26/08/2026
🌿𝐇𝐄 𝐏𝐀̄𝐍𝐔𝐈 𝐌𝐀𝐓𝐄🌿
Kua huri ngā kamo o te uri o Te Kāhui Maunga, kua whati te pae o te marama. Kua makere te Raukura i te tihi o Taranaki, kua maunu te taniwha i te rua.
Tīraha mai rā te pae o te mate, Kua kōruru te rangi, kua mōwai te whenua, kua tūpoki te kapua ki runga o Taranaki rāua ko Ruapehu, kua kōnehunehu te pae i te aroha.
Kua tīwēwē te manu nā runga ana mai o Kōangatara, e mea ana pititoi, pititoi...
𝑻𝒆 𝑰𝒌𝒂𝒎𝒂𝒕𝒂𝒘𝒉𝒆𝒓𝒐 𝑹𝒂𝒖𝒓𝒖 𝑩𝒓𝒐𝒖𝒈𝒉𝒕𝒐𝒏
Ko Te Ikamatawhero Rauru Broughton, te pōtiki, te tama whakaotinga a Ruka Broughton rāua ko Mereiwa Broughton, kua hoki ki te hunga nāna a ia i poipoi ki ngā taonga kāmehameha o Te Roroku-o-te-rangi ki Aoao-ki-te-rangi, ki ngā mātauranga tuku iho a te uru kahika kei te ao o nehe...
Mai i te awa o Mōkau, piki whakarunga ki Rangitīkei, ki Rātana, whati whakauta ki a Koro Ruapehu, otirā, ko Te Kāhui Maunga whānui ngā pou i tū ai tōna ao.
Ko Ngā Rauru Kītahi te iwi, ko Ngāti Maika te hapū, ko Pākaraka te pā, te kāinga ka whakahokia atu nei te pōtiki kia tīraha ki te uma o ōna mātua tūpuna.
Ki tōna taha ūkaipō, ka rere ngā kāwai ki Ngāti Porou, ki Ngāti Kahungunu, ki Ngāti Awa, ki Tūwharetoa, ki Te Arawa. He taura here tangata, he taura here whenua, he taura here whakapapa i toro whānui ai tōna ao Māori.
He puna kōrero nō te whare wānanga. I whāngaia ki te kai mānga, i whakatōkia ki roto i a ia ngā kōrero tūhāhā, ngā kōrero maire, ngā kura huna i waiho iho e rātou mā kua mene ki te pō.
I mōhiotia tōna reo, tōna tikanga, tōna mātauranga ki ngā paepae o Te Kāhui Maunga; i whakaaetia tōna tū, tōna ārahi i te tangata ki ngā marae maha p**a noa i te motu. He reo i rangona i te pae, he kanohi i kitea i te wā o te pōwhiri, he pou tikanga i tū ai te tangata.
He pūkenga Mātauranga Māori ki te taumata Paerua i Te Wānanga o Raukawa, heoi anō, ko tōna whare wānanga tuatahi ko ngā turi o ngā kuia, koroheke, ko ngā whare kōrero o nehe. He kaipupuri nō ngā kōrero tūhāhā, nō ngā kōrero maire, nō ngā kura huna o te whare wānanga tawhito.
Nā, kua motu te aka matua, kua whati te rākau whakaruruhau, kua marere te rau o te huia. Kua wahangū te reo whakataki i te pae. Kua mahue mai ko ngā tapuwae, ko ngā kupu, ko ngā kura huna hei whakatō ki te whatumanawa o ngā uri whakaheke.
𝐍𝐆𝐀̄ 𝐖𝐇𝐀𝐊𝐀𝐑𝐈𝐓𝐄𝐍𝐆𝐀
Ka takoto a Rauru ki Pākaraka Marae hei te Paraire 28 o Ākuhata ki te Rātapu 30 o Ākuhata 2026.
Ko ngā wā whakaeke:
Paraire: 9am | 12:30pm | 3:30pm – Karakia: 7pm
Rāhoroi: 9am | 12:30pm | 3:30pm – Karakia: 7pm
Ka tū te karakia whakamutunga hei te Rātapu 30 o Ākuhata i te 11am.
Hei muri iho ka nehua a ia ki te urupā i reira.
📇Whānau Media Contact: Tamzyn-Rose Pue
Email: [email protected]
