក ដើម្បីបូកសរុបលទ្ធផលការងារប្រចាំឆ្នាំ កំណត់ទិសដៅ សកម្មភាពសម្រាប់ឆ្នាំ ២០២៧ និងពិភាក្សាអំពីការតស៊ូ មតិលើឆាកអន្តរជាតិ ដើម្បីលើកកម្ពស់សិទ្ធិជនជាតិដើមខ្មែរក្រោម ។

យោងតាមលិខិតនិមន្ត និងអញ្ជើញ លេខ ២០២៦-១០-០៦/៥៤ ចុះថ្ងៃទី ៦ ខែតុលា ឆ្នាំ ២០២៦ ចុះហត្ថលេខាដោយលោក សឺន ហួរ ជាអធិបតីនៃ សហព័ន្ធខ្មែរកម្ពុជាក្រោម សន្និបាតដំណាច់ឆ្នាំនេះ នឹងប្រព្រឹត្តទៅនៅ ទីស្នាក់ការរបស់សហព័ន្ធ ដែលមាន អាសយដ្ឋានលេខ 4953 E. Capitol Street SE, Washington, D.C. 20019 សហរដ្ឋអាមេរិក ។

សន្និបាតនេះ នឹងមានការនិមន្ត និងអញ្ជើញចូលរួមពីព្រះសង្ឃខ្មែរក្រោម គណៈកម្មការនាយក ថ្នាក់ដឹកនាំ សមាជិក សមាជិកា និងអ្នកឧបត្ថម្ភគាំទ្រ សហព័ន្ធខ្មែរកម្ពុជាក្រោម មកពីបណ្ដាប្រទេសនានាជុំវិញពិភពលោក ។

តាមរបៀបវារៈដែលបានគ្រោងទុក សន្និបាតនឹងផ្ដោតលើប្រធានបទសំខាន់ៗមួយចំនួន រួមមាន រាយការណ៍សកម្មភាព និងបូក សរុបសមិទ្ធផលរបស់សហព័ន្ធដែលបានធ្វើនៅក្នុងឆ្នាំ ២០២៦ រៀបចំសន្និសីទព្រះសង្ឃខ្មែរក្រោម ចេញផែនការ សម្រាប់អនុវត្តក្នុងឆ្នាំ ២០២៧ ពិភាក្សាអំពីទស្សនវិស័យនៃការតស៊ូមតិដើម្បី «សិទ្ធិសម្រេចវាសនាខ្លួនដោយខ្លួនឯង» របស់ជនជាតិដើមខ្មែរក្រោមតាមរយៈសកម្មភាពនៅលើឆាកអន្តរជាតិ ។

នៅក្នុងលិខិតអញ្ជើញនោះ លោក សឺន ហួរ បានបញ្ជាក់ថា ការរៀបចំសន្និបាតដំណាច់ឆ្នាំ ២០២៦ នៅរដ្ឋធានីវ៉ាស៊ីនតោន គឺ ជាការពង្រឹងនូវគោលជំហរតស៊ូមតិផ្នែកការទូតរបស់សហព័ន្ធ ដើម្បីលើកកម្ពស់សេចក្ដីថ្លៃថ្នូរ ការការពារអត្តសញ្ញាណជាតិ វប្បធម៌ និង «សិទ្ធិសម្រេចវាសនាខ្លួនដោយខ្លួនឯង» របស់ពលរដ្ឋខ្មែរក្រោម នៅដែនដីកម្ពុជាក្រោម នាពេលបច្ចប្បន្ន ។

សហព័ន្ធបានយោងទៅលើសេចក្ដីប្រកាសរបស់អង្គការសហប្រជាជាតិស្ដីពីសិទ្ធិជនជាតិដើម (UNDRIP) និងលិខិតុបករណ៍ ច្បាប់អន្តរជាតិនានា ជាមូលដ្ឋានសម្រាប់ការតស៊ូមតិដោយអហិង្សា និងសន្តិវិធី ។

លោក សឺន ហួរ ក៏បានសម្ដែងជំនឿថា សន្និបាតដ៏សំខាន់នេះ នឹងរួមចំណែកពង្រឹង សាមគ្គីភាព និងបង្កើនប្រសិទ្ធភាព នៃការតស៊ូមតិរបស់ សហព័ន្ធខ្មែរកម្ពុជាក្រោម ឱ្យកាន់តែមានឥទ្ធិពលនៅលើឆាកអន្តរជាតិ ។

ជាមួយគ្នានេះ លោកបានអារាធនានិមន្តព្រះសង្ឃ និងអញ្ជើញថ្នាក់ដឹកនាំ សមាជិក សមាជិកា ព្រមទាំងអ្នកគាំទ្រ សហព័ន្ធខ្មែរ កម្ពុជាក្រោម នៅជុំវិញពិភពលោក ឱ្យចូលរួមសន្និបាតនេះឱ្យបានច្រើនកុះករ ដើម្បីបង្ហាញពីសាមគ្គីភាព និងការគាំទ្រចំពោះ បេសកកម្មរបស់សហព័ន្ធ និងការអនុវត្តសិទ្ធិជាមូលដ្ឋានរបស់ព្រះសង្ឃ និងពលរដ្ឋខ្មែរក្រោមនៅដែនដីកម្ពុជាក្រោម ។

សូមបញ្ជាក់ថា សន្និបាតដំណាច់ឆ្នាំ ២០២៦ របស់សហព័ន្ធខ្មែរកម្ពុជាក្រោម នឹងប្រព្រឹត្តទៅនៅថ្ងៃទី ១១, ១២ និង ១៣ ខែធ្នូ ឆ្នាំ ២០២៦ នៅទីស្នាក់ការ សហព័ន្ធខ្មែរកម្ពុជាក្រោម ក្នុងរដ្ឋធានីវ៉ាស៊ីនតោន ឌីស៊ី សហរដ្ឋអាមេរិក ៕

10/10/2026

10/10/2026

👏 សារប្រសិទ្ធពរ និងឧទ្ទិសកុសលក្នុងឱកាសពិធីបុណ្យសែនដូនតា របស់ប្រធានគណៈកម្មការព័ត៌មាន នៃ #សហព័ន្ធខ្មែរកម្ពុជាក្រោម
---------------------
សូមក្រាបថ្វាយបង្គំព្រះថេរានុថេរៈគ្រប់ព្រះអង្គ ជាទីគោរពសក្ការៈដ៏ខ្ពង់ខ្ពស់ !
សូមគោរពចំពោះថ្នាក់ដឹកនាំ សមាជិក សមាជិកា និងអ្នកគាំទ្រសហព័ន្ធខ្មែរកម្ពុជាក្រោម ព្រមទាំងបងប្អូនជនរួមជាតិ ទាំងអស់នៅជុំវិញពិភពលោក ។ ជាពិសេស ប្រិយមិត្តជាទីស្រឡាញ់ទាំងអស់ ដែលតែងតែនិយមតាមដានព័ត៌មានស្ដីពីកម្ពុជាក្រោម ដែលចេញផ្សាយជាផ្លូវការ ដោយ សហព័ន្ធខ្មែរកម្ពុជាក្រោម ជាទីមេត្រី !

ក្នុងឱកាសដ៏មហានក្ខត្តឫក្សនៃពិធីបុណ្យកាន់បិណ្ឌ ភ្ជុំបិណ្ឌ និង បុណ្យសែនដូនតា ដែលជាប្រពៃណីដ៏ថ្លៃថ្លា និងមានអត្ថន័យជ្រាលជ្រៅសម្រាប់ពលរដ្ឋខ្មែរក្រោមនៅដែនដីកម្ពុជាក្រោម និងពលរដ្ឋខ្មែរនៅប្រទេសកម្ពុជា ដែលកំពុងតែប្រព្រឹត្ត ទៅនៅ ថ្ងៃ ១៤ និង ១៥ រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី ១០ និង ១១ ខែតុលា ឆ្នាំ ២០២៦ នេះ ក្នុងនាម ខ្ញុំព្រះករុណា ខ្ញុំបាទជាប្រធានគណៈកម្មការព័ត៌មាន នៃ សហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក ខ្ញុំសូមសម្ដែងនូវមនោសញ្ចេតនានឹករឭកគោរពស្រឡាញ់ និងសូមប្រសិទ្ធពរជ័យ សិរីសួស្ដី ជ័យមង្គល និងវិបុលសុខ ជូនចំពោះថ្នាក់ដឹកនាំ សមាជិក សមាជិកា អ្នកគាំទ្រ ប្រិយមិត្តអ្នកតាមដានព័ត៌មានទាំងអស់ និងបងប្អូនជនរួមជាតិខ្មែរទាំងអស់ ទាំងនៅក្នុងប្រទេស និងនៅជុំវិញពិភពលោក ។ ជាពិសេស ខ្ញុំបាទសូមផ្ញើក្ដីនឹករឭក និងសេចក្ដីស្រឡាញ់ដ៏ជ្រាលជ្រៅជូនចំពោះពលរដ្ឋខ្មែរក្រោមរាប់លាននាក់ ដែលកំពុងរស់នៅក្រោមនឹមអាណានិគមយួន នាពេលបច្ចុប្បន្ន ។

ពិធីបុណ្យសែនដូនតា គឺជាឱកាសដ៏សំខាន់សម្រាប់កូនចៅគ្រប់រូប សម្ដែងនូវកតញ្ញូកតវេទិតាធម៌ចំពោះមាតាបិតា ជីដូនជីតា និងបុព្វការីជនទាំងនៅរស់ (ធ្វើបុណ្យខែភ្លឺ) និងទាំងអ្នកដែលបានចែកឋានទៅ ។ ពិធីបុណ្យនេះក៏ជាពេលវេលា ដែលក្រុមគ្រួសារ និងពលរដ្ឋគ្រប់រូបបានជួបជុំគ្នា ធ្វើបុណ្យទាន ឧទ្ទិសកុសល និងរំឭកដល់គុណូបការៈរបស់ដូនតា ដែល បានខិតខំថែរក្សាជីវិតគ្រួសារ សង្គម និងមរតកជាតិ ទុកឲ្យកូនចៅជំនាន់ក្រោយ ។ តាមរយៈការប្រតិបត្តិប្រពៃណីនេះ យើង បានបន្តចំណងស្រឡាញ់រវាងមនុស្សគ្រប់ជំនាន់ និងរំឭកខ្លួនឯងឲ្យចេះគោរពគុណ ចេះរួមសុខរួមទុក្ខ និងចេះទទួលខុសត្រូវ ចំពោះអនាគតរបស់ជាតិ ។

ទោះបីជាកំពុងស្ថិតក្រោមការត្រួតត្រា និងការរឹតត្បិតពីរបបអាណានិគមយួនយ៉ាងណាក៏ដោយ ក៏កូនចៅខ្មែរក្រោម គ្រប់ជំនាន់នៅតែ ខិតខំថែរក្សាប្រពៃណី ទំនៀមទម្លាប់ ភាសា អក្សរសាស្ត្រជាតិ និងព្រះពុទ្ធសាសនាថេរវាទ ឲ្យបានគង់វង្ស ជានិច្ចនិរន្តរ៍ ។ ការបន្តប្រារព្ធពិធីបុណ្យសែនដូនតា ការជួបជុំគ្នានៅវត្តអារាម និងការបង្ហាត់បង្រៀនកូនចៅឲ្យស្គាល់ប្រពៃណី ដូនតា សុទ្ធតែបង្ហាញពីឆន្ទៈដ៏មុតមាំក្នុងការរក្សាអត្តសញ្ញាណជាតិរបស់ខ្លួន ។ វត្តអារាមនៅកម្ពុជាក្រោម គឺជាមជ្ឈមណ្ឌល ដ៏សំខាន់នៃជំនឿ ការអប់រំ និងការរក្សាវប្បធម៌ខ្មែរឲ្យបានគង់វង្ស ។ ស្មារតីសាមគ្គីភាពរបស់ព្រះសង្ឃ និងពុទ្ធបរិស័ទ ដែលរួមគ្នាថែរក្សាវត្តអារាម និងប្រពៃណីជាតិ គឺជាមូលដ្ឋានដ៏រឹងមាំសម្រាប់ការពារមរតកដូនតា ។ មរតកនេះមានតម្លៃមិនអាច កាត់ថ្លៃបាន ហើយពលរដ្ឋខ្មែរក្រោមមិនដែលបោះបង់ចោលឡើយ ទោះបីត្រូវប្រឈមនឹងការលំបាក និងឧបសគ្គយ៉ាងណាក៏ដោយ ។

ទោះជាយ៉ាងនេះក្ដី យើងមានសេចក្ដីសោកស្ដាយ និងឈឺចាប់យ៉ាងខ្លាំង ដែលរហូតមកទល់ពេលនេះ រដ្ឋការអាណា និគមយួនមិនទាន់បានទទួលស្គាល់ពិធីបុណ្យសែនដូនតាជាថ្ងៃឈប់សម្រាកផ្លូវការទូទាំងដែនដីកម្ពុជាក្រោមនៅឡើយ ។ បងប្អូនខ្មែរក្រោមដែលមានបំណងចូលរួមពិធីបុណ្យ ត្រូវស្វែងរកពេលឈប់សម្រាកដោយខ្លួនឯង ខណៈដែលស្ថាប័នរដ្ឋ សាលារៀន និងរោងចក្រនានានៅតែបន្តដំណើរការធម្មតា ។ ស្ថានភាពនេះបង្កការលំបាកដល់អ្នកធ្វើការ សិស្ស និស្សិត និងក្រុមគ្រួសារកម្មករដែលធ្វើការចំណាកស្រុក ក្នុងការជួបជុំគ្នា និងបំពេញកិច្ចប្រពៃណីតាមជំនឿរបស់ខ្លួន ។

យើងចាត់ទុកការមិនផ្ដល់ថ្ងៃឈប់សម្រាកសម្រាប់ពិធីបុណ្យដ៏សំខាន់របស់ខ្មែរក្រោមនេះថា មានលក្ខណៈរើសអើង លំអៀង និងបង្ហាញពីភាពមិនស្មើគ្នាក្នុងការគោរពប្រពៃណីរបស់ពលរដ្ឋ រវាងជនជាតិខ្មែរក្រោម និងជនជាតិយួន ។ ស្ថានភាព នេះផ្ទុយពីពិធីបុណ្យចូលឆ្នាំយួន និងចិន ដែលហៅថា «តេត» ដែលរដ្ឋការយួនប្រកាសឲ្យមានការឈប់សម្រាកទូទាំងប្រទេស រហូតដល់កន្លះខែ ។ ការទទួលស្គាល់ប្រពៃណីរបស់ជនជាតិដើមខ្មែរក្រោម គួរតែឆ្លុះបញ្ចាំងតាមរយៈការអនុវត្តជាក់ស្ដែង ដែលអនុញ្ញាតឲ្យពលរដ្ឋចូលរួមពិធីបុណ្យរបស់ខ្លួនបានដោយសមរម្យ និងដោយសេចក្ដីថ្លៃថ្នូរ ។

រដ្ឋការយួនតែងតែផ្សព្វផ្សាយទាំងក្នុងស្រុក និងលើឆាកអន្តរជាតិថា ខ្មែរក្រោម ចិន និងយួនមានសិទ្ធិស្មើគ្នា ក្រោមពាក្យស្លោក «ប្រទេសរបស់ពលរដ្ឋទាំងអស់គ្នា» ។ រដ្ឋការនេះក៏តែងលើកឡើងថា ការទទួលបានឯករាជ្យ និងការតស៊ូប្រឆាំងបារាំង និងអាមេរិក ក៏មានការរួមចំណែកពីជនជាតិដើមខ្មែរក្រោម ដែលបានចូលបម្រើយៀកកុង និងបានលះបង់អាយុជីវិតជាច្រើន ។ ប៉ុន្តែ នៅពេលពិនិត្យមើលស្ថានភាពជាក់ស្ដែងនាពេលបច្ចុប្បន្ន យើងឃើញថា ពាក្យអះអាងអំពីសមភាពទាំងនេះ មិនបានឆ្លុះបញ្ចាំងឲ្យបានពេញលេញនៅក្នុងជីវិតរស់នៅរបស់ពលរដ្ឋខ្មែរក្រោមឡើយ ។ តាមគោលជំហររបស់យើង ការ អនុវត្តរបស់រដ្ឋការយួននៅតែមានភាពលំអៀង គិតតែបម្រើផលប្រយោជន៍ដល់ជនជាតិយួន ឬជនជាតិកិញ ជាចម្បង តែប៉ុណ្ណោះ ខណៈដែលពលរដ្ឋខ្មែរក្រោមនៅតែប្រឈមនឹងភាពក្រីក្រ រងការរំលោភបំពានសិទ្ធិសេរីភាព និងជិះជាន់កាន់តែ ខ្លាំងឡើងៗ ។ ការលះបង់របស់បុព្វការីជនខ្មែរក្រោម គួរតែត្រូវបានគោរពតាមរយៈការធានាឲ្យកូនចៅរបស់ពួកគាត់មានសិទ្ធិ ស្មើគ្នា មានសេចក្ដីថ្លៃថ្នូរ និងមានសេរីភាពក្នុងការរក្សាភាសា ជំនឿ និងប្រពៃណីរបស់ខ្លួន ។

ដើម្បីតវ៉ាចំពោះភាពអយុត្តិធម៌នេះ នាពេលកន្លងមក ពលរដ្ឋខ្មែរក្រោមជាច្រើនបានក្លាហាន ដាក់ញត្តិទៅកាន់រដ្ឋការយួន ដើម្បីទាមទារឲ្យទទួលស្គាល់ថ្ងៃឈប់សម្រាកផ្លូវការសម្រាប់ ពិធីបុណ្យចូលឆ្នាំថ្មីប្រពៃណីជាតិខ្មែរ និង បុណ្យសែនដូនតា ផងដែរ ។ សំណើទាំងនោះរួមមាន ការឈប់សម្រាកចំនួន ៣ ថ្ងៃ សម្រាប់ពិធីបុណ្យចូលឆ្នាំថ្មី និងចំនួន ២ ថ្ងៃ សម្រាប់ពិធីបុណ្យសែនដូនតា ទូទាំងដែនដីកម្ពុជាក្រោម ។ សំណើនេះបង្ហាញពីបំណងប្រាថ្នារបស់ប្រជាពលរដ្ឋ ដែលចង់មានពេលវេលា សមរម្យសម្រាប់ជួបជុំគ្រួសារ ធ្វើបុណ្យទាន និងបន្តប្រពៃណីដូនតារបស់ខ្លួន ។

ការដាក់ញត្តិដោយសន្តិវិធី ជាការប្រើប្រាស់សិទ្ធិស្របច្បាប់ និងជាការបង្ហាញឆន្ទៈរបស់ជនជាតិដើម ក្នុងការកំណត់ និងថែរក្សាជីវិតវប្បធម៌របស់ខ្លួន ។ ប៉ុន្តែ រដ្ឋការយួនមិនត្រឹមតែមិនបានឆ្លើយតបតាមសំណូមពរទាំងនោះប៉ុណ្ណោះទេ ថែមទាំងបានចាប់អ្នកស្នើដាក់ពន្ធនាគារដោយអយុត្តិធម៌ទៀតផង ។ ការឆ្លើយតបបែបនេះបានបង្កក្ដីឈឺចាប់ដល់សាមីខ្លួន ក្រុមគ្រួសារព្រះសង្ឃ និងពលរដ្ឋខ្មែរក្រោមទាំងមូល ។ អំពើយង់ឃ្នងរបស់រដ្ឋការយួន បានធ្វើឲ្យពលរដ្ឋខ្មែរក្រោម បានយល់កាន់តែច្បាស់នូវអ្វីដែលរដ្ឋការយួនឃោសនារាល់ថ្ងៃនោះ គ្រាន់តែជាការសម្ដែង បោកប្រាស់ និងកុហក់តែប៉ុណ្ណោះ ។

ក្នុងឱកាសពិធី បុណ្យសែនដូនតា ប្រពៃណីជាតិនេះ ខ្ញុំបាទសូមផ្ញើក្ដីនឹករឭក សេចក្ដីគោរព និងប្រសិទ្ធពរជ័យ ចំពោះព្រះសង្ឃ និងសកម្មជនសិទ្ធិមនុស្សខ្មែរក្រោមទាំង ១៩ រូប ដែលត្រូវរបបអាណានិគមយួនចាប់ដាក់ពន្ធនាគារ នាពេលកន្លងមក ព្រមទាំងក្រុមគ្រួសាររបស់ព្រះអង្គ និងលោកអ្នកទាំងអស់ផងដែរ ។ ក្នុងនោះមាន៖

• ព្រះតេជព្រះគុណ ថាច់ ចន្ទតារា
• ព្រះតេជព្រះគុណ គឹម សំរិន្ទ
• ព្រះតេជព្រះគុណ យឿង ខាយ
• លោក ថាច់ កឿង
• លោក តូ ហ្វាង ចឿង
• លោក យ័ញ មិញ ក្វាង
• លោក ថាច់ ង៉ា
• លោក ថាច់ ស្វឹង ដុង
• លោក ថាច់ ចិន្ត្រា
• លោក គឹម ឃីម
• លោក គឹម ឃូ
• លោក ថាច់ វាសនា
• លោក ថាច់ វិល័យ
• លោក គឹម សារឿង
• លោក ថាច់ ញ៉ា
• លោក ថាច់ ជាប់
• អ្នកស្រី ឌិញ ធី វិន
• អ្នកស្រី ចូវ ធី ទៀង
• អ្នកស្រី រដ្ឋ វ៉ារី

ព្រះសង្ឃ និងលោកអ្នកទាំងអស់ គឺជាវីរជនក្នុងយុគសម័យថ្មី ដែលបានលះបង់ក្ដីសុខផ្ទាល់ខ្លួន ដើម្បីលើកកម្ពស់សិទ្ធិសេរីភាពជាមូលដ្ឋាន សេចក្ដីថ្លៃថ្នូរ និងជាអ្នកឆ្ការផ្លូវនៃ «សិទ្ធិសម្រេចវាសនាខ្លួនដោយខ្លួនឯង» របស់ជនជាតិដើមខ្មែរក្រោម នៅដែនដីកម្ពុជាក្រោម ។ ភាពក្លាហាន និងការលះបង់របស់ព្រះអង្គ និងលោកអ្នកខាងលើ បានរួមចំណែកធ្វើឲ្យសំឡេងរបស់ខ្មែរក្រោម បានឮខ្ទរខ្ទារទៅកាន់ពិភពលោក និងរំឭកឲ្យសហគមន៍អន្តរជាតិយកចិត្តទុកដាក់ចំពោះទុក្ខលំបាក និងសេចក្ដីប្រាថ្នារបស់ប្រជាពលរដ្ឋខ្មែរក្រោម កាន់តែខ្លាំងជាងមុន ។

ចំពោះក្រុមគ្រួសារដែលកំពុងទ្រាំទ្រនឹងការបែកឃ្លាត ការនឹករឭក និងបន្ទុកជីវភាព ខ្ញុំបាទសូមសម្ដែងនូវសេចក្ដី អាណិតអាសូរ និងចូលរួមរំលែកទុក្ខយ៉ាងជ្រាលជ្រៅ ។ ក្នុងពេលដែលគ្រួសារជាច្រើនបានជួបជុំគ្នាប្រារព្ធពិធី បុណ្យសែន ដូនតា អវត្តមានសមាជិកជាទីស្រឡាញ់ប្រាកដជាបន្សល់នូវក្ដីសោកសៅក្នុងចិត្តជាក់ជាមិនខាន ។ សូមឲ្យក្រុមគ្រួសារទាំងអស់ មានកម្លាំងចិត្តរឹងមាំ មានសេចក្ដីសង្ឃឹម និងទទួលបានការគាំទ្រពីបងប្អូនជនរួមជាតិ ក្នុងស្មារតីសាមគ្គីភាព និងការរួមសុខរួមទុក្ខ ។

ដោយអានិសង្សដែលកើតចេញពីការធ្វើបុណ្យទាន ក្នុងរដូវកាន់បិណ្ឌ ភ្ជុំបិណ្ឌ និងសែនដូនតានេះ ខ្ញុំបាទសូមឧទ្ទិស កុសលផលបុណ្យ ប្រគេន និងជូនដល់បុព្វការីជនខ្មែរក្រោមគ្រប់ជំនាន់ ដែលបានចែកឋានទៅ និងអ្នកដែលបានលះបង់ អាយុជីវិតដើម្បីការពារទឹកដី ព្រះពុទ្ធសាសនា ភាសា និងអក្សរសាស្ត្រជាតិ គ្រប់ជំនាន់ ។ ក្នុងនោះមាន ព្រះសង្ឃដែលបានដឹកនាំ កសាង និងថែរក្សាវត្តអារាម វីរសមណៈ វីរបុរសជាតិ និងវីរជនខ្មែរក្រោមគ្រប់រូប ដែលមាន ឧកញ៉ា សឺន គុយ ជាប្រមុខ ។

សូមឲ្យកុសលផលបុណ្យដែលកូនចៅបានបំពេញដោយសេចក្ដីជ្រះថ្លា ជាបច្ច័យឲ្យវិញ្ញាណក្ខន្ធរបស់ព្រះអង្គ និងលោកអ្នកទាំងស់បានទៅសោយសុខក្នុងឋានបរមសុខ កុំបីឃ្លាតឡើយ ។

ការរំឭកដល់ដូនតា ក៏ជាការរំឭកដល់កាតព្វកិច្ចរបស់យើងជាកូនចៅ ក្នុងការបន្តថែរក្សាអ្វីដែលលោកបានបន្សល់ ទុក ។ យើងត្រូវរួមគ្នារក្សាភាសាខ្មែរ អក្សរសាស្ត្រខ្មែរ ព្រះពុទ្ធសាសនាថេរវាទ និងប្រពៃណីដ៏ល្អផូរផង់ឲ្យបានគង់វង្ស ព្រមទាំងបណ្ដុះស្មារតីស្រឡាញ់ជាតិ សាមគ្គីភាព និងការគោរពសេចក្ដីថ្លៃថ្នូររបស់មនុស្ស ។ ការបន្តមរតកនេះតាមរយៈជីវិតប្រចាំថ្ងៃ និងការអប់រំកូនចៅ គឺជាការតបស្នងគុណដ៏មានន័យចំពោះបុព្វការីជនរបស់យើង ។

ជាទីបញ្ចប់ ខ្ញុំបាទសូម ប្រសិទ្ធពរជ័យ សិរីសួស្ដី និងជ័យមង្គល ជូនដល់បងប្អូនខ្មែរក្រោម និងបងប្អូនជន រួមជាតិខ្មែរគ្រប់រូប ទាំងក្នុង និងក្រៅប្រទេស ។ សូមឲ្យលោកអ្នកមានសុខភាពល្អ កម្លាំងកាយមាំមួន ប្រាជ្ញាឈ្លាសវៃ ចិត្តអត់ធ្មត់ និងស្មារតីសាមគ្គីភាពរឹងមាំ ដើម្បីរួមគ្នាបន្តការតស៊ូដោយអហិង្សា ទាមទារសិទ្ធិសេរីភាព និងថែរក្សាមរតកវប្បធម៌ដូនតាខ្មែរក្រោម ឲ្យបានស្ថិតស្ថេរចិរកាល ។

សូមឲ្យពិធីបុណ្យសែនដូនតានេះ នាំមកនូវសេចក្ដីជ្រះថ្លា ភាពកក់ក្ដៅក្នុងគ្រួសារ និងកម្លាំងចិត្តសម្រាប់បងប្អូនជន រួមជាតិទាំងអស់ ។ សូមឲ្យលោកអ្នកចាកផុតពីទុក្ខភ័យ និងឧបសគ្គទាំងពួង ហើយបានប្រកបដោយពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ កុំបីអាក់ខានឡើយ ។

ថ្ងៃទី ០៩ ខែតុលា ឆ្នាំ ២០២៦
ប្រធានគណៈកម្មការព័ត៌មាន នៃសហព័ន្ធខ្មែរកម្ពុជាក្រោម
ថាច់ ប្រីជា គឿន l Preicheakoeun Thach

10/01/2026

KKF Condemns the Two-and-a-Half-Year Prison Sentence Imposed on 72-Year-Old Khmer-Krom Buddhist Woman Chau Thi Thien Washington, D.C. — September 30, 2026 The Khmers Kampuchea-Krom Federation (KKF)…