10/30/2026
PANAWAGAN: PAGTULONG SA PAGHAHANAP NG BIOLOGICAL FAMILY O MGA KAMAG-ANAK NG BATA
Agape Impact Ministries – Aruga Inc.
Alinsunod sa Republic Act No. 11642 o ang Domestic Administrative Adoption and Alternative Child Care Act, ang Panawagan ay isang mahalagang bahagi ng proseso ng paghahanap sa biological parents o mga kamag-anak ng isang batang nasa ilalim ng alternative child care. Layunin nitong mabigyan sila ng pagkakataong makilala ang bata, makipag-ugnayan, at mapatunayan ang kanilang kaugnayan sa kanya.
Bakit mahalaga ang Panawagan?
Ang bawat bata ay may karapatang malaman ang kanyang pinagmulan, pagkakakilanlan, at kasaysayan. Sa pamamagitan ng Panawagan, nabibigyan ng pagkakataon ang biological family o mga kamag-anak na lumantad at makapagbigay ng mahahalagang impormasyon na makatutulong sa pagbuo ng kumpletong pagkakakilanlan at kasaysayan ng bata.
Ang Panawagan ay isa ring mahalagang hakbang sa proseso ng child care at case management bago matukoy ang pinakaangkop at permanenteng care arrangement para sa bata, kabilang ang adoption, alinsunod sa kanyang pinakamahusay na interes at sa mga umiiral na batas at alituntunin.
Paano kayo makatutulong?
🙏Kung mayroon po kayong anumang impormasyon na maaaring makatulong sa pagtunton sa biological parents o mga kamag-anak ng batang saklaw ng Panawagan, hinihikayat namin kayong makipag-ugnayan sa Agape Impact Ministries – Aruga Inc. o sa kinauukulang awtoridad.
Paalala sa Pagiging Kumpidensyal
🔏Upang mapangalagaan ang privacy, dignidad, at kapakanan ng bata, magalang po naming hinihiling na huwag i-screenshot, i-repost, o ipamahagi ang Panawagan sa iba pang social media platforms o accounts nang walang kaukulang pahintulot. Mangyaring sundin ang mga itinakdang alituntunin ng awtorisadong ahensya hinggil sa wastong pagbabahagi ng impormasyon.
Ang inyong pakikiisa at pakikipagtulungan ay mahalaga sa paghahanap sa biological family o mga kamag-anak ng bata, habang patuloy na pinoprotektahan ang kanyang mga karapatan at kapakanan.
Maraming salamat po sa inyong suporta, malasakit, at pakikiisa. Sama-sama nating itaguyod ang isang prosesong may paggalang sa karapatan ng bawat bata at nakatuon sa pagbuo ng isang ligtas at mas mabuting kinabukasan para sa kanila.
Agape Impact Ministries – Aruga Inc.
Committed to protecting and promoting the best interests of every child.
