30/11/2025
KABATAAN NG PAMPANGA, LUMIKHA NG KASAYSAYAN! ANAKBAYAN @ 27!
Isang mainit at mapulang pagbati ang ipinaaabot nating lahat sa mga kabataan, sa kanilang paggunita ng ika-27 na anibersaryo ng pinaka komprehensibong pangmasang organisasyon ng mga kabataan - ang ANAKBAYAN!
Kasama ang iba't ibang organisasyon ng mga mamamayan sa Gitnang Luzon, nakiisa ang Anakbayan Pampanga sa isang kilos protesta para tuligsain ang malawakang korapsyon sa gubyerno, manawagan ng pagpapatalsik sa rehimeng Marcos-Duterte, at pananawagan ng pagsusulong ng pambansang demokrasya.
Si Marcos at Duterte ang hari at reyna ng korap! Walang anumang ghost projects ang maaaprubahan nang walang aprubal mula sa kanila, laluna kay Marcos! Sila ang pasimuno ng karagapalan sa gubyerno!
Ang pagkilos para pataksilin hindi lang si Marcos, kundi maging si Duterte, at pagtatayo ng isang transition council, ang pinakawastong panawagan sa harap ng sistematikong pagpapahirap ng burukrata kapitalismo, imperyalismo at pyudalismo sa sambayanan.
Sa pangunguna ng Anakbayan Pampanga, tiyak na maipagtatagumpay ng mga kabataan ang ubos-lakas na pagpapalawak, pagpapalakas at paglaban — para sa pagbagsak ng rehimeng Marcos-Duterte at sa pagsusulong ng pambansang demokrasya na may sosyalistang perspektiba!
Sa probinsya ng Pampanga, nagsisilbing isang tanglaw sa mga kabataan ang pagkakatayo at muling pagpapalakas ng hanay ng Anakbayan Pampanga. Sa pamamagitan ng AB Pampanga, muling nagkaroon ng daluyan ang mga kabataan para ibayong magmulat, mag-organisa at magpakilos ng kapwa mga kabataan.
Mula sa AB Pampanga, nagbunga ang pagsisikap ng mga kabataan na itayo ang Anakbayan sa paglitaw ng kanyang mga balangay sa DHVSU, UP Clark at AUF. Sa kasalukuyan, ang tatlong balangay na ito at ang probinsyal na balangay, ay mga patunay sa kagustuhan ng mga kabataang sumapi sa Anakbayan.
Sa pamamagitan ng AB DHVSU, nailantad ng mga Honorians ang kanilang mga hinaing laban sa korap at abusadong pamamahala sa pamantasan, at ang anti-demokratikong mga atake mula sa berdugong NTF-ELCAC at NICA.
Bitbit ang kaparehong militansya, inirehistro ng mga iskolar ng bayan ng Anakbayan UP Clark ang kanilang panawagan para sa mas mataas na badyet sa edukasyon at ang pagkakaroon ng mga batayang serbisyong pang-estudyante sa kanilang pamantasan.
At ang pinakahuling naitatag, mapagpasyang naibwelo ng mga Angeleneans ng AB Angeles University Foundation ang pagtatatag ng kanilang balangay sa pamamagitan ng pananawagan ng mas makataong pagtugon sa kagalingan at kalagayan ng mga estudyante at ang pagbibigay ng abot-kayang edukasyon para sa lahat.
Malawak at malayo na ang naabot ng Anakbayan Pampanga sa pagmumulat, pag-oorganisa at pagpapakilos ng mga kabataan. Ngunit marami pa ang kailangang trabauhin at malayo pa ang daan na kailangang tahakin.
Sa rebolusyong diwa ng Katipunan at militanteng tradisyon ng Kabataang Makabayan, mapagpasyang palalakasin ng mga kabataan ang Anakbayan sa buong probinsya at rehiyon! Itatatag natin ang Anakbayan saanman may konsentrasyon ng kabataan, at sa pagsuong natin sa anumang kahirapan, buong-lakas nating ipagtatagumpay ang lahat ng ating kampanya at panawagan!
ISABUHAY ANG REBOLUSYUNARYONG DIWA NG KATIPUNAN AT KABATAANG MAKABAYAN!
KABATAAN, PAG-ARALAN ANG LIPUNAN! PAGLINGKURAN ANG SAMBAYANAN!
LUMALAKAS, LUMALAWAK, LUMABAN!
ANAKBAYAN!
