09/07/2026
රුහුණ විශ්වවිද්‍යාලය තුළ මේ වන විට ශීඝ්‍රයෙන් පැතිර යන ඩෙංගු, පැපොල සහ වෛරස් උණ තත්ත්වයන් මෙන්ම, ඒ සම්බන්ධයෙන් විශ්වවිද්‍යාල පාලනාධිකාරිය අනුගමනය කරන නිහඬ පිළිවෙත පිළිබඳව කරුණු දැක්වීමේ විශේෂ මාධ්‍ය සාකච්ඡාවක් 2026.07.09 දින පැවැත්වුණු අතර මෙය රුහුණ විශ්වවිද්‍යාලයීය මහා ශිෂ්‍ය සංගමයේ සභාපති සහෝදරයා ඇතුළු වගකීම් දරන ශිෂ්‍ය නියෝජිතයින්ගේ ප්‍රධානත්වයෙන් මෙය සිදු කරනු ලැබිණි.
මෙහිදී මේ වන විට විශ්වවිද්‍යාල පරිශ්‍රය තුළ ඩෙංගු රෝගීන්ගේ සංඛ්‍යාව ශීඝ්‍රයෙන් ඉහළ යමින් පවතින අතර, ඊට අමතරව පැපොල සහ වෛරස් උණ රෝගීන්ගේද දැඩි ව්‍යාප්තියක් දක්නට ලැබෙන බවත්, මෙම අවදානම් සහගත තත්ත්වය පිළිබඳව විශ්වවිද්‍යාල පරිපාලනය මනාව දැනුවත් කර තිබුණද, මේ දක්වා ඔවුන්ගෙන් කිසිදු සාධනීය ප්‍රතිචාරයක් ලැබී නොමැති බවත්, රෝගී වන සිසුන්ට ප්‍රතිකාර කිරීමේදී විශ්වවිද්‍යාලයීය වෛද්‍ය මධ්‍යස්ථානය තුළ පවතින වර්තමාන තත්ත්වය සහ එහි ගැටලු පිළිබඳවද සභාපති සහෝදරයා විසින් මෙහිදී දැඩිව අවධාරණය කෙරිණි.
තවද මෙම තත්ත්වය පාලනය කිරීම සඳහා විධිමත් වැඩපිළිවෙළක් කඩිනමින් සකස් කරන ලෙසත්, ආසාදිත සිසුන් වහාම නිරෝධායනයට ලක් කිරීමේ ක්‍රමවේදයක් සකස් කරන ලෙසත් මහා ශිෂ්‍ය සංගමය විසින් බලධාරීන්ට දැන්වූ අතර මෙම සෞඛ්‍ය අර්බුදය විසඳීම සඳහා පාලනාධිකාරිය විසින් කඩිනමින් නිසි වැඩපිළිවෙළක් ක්‍රියාත්මක නොකරන්නේ නම්, සමස්ත ශිෂ්‍ය ප්‍රජාවගේ ජීවිත ආරක්ෂාව වෙනුවෙන් ඉදිරියේදී ක්‍රියාමාර්ග වෙත එළඹෙන බවට මහා ශිෂ්‍ය සංගමය විසින් පාලනාධිකාරියට අවධාරණය කර සිටින ලදී.
2026 -07-09
මහා ශිෂ්‍ය සංගමය - රුහුණ විශ්වවිද්‍යාලය
