04/08/2026
मिति: २०८३/०४/१९
श्री प्रदेश स्काउट कार्यालय सबै,
श्री स्थानीय स्काउट कार्यालय सबै,
श्री स्काउट एकाइहरू सबै,
सम्पूर्ण स्काउट सदस्यज्यूहरू।
विषयः स्काउट स्कार्फ प्रयोगसम्बन्धी व्यवस्था कार्यान्वयन गर्ने बारे।
नेपाल स्काउटमा विगतदेखि प्याक, स्काउट ट्रुप तथा रोभर/रेन्जर क्र्यूहरूले आफ्नो छुट्टै पहिचान झल्कने स्कार्फ प्रयोग गर्दै आएकोमा केही वर्षअघि लागू गरिएको व्यवस्थाअनुसार सम्पूर्ण सदस्यहरूले एउटै राष्ट्रिय स्कार्फ प्रयोग गर्दै आएका छन्।
राष्ट्रिय स्कार्फ ( National Scarf) नेपालको राष्ट्रिय झण्डाको रङ, चन्द्र र सूर्य अंकित, राष्ट्रिय पहिचान झल्काउने प्रतीकहरू समावेश गरी नेपाल स्काउटका स्काउटहरुले नेपालको प्रतिनिधित्व गरी अन्तर्राष्ट्रिय कार्यक्रमहरूमा पहिरिनका लागि निर्माण गरिएको विशेष स्कार्फ हो। पछिल्लो समय स्कार्फको प्रयोग सम्बन्धी स्पष्ट मापदण्डको अभाव तथा विभिन्न तहका नियमित गतिविधिहरूमा समेत राष्ट्रिय स्कार्फ प्रयोग हुँदै आएको अवस्थालाई दृष्टिगत गर्दै राष्ट्रिय स्कार्फको गरिमा, विशिष्टता तथा राष्ट्रिय प्रतीकको सम्मान कायम राख्न आवश्यक देखिएको छ।
यसै सन्दर्भमा नेपाल स्काउट राष्ट्रिय संयोजकबाट मिति २०८३/०४/१९ मा भएको निर्णयअनुसार देहाय बमोजिमको व्यवस्था तत्काल कार्यान्वयनमा ल्याइएको व्यहोरा सम्पूर्ण स्काउट सदस्य, प्रदेश स्काउट समिति, स्थानीय स्काउट समिति, स्काउट समूह, ट्रुप, प्याक तथा क्र्यूहरूलाई जानकारी गराइन्छ।
निर्णय तथा व्यवस्थाहरू:
१. नेपाल स्काउटको राष्ट्रिय स्कार्फ अबदेखि नेपाल स्काउट राष्ट्रिय प्रधान कार्यालयको स्वीकृति लिई अन्तर्राष्ट्रिय प्रतिनिधित्वका कार्यक्रमहरूमा नेपाल वा विदेशमा मात्र प्रयोग गरिनेछ।
२. यो परिपत्र जारी भएको मितिदेखि राष्ट्रिय स्कार्फ कुनै पनि प्याक, ट्रप, क्र्यू, स्काउट लिडर, प्रदेश वा स्थानीय तहका पदाधिकारी तथा सदस्यहरूले नियमित कार्यक्रम, तालिम, बैठक, समारोह तथा गतिविधिहरूमा प्रयोग गर्न पाउने छैनन्।
३. प्रत्येक प्रदेश स्काउट समितिले आफ्नो प्रदेशको भौगोलिक, सांस्कृतिक तथा संस्थागत पहिचान झल्कने गरी प्रदेश स्कार्फको डिजाइन तयार गरी स्वीकृतिका लागि नेपाल स्काउट राष्ट्रिय प्रधान कार्यालयमा पेश गर्नुपर्नेछ।
४. राष्ट्रिय प्रधान कार्यालयबाट स्वीकृत प्रदेश स्कार्फ सम्बन्धित प्रदेशका सदस्यहरूले प्रदेशको प्रतिनिधित्व गर्ने राष्ट्रिय कार्यक्रमहरूमा प्रयोग गर्न सक्नेछन्।
५. प्रत्येक स्थानीय स्काउट समितिले आवश्यकता ठानेमा आफ्नो स्थानीय तहको भौगोलिक, सांस्कृतिक तथा संस्थागत पहिचान झल्कने गरी स्थानीय तहको स्कार्फको डिजाइन तयार गरी स्वीकृतिका लागि नेपाल स्काउट प्रदेश कार्यालयमा पेश गर्नुपर्नेछ।
६. प्रदेश कार्यालयबाट स्वीकृत स्थानीय स्कार्फ सम्बन्धित स्थानीय सदस्यहरूले स्थानीय तहको प्रतिनिधित्व गर्ने प्रदेश स्तरीय कार्यक्रमहरूमा प्रयोग गर्न सक्नेछन्।
७. प्रत्येक स्काउट समूह, ट्रुप, प्याक तथा क्र्यूले आफ्नो छुट्टै पहिचान झल्कने स्कार्फको डिजाइन तयार गरी सम्बन्धित स्थानीय स्काउट समितिबाट स्वीकृत गराउनुपर्नेछ।
८. स्थानीय स्काउट समितिले समूह, ट्रुप, प्याक तथा क्र्यूको स्कार्फ स्वीकृत गर्दा अन्य समूह वा एकाइसँग नदोहोरिने वा मेल नखाने गरी आवश्यक जाँच, अभिलेखीकरण तथा व्यवस्थापन गर्नुपर्नेछ।
९. राष्ट्रिय परिषद् सदस्य, राष्ट्रिय कार्यकारी समिति सदस्य, राष्ट्रिय पदाधिकारी, राष्ट्रिय आयुक्त तथा प्रदेश तथा स्थानीय परिषद् सदस्य र पदाधिकारीहरूले नेपाल स्काउटले तोकेबमोजिमको स्कार्फ मात्र प्रयोग गर्नुपर्नेछ।
१०. नयाँ व्यवस्था पूर्ण रुपमा कार्यान्वयन नभएसम्म बढीमा निर्णय भएको मितिले एक वर्षसम्म सम्बन्धित सदस्यहरूले आफ्नो तालिम, जिम्मेवारी वा युनिट अनुसार प्रयोगमा रहेको स्कार्फ प्रयोग गर्न सक्नेछन्।
११. यस व्यवस्थाको कार्यान्वयनका लागि आवश्यक मापदण्ड, डिजाइन स्वीकृति प्रक्रिया तथा कार्यविधि नेपाल स्काउट राष्ट्रिय प्रधान कार्यालयले तयार गरी सम्बन्धित निकायबाट अनुमोदन पश्चात् लागू गरिनेछ।
सम्पूर्ण स्काउट सदस्य तथा संरचनाहरूलाई उक्त व्यवस्था पालना गरी राष्ट्रिय स्कार्फको गरिमा तथा स्थानीय पहिचानको संरक्षणमा सहयोग पुऱ्याउन अनुरोध गरिन्छ।
