11/06/2026
Transición e Estatuto de Autonomía
O segundo dos relatorios do ciclo ‘90 anos do Estatuto’ estivo a cargo do ex ministro de Xustiza, Francisco Caamaño, que amosou a súa ledicia por participar por primeira vez dunha actividade do Ateneo de Pontevedra e desexando que non fose a última. Comezou a súa intervención dando conta da súa satisfacción pola celebración deste ciclo, xa que lembrar e valorar que dispoñemos dun Estatuto, como o de 1981, supón recoñecer e darlle o valor que teñen aos que loitaron por el, como tamén se fixera no plebiscitado de 1936.
Francisco Caamaño centrou a súa intervención no periodo da Transición e na reivindicación do Estatuto de Autonomía de Galicia, comezando por sinalar de que xeito diferentes mitos arredor do que supuxo a Transición chegan ata hoxe amosando unha realidade moi diferente á vivida ao longo daqueles días, cheos de tensións e incertezas. Un caso exemplar é o de non amosar a violencia que se viviu ao longo dese tempo de recuperación da Democracia con numerosas vítimas mortais e ata tres intentos de Golpes de Estado.
Esa noción de ‘Reforma si, ruptura non’, reflectía a idea de continuidade controlada cara a consecución de liberdades por parte do réxime anterior, mais pouco a pouco fóronse conseguido avances como a legalización de Asociacións Políticas, como paso previo a creación dos Partidos Políticos que no caso de Galicia dividíronse en dous grupos, un cunha maior defensa da Constitución e o outro cun marcado interese polo carácter identitario ou nacional do noso país. Ambos camiñaron na consecución dese novo Estatuto para Galicia que centrará a mesa redonda que como peche do ciclo reunirá o mércores 17 no Edificio Castelao do Museo de Pontevedra a Xosé Manuel Beiras, Emilio Pérez Touriño e Xosé Luis Barreiro Rivas na valoración dos 45 anos transcurridos dende a súa aprobación.
