https://www.facebook.com/180332442003257/

Paarl Jeug Inisiatief / Paarl Youth Initiative

Home
South Africa
Paarl
Paarl Jeug Inisiatief / Paarl Youth Initiative

Call Directions

Bemagtiging, Ontwikkeling, Leierskap / Empowerment, Development, Leadership

The Paarl Youth Initiative is an article 21 company (a public benefit organisation) that was founded to empower selected youth of the Northern Paarl, Windmeul and Paardeberg areas.

27/10/2026

Onlangs het ses van ons graad 9-leerders in Paarl Jeug Inisiatief se Good Company-program Akademia Paarl besoek vir vakkeusevoorligting.

Dr. Sharon Kruger, opvoedkundige sielkundige by Akademia Paarl, het met die leerders gesels oor hul sterkpunte, belangstellings en persoonlikhede, en hulle gehelp om meer insig te kry in moontlike vakkeuses vir hul toekoms.

Vakkeusevoorligting is so waardevol omdat dit leerders help om ingeligte keuses te maak - keuses wat realistiese deure oopmaak vir verdere studie en loopbaanmoontlikhede.

Die leerders het die terugvoer baie geniet. In elkeen se geval het dit hul voorkeure ten opsigte van vakkeuses bevestig, en hulle was veral opgewonde oor die terugvoer oor hul persoonlikhede en sterkpunte.

Dankie aan dr. Sharon Kruger en Akademia Paarl vir hierdie waardevolle geleentheid.

12/10/2026

Sondag is die matrieks van die Paarl Jeug Inisiatief na Paarlberg NG Kerk se matriekdiens genooi. Tydens die diens is daar onder andere vir die matrieks en die eindeksamen wat voorlê, gebid.

Een van ons matrieks het dit mooi verwoord:

“Soos Psalm 23 sê: ‘Die Here is my Herder.’ Dit gee vir ons ’n warm en bemoedigende gevoel om te weet dat, met hierdie moeilike eindeksamen wat voorlê, daar mense is wat ons in hulle gebede dra. Dit gee vir ons moed en dra ons ook deur hierdie tyd.

Baie dankie aan Paarlberg Gemeente vir julle omgee, ondersteuning en gebede. Mag julle ryklik geseën bly.”

Ons is dankbaar dat ons jongmense deur die gemeente ontvang en in gebed opgedra is. Ons bid vir rustigheid, moed, wysheid en volharding vir elke matriekleerder wat nou voorberei vir die eindeksamen.

18/12/2025

Twee geslagte, een erfenis

By ons onlangse prysuitdeling het ons ’n spesiale oomblik beleef: Elrich, een van ons graad 11-leerders, het sy ma René langs hom gehad.

René was deel van die heel eerste groep wat by die Paarl Jeug Inisiatief se Good Company-program aangesluit het, en dit was juis háár groep wat die naam Good Company aan die program gegee het.

Nou, jare later, is haar seun Elrich self deel van die program. Van ma tot seun, van begin tot nou. ’n Ware bewys dat die waardes van Good Company oor geslagte heen voortleef.

17/12/2025

Good Company Matriekgroep neem Afskeid

By ons jaarlikse prysuitdeling het die matrikulante van die Good Company-program hul vyfjaar-reis afgesluit. Op haar beurt het Eulynne Skippers namens die matrieks van 2025 ’n roerende afskeidsboodskap gelewer, ’n boodskap vol dankbaarheid, geloof en die besef dat drome nooit te groot is nie.

Eulynne se woorde het die hart van die program vasgevang: die gevoel van eenheid, familie en die geleenthede wat met ope arms aangegryp is.

Hieronder deel ons haar volledige afskeidstoespraak, ’n inspirasie vir elke jongmens wat glo dat drome haalbaar is:

“Wie sou kon dink dat 'n reis van vyf jaar binne 'n oomblik se tyd verby sou wees. Matrieks, ons staan tans aan die einde van 'n era, maar tog aan die begin van 'n nuwe hoofstuk.

'n Hartlike goeie naand aan al ons ouers, ons donateurs, die Rotariërs, ons gassprekers, ons GC leerders, maar 'n spesiale groete aan 2025 se matrikulante. Ek is Eulynne Skippers en dit is 'n groot eer en voorreg om vir u te woord te staan.

Gister toe ons by Radio KC gaan praat het, het Avril, die radio-omroeper, gevra: “Wat gaan jy die meeste mis van die GC-program? Wat gaan jy saamvat?” En toe sê ek: Die gevoel van eenheid. Die gevoel van familie. Good Company was vir ons regtig die sambreel waaronder ons plaaskinders, wat daagliks blootgestel is aan die negatiewe kant van die lewe, kon skuil.

’n Wyse man het gesê: Jy kan eers besef wat jou droom is as jy dit ‘n werklikheid sien. Ons is soms so vasgevang in ons eie realiteit, dat ons sukkel om buite die boks te dink, maar dit was hier by Good Company waar ek besef het dat enige droom nie te groot of onrealisties is nie.

Dis met ’n knop in die keel wat ek hier voor staan om die afskeidstoespraak namens die matrieks van 2025 te doen. Ai, oom Heini, waar gaan ek weer sulke lekker macaroni kry? Ek dink ons is nog nie gereed om totsiens te sê nie, maar wat ek wel totsiens voor kan sê, is daardie rowwe Outeniekwa-berge wat ons moes sta. My bene was skoon stukkend!

Graad 8 tot en met graad 11, julle is nou die volgende leiers, die volgende verteenwoordigers van watter uitstekende saad hier geplant word. So vat elke geleentheid aan, moenie huiwer nie, want dis hier waar ons saam leer, en indien ons val, mekaar as ’n span, as ’n familie kan oplig.

Aan my mede-matrieks, ek wil julle bemoedig met die versie in Spreuke 3:6 - “Ken Hom in al jou weë, dan sal Hy jou paaie gelyk maak.” Alhoewel ons nou uitgestuur is na ’n wêreld vol onbekendhede, moet ons steeds God die middelpunt van als maak. Ons kan niks vermag tensy ons nie ons Skepper as ons helper het nie.

Ek wil dankie sê aan ons ouers wat bankvas agter ons deur die moeilike jaar gestaan het. Ek wil dankie sê aan een elke Good Company-lid wat ons die mooiste herinneringe gegee het om deel te wees van so ’n hegte familie. Maar die belangrikste, oom Heini, baie baie dankie dat ons kon deel uitmaak. En ek weet hier onder ons is sommiges wat graag wil terugkom en terugploeg, soos wat Jaybrey en Glemorene en soveel ander al gedoen het.

So ek wil julle uitdaag: Gaan uit en wees goeie geselskap. Dis mos immers wat Good Company is.

Ons sê nie totsiens nie, ons sê: Tot ons weer groet!"

Mag voorspoed en guns vir Eulynne vergesel.

17/12/2025

Baie geluk aan die ontvangers van die trofeë by Paarl Jeug Inisiatief se onlangse prysuitdeling. Hier staan hulle by ons gasspreker, dr. Gillian Arendse.

Roshaan Lendoor (links) is die ontvanger van die Leierskaptrofee. Roshaan is tans nie net die president van die Good Company Interact-klub nie, maar dien die vorige twee jaar as sekretaresse van die klub. Roshaan het verskeie leierskampe bygewoon en was selfs kandidaat vir hoofmeisie by haar skool.

Catherine Adonis (tweede van links) is die ontvanger van die Angon Entrepreneurskaptrofee. Catherine was een van die stigterslede van die entrepreneursklub, is jaarliks 'n topverkoper en ontvang vanjaar vir die derde keer die Angon Entrepreneurskaptrofee.

Eulynne Skippers is die ontvanger van die John Martin Wisseltrofee. Gedurende Eulynne se vyf jaar in die Good Company-program het sy sedert dag een elke geleentheid met albei hande aangegryp. Eulynne was stigterslid van die entrepreneursklub, het vir drie jaar op die bestuur gedien en was een van die topverkopers. Sy het ook op die bestuur van die Interact-klub gedien en president van die klub geword. Eulynne was altyd gewillig om donateurs toe te spreek, toesprake by funksies te maak en was 'n staatmaker by elke aktiwiteit wat aangebied is.

Ons is baie trots op hierdie jong dames.

16/12/2025

Prysuitdeling 2025: 'n Fees van Suksesverhale!

Die jongmense in Paarl Jeug Inisiatief se Good Company-program werk die hele jaar hard aan modules en aktiwiteite. Die program het 'n formele deel met geassesseerde modules, maar ook 'n informele kant waar hulle vrywillig kan deelneem aan die Good Company Interact-klub, die Good Company Entrepreneursklub, vakansieklub en staptog, of eksterne geleenthede soos die -kamp, die matriekfees en die Rotariërs se RYLA en Adventures into Citizenship-kampe.

By die prysuitdeling ontvang die jongmense vir elke suksesvol voltooide module of aktiwiteit 'n sertifikaat as beloning vir hul toewyding!

Vanjaar was dr. Gillian Arendse, bekende spreker, ons gasspreker (tweede van links op die foto). Jaybrey Jansen, voormalige Good Company-lid, asook vise-president en president van die Interact-klub, het haar B.Ed-graad aan CPUT voltooi en haar suksestog met die jongmense gedeel (tweede van regs).

Kyk hoe trots staan almal wat aan die program deelgeneem het!

16/12/2025

Na vyf jaar van groei, ontdekking, verhoudingsbou en diens is dit belangrik om terug te kyk en te reflekteer. Ons matrieks het mooi stories met mekaar gedeel en lekker gelag oor al die pret wat hulle gehad het. Tog was daar vele diep oomblikke ook.

Lees gerus self wat die matrikulante sê en vier hulle saam met ons:
Savanne-Leigh: “Dankie dat ek selfvertroue gekry het by GC en vir alles wat oom Heini vir ons beteken het.”
Llushay: “Ek is dankbaar vir die geleentheid om die Entrepreneursklub te kon stig en myself te leer ken.”
Hendrunice: “My hoogtepunt was om deel te wees van die klubs en kampe, ek het vriende gemaak en gegroei.”
Enlynne: “Good Company was die plek waar vriende in familie verander het.”
Branwille: “Ek het my persoonlikheid en integriteit ontwikkel. Dankie vir die selfvertroue wat ek opgebou het.”
Marzaan: “Die kampe het my gehelp om verhoudings te bou en my kommunikasievaardighede te verbeter.”
Tershia: “Dankie vir die geleenthede — ek het baie gegroei en goeie energie ervaar.”
Chenise: “Imagine het my geïnspireer en ek het meer van myself geleer.”
Ashley: “Good Company het my gehelp om in myself te glo en veilig te voel.”
Shirlynn: “Oom Heini het ons uit ons dop laat kom, ek is dankbaar vir elke geselsie en geleentheid.”
Leathon: “Ek het geleer om in myself te vertrou en met ander saam te werk.”
Catherine: “Ek het selfvertroue opgebou en wil nou mense help wat in armoede leef.”
Johnique: “Good Company het my karakter gevorm en my gehelp om my pad in die lewe te vind.”

Wat 'n voorreg is dit om vir vyf jaar deel van hierdie besondere jongmense se lewensverhale te wees! Paarl Jeug Inisiatief wens hulle net voorspoed en sukses toe.

15/12/2025

Roshaan Lendoor, president van die Good Company Interact-klub, het tydens Paarl Jeug Inisiatief se prysuitdeling op 'n inspirerende manier terugvoer gegee oor die jaar se hoogtepunte – van gemeenskapsprojekte soos lekkergoedpakkies by kinderhuise en besoeke aan Paarl Hospitaal, tot persoonlike groei deur RYLA en Adventures into Citizenship. Sy het haar leierskapsreis gedeel en dankie gesê aan die Paarl Rotary Club vir hul ondersteuning.

Besoek gerus die Good Company Interact Club District 9350 se bladsy en word self geinspireer deur Roshaan se pragtige boodskap by https://www.facebook.com/GoodCompanyInteractClub

15/12/2025

'n Groep van Paarl Jeug Inisiatief se matrieks was bevoorreg om die matriekfees by Noordhoek strand by te woon en het dit baie geniet. Die matriekfees bied 'n geleentheid aan matrikulante om die einde van hul hoërskoolloopbaan in 'n veilige omgewing te vier terwyl hulle ook voorberei word op die wêreld ná matriek.

Ons meisies het behoorlik 'n fees gehad en al die aktiwiteite baie geniet en geborrel van opgewondenheid met hulle terugkeer.

Hendrunice skryf: "Wat vir my uitgestaan het, was dat ek altyd tyd in die see wou deurbring en dit was ongelooflik lekker om in die berg kerk te hou in die natuur."
Volgens Tershia sal sy hierdie herinneringe saam met haar dra as sy die volgende hoofstuk van haar lewe binnegaan.
Catherine sê: "Soos ons op die fees was, het ek gewag vir die e-pos dat ek aanvaar is om volgende jaar te gaan studeer en net soos ek gedink het dat ek nie gaan inkom nie, het ek die e-pos gekry, wat vir my bewys het dat gebed baie krag dra."
Chenise deel dat sy eintlik 'n introvert is, maar dat sy baie nuwe mense ontmoet het en gemaklik met almal gesels het.
Marzaan is baie dankbaar vir die fees wat almal soos een groot familie laat voel het en dat dit vir haar 'n baie groot belewenis was.
Llushay skryf: "Vir die eerste keer in my lewe het ek 'n ander soort veiligheid en vrede ervaar, en God se onvoorwaardelike liefde. Dit het my lewe verander!"
En Eulynne deel: "Toe ek hoor hierdie gaan die 'awesomste' week van my lewe wees, het ek eerlikwaar gedink die mense is laf, want daar is vir my niks lekkerder as slaap nie. En ek moet bieg, dit was die 'awesomste' week van my lewe! By Noordhoek kon ons reis, ontdek, 'connect' en die belangrikste van alles, jou verhouding met die Almagtige versterk."

Baie dankie aan elkeen wat hierdie wonderlike geleentheid vir ons dames moontlik gemaak het.

12/12/2025

Herinnering en dankbaarheid by ons Prisuitdeling

Tydens die terugvoer van ons Interact-klub se president, Roshaan Lendoor, oor die jaar se aktiwiteite, het die vorige president, Eulynne Skippers, haar gevra om 'n kers aan te steek ter nagedagtenis aan Pamela Willemse, een van die stigterslede van die Interact-klub.

Ons het ook 'n oomblik van stilte gehou vir ons beskermheer, dr. Franklin Sonn, wat ons vroeër vanjaar verloor het, asook ander geliefdes wat tydens die jaar oorlede is.

Hierdie oomblikke herinner ons aan die nalatenskap van dié wat ons voorgegaan het en inspireer ons om hul werk voort te sit.

Address

Paarl
7623

Telephone

021 872 5926

Website

facebook.com

Alerts

Be the first to know and let us send you an email when Paarl Jeug Inisiatief / Paarl Youth Initiative posts news and promotions. Your email address will not be used for any other purpose, and you can unsubscribe at any time.