02/05/2026
#ৰহেদৈ-২০২৬
কৃষকক সন্মান আৰু উৎসাহ প্ৰদানৰ লগতে বিহুৰ কৃষি, প্ৰকৃতিৰ সৈতে থকা সম্পৰ্কক উদযাপনৰ অৰ্থে লখিমপুৰৰ সমূহ সেউজপ্ৰেমী ৰাইজৰ সহযোগত প্ৰতিবছৰে সেউজ মিত্ৰ ফাউণ্ডেশ্যনৰ উদ্যোগত অনুষ্ঠিত কৰা হয় এক চান্দাবিহীন ব্যতিক্ৰমী বিহুৰ অনুষ্ঠান "ৰহেদৈ" । এইবছৰ এই বিহুখনে চতুৰ্থ বছৰ অতিক্ৰম কৰিলে ।
আমাৰ মাজৰ পৰা জুবিন দা বিদায় লোৱা এবছৰ নোহোৱাৰ পৰিপ্ৰেক্ষিতত এইবছৰ এই বিহুখনৰ সকলো সাংস্কৃতিক কাৰ্যসূচী বাতিল কৰোঁ যদিও খেতিয়কসকলক সন্মান প্ৰদানৰ অৰ্থে কিষাণ বিদ্যাপীঠ উচ্চ মাধ্যমিক বিদ্যালয়ৰ ভূমিত প্ৰস্তাৱিত জুবিন গাৰ্গ অৰ্কিড উদ্যান ক্ষেত্ৰৰ মঞ্চত "ৰহেদৈ-২০২৬" অনুষ্ঠিত কৰোঁ । জুবিন দাক শ্ৰদ্ধাঞ্জলিৰে আৰম্ভ কৰা এই অনুষ্ঠানত আমি লখিমপুৰ জিলাৰ ৩ জন আৰু মাজুলীৰ ১ জন খেতিয়কক বিশেষ সম্বৰ্ধনা জনোৱাৰ লগতে তেওঁলোকৰ মনৰ বতৰা আমি লওঁ । লখিমপুৰ জিলাৰ আদৰ্শ আৰু চৰকাৰী বঁটা প্ৰাপ্ত খেতিয়ক শ্ৰীযুত বিপুল মৰাং, শ্ৰীযুত দুলেন বড়ি, শ্ৰীযুত নিত্যানন্দ শইকীয়া আৰু মাজুলী জিলাৰ শ্ৰীযুত বুবু দাসদেৱক এখন খোৰ, দুটা পাচি, এটা স্মাৰক,এখনকৈ ফুলাম গামোচা আৰু চেলেং আদিৰে সম্বৰ্ধনা জনোৱা হয় ।
এই মঞ্চতে লেখিকা শ্ৰীযুতা গায়ত্ৰী গগৈ বাইদেউই জুবিন গাৰ্গ অৰ্কিড উদ্যান ক্ষেত্ৰলৈ কেইবা জোপাও অৰ্কিড উপহাৰ হিচাপে আমাক আগবঢ়ায় । অনুষ্ঠানৰ শেষত বহুকেইজোপা গছত অৰ্কিডসমূহ সংস্থাপিত কৰা হয়। আমাৰ নিমন্ত্ৰণ ৰক্ষা কৰি উপস্থিত থকা সকলো ব্যক্তিলৈ আমি কৃতজ্ঞতা জ্ঞাপন কৰিলোঁ ।
বিহু আমাৰ প্ৰাণ । আমাৰ এটা বাট । এটা পৰিচয় । আমি ইয়াক জীয়াই ৰাখিব লাগিব কামেৰ, খেতিৰে । আৰু খেতিয়কে দিয়ে আমাক এই সাহস । গতিকে, আহক প্ৰকৃতিৰ সৈতে, খেতিৰ সৈতে আমি আকৌ উদযাপন কৰিবলৈ শিকোঁ "বিহু"ক ।
