http://www.manoelislandcampaign.com/

Manoel Island: Post Għalina, 23 St Anne Street, Floriana (2026)

14/05/2026

Ilbieraħ, Manoel Island ġiet lura għand il-pubbliku.

Din hija rebħa tal-poplu, mill-poplu, u għall-poplu.

Bdiet bħala ħolma li saret kampanja.

Kebbset fjamma ta’ tama fil-poplu Malti u Għawdxi, u fost ħafna u ħafna oħrajn li jgħixu hawn.

Fjamma ta’ tama li mod ieħor huwa possibbli.

Illum nafu li dik it-tama ma kinitx fierħa.

Nafu li meta ningħaqdu sabiex naħdmu għal pajjiż aħjar, nistgħu nilħqu dak li qabel kien jidher impossibbli.

Għad fadal x’nagħmlu, speċjalment bil-ħatfa sfaċċata tal-art għall-interessi kummerċjali ta’ ftit nies, bħalma qed naraw bil-kumpless tal-padel.

U jaf jinqalgħu kwistjonijiet oħra wkoll.

Però l-lezzjoni tibqa’ magħna:

Flimkien, nistgħu noħolmu u nwettqu l-ħolm tagħna.

Anke meta l-ħolma hija li Manoel Island jista’ jsir Post Għalina.

10/05/2026

Il-Prim Ministru Robert Abela ilbieraħ reġa’ stqarr li huwa kontra l-iżvilupp illegali, u li deċiżjoni fuq il-padel courts illegali f'Manoel Island trid tittieħed mill-PA.

⚠️ F’dan l-istadju rridu nfakkru lill-Prim Ministru li, għalkemm id-deċiżjoni finali tista’ formalment tkun f’idejn l-Awtorità tal-Ippjanar, xorta għandu dmir lejn il-pubbliku li jiżgura li l-awtoritajiet qed jiffunzjonaw b’mod xieraq u fl-interess pubbliku.

Kif inhuma l-affarijiet bħalissa, kemm il-courts tal-padel li diġà qed joperaw fuq Manoel Island kif ukoll dawk żviluppati riċentement inbnew mingħajr il-permess tal-PA fuq fdalijiet arkeoloġiċi. Sitwazzjonijiet simili seħħew fis-snin riċenti f’Luxol u Pembroke Gardens, fejn courts tal-padel ġew żviluppati illegalment u aktar t**d issanzjonati mill-Awtorità tal-Ippjanar.

❓Filwaqt li huwa pożittiv li l-Prim Ministru jgħid li huwa kontra żvilupp illegali, huwa lest ukoll jaċċetta żvilupp illegali li wara jiġi regolarizzat mill-istess awtorità li suppost twaqqfu milli jsir?

Dan l-iżvilupp, li jkopri daqs għaxra fil-mija tal-konċessjoni ta’ Manoel Island, ma huwiex dak li ilu mwiegħed lill-Gżirjani. U lanqas ma huwa kompatibbli mal-viżjoni mwiegħda ripetutament lill-kważi 30,000 firmatarju tal-petizzjoni li qed jitolbu biex Manoel Island issir park nazzjonali, jew mat-tħassib imqajjem mill-186 persuna li oġġezzjonaw għall-applikazzjoni ta’ sanzjonar quddiem il-PA.

🌳 Huwa wkoll diżappuntanti ħafna li din ir-rakkomandazzjoni qed iddgħajjef il-ħidma li qed issir minn Project Green taħt it-tmexxija tal-Ministru Miriam Dalli sabiex titwettaq viżjoni ħolistika għal Manoel Island bħala spazju pubbliku aħdar. Fil-fatt, huwa sinifikanti li proprju l-jum ta’ qabel ma Project Green iċċelebrat il-konklużjoni tal-konsultazzjoni pubblika dwar il-viżjoni għall-park ta’ Manoel Island, il-case officer tal-Awtorità tal-Ippjanar irrakkomanda l-approvazzjoni ta’ din l-illegalità.

In-nuqqas kontinwu tal-Prim Ministru li jieħu pożizzjoni ċara qed idgħajjef ix-xogħol ta’ awtorità oħra tal-Gvern.

📣 Insejħu lill-Prim Ministru, ministri u awtoritajiet konċernati sabiex jiddikjaraw fejn verament jinsabu l-lealtajiet tagħhom. Is-sena l-oħra, il-Prim Ministru għeleb obbligi kuntrattwali eżistenti ma’ MIDI plc sabiex iħares il-viżjoni ta’ Manoel Island bħala park nazzjonali għall-benesseri tal-poplu. Dan għamlu fl-interess nazzjonali.

Issa se jċedi għall-interessi privati ta’ Sharlon Pace?

Read in English in the comments below.

08/05/2026

🔴 Manoel Island tal-poplu, mhux ta Sharlon Pace!

Manoel Island ġiet imwiegħda bħala park nazzjonali mill-Gvern, wara l-kampanja Manoel Island: Post Għalina u petizzjoni parlamentari appoġġjata minn kważi 30,000 resident u numru kbir ta’ organizzazzjonijiet. Din il-viżjoni għandha titwettaq permezz ta’ proċess olistiku mmexxi mill-komunità, u wara li tingħalaq il-konsultazzjoni pubblika li bħalissa għadha għaddejja.

⚠️ Madankollu, din il-viżjoni qed tiġi mminata. L-applikazzjoni PA/07995/25, sottomessa mill-President ta’ Gżira United, Sharlon Pace, tipproponi s-sanzjonar ta’ padel courts li diġà nbnew illegalment fuq Manoel Island.

Il-Prim Ministru Robert Abela ddikjara b’mod ċar li din l-art tifforma parti mill-emfitewsi oriġinali. Madankollu, Sharlon Pace qed isostni mod ieħor, u b’hekk qed jikkontradixxi direttament il-pożizzjoni tal-Gvern.

🎾 Dawn ix-xogħlijiet illegali ġew żvelati biss wara reazzjoni qawwija mill-pubbliku. Minflok ma ġew imreġġgħa lura immedjatament, is-sitwazzjoni waslet għal stadju fejn dawn ix-xogħlijiet issa qed jiġu kkunsidrati għas-sanzjonar. Dak li kellu jkun proċess normali ta’ applikazzjoni diġà ġie kompromess billi l-iżvilupp illegali qed jiġi aċċettat bħala punt tat-tluq.

Se jiġu lleġittimizzati dawn ix-xogħlijiet, għad-detriment tal-viżjoni ta’ park nazzjonali mwiegħed lill-pubbliku❓

🤷 Il-mistoqsija l-aktar importanti, madankollu, hija: min verament qed jaġixxi fl-interess tal-komunità tal-Gżira? Ir-residenti kienu mwiegħda pitch tal-futbol sa mill-emfitewsi oriġinali tal-MIDI fl-2000, iżda minflok qed jinbnew courts tal-padel. Ix-xogħlijiet bdew illegalment, mingħajr konsultazzjoni, u issa jinsabu f’riskju li jiġu approvati wara li diġà saru.

Nitolbu lin-nies ta’ Gżira biex jirriflettu:

Huma dawn it-tip ta’ deċiżjonijiet li jirrappreżentaw lill-komunità u l-bżonnijiet tagħha❓

🗣️ Inħeġġu lill-pubbliku biex isemma’ leħnu sal-4 ta’ Mejju, qabel ma tittieħed deċiżjoni dwar din l-applikazzjoni, billi jissottometti r-rappreżentazzjonijiet tiegħu fuq [email protected], u jikkwota PA/07995/25.

Fl-istess waqt, insejħu lill-Awtorità tal-Ippjanar u lill-Gvern biex jinfurzaw il-liġi u jreġġgħu lura dawn ix-xogħlijiet, minflok iħalluhom joħolqu preċedent dannuż li se jifforma l-punt tat-tluq tal-futur ta’ Manoel Island — sakemm jiġi stabbilit masterplan xieraq u mmexxi mill-komunità.

Read in English in the comments below.

08/05/2026

🚨 Ftit jiem biss wara li l-Gvern iċċelebra r-ritorn ta’ Manoel Island mingħand il-MIDI għal għand il-pubbliku, l-Awtorità tal-Ippjanar irrakkomandat l-approvazzjoni tas-sanzjonar ta’ 20 court tal-padel mibnija illegalment fuq Manoel Island u ż-żieda ta’ għaxra oħra fuq żona ta’ fdalijiet arkeoloġiċi ta’ valur.

Din ir-rakkomandazzjoni, ippubblikata b’mod suspettuż fi żmien rekord — jumejn biss wara li għalaq il-perjodu għall-oġġezzjonijiet pubbliċi b’186 oġġezzjoni — tmur kontra l-viżjoni mwiegħda mill-Gvern għal Manoel Island bħala park.

🚧 Il-padel courts qed jiġu żviluppati min-negozjant Sharlon Pace, li huwa l-president tal-klabb tal-futbol tal-Gżira iżda li ammetta li għandu interess kummerċjali personali fil-promozzjoni tal-padel courts, u b’hekk qed jitbiegħed mir-responsabbiltà tiegħu lejn il-komunità tal-futbol tal-lokalità.

Filwaqt li l-kampanja Manoel Island: Post Għalina dejjem sostniet li tappoġġja lill-komunità tal-futbol tal-Gżira biex tingħata spazju xieraq għall-attivitajiet tagħha, dan xorta għandu jsir fi ħdan qafas ġenerali għal Manoel Island. Kumpless tal-padel għall-profitt mhuwiex l-grawnd tal-futbol li l-komunità tal-Gżira ilha titlob, u lanqas ma huwa kompatibbli mal-viżjoni ta’ Manoel Island bħala park.

⚠️ L-imġiba tal-Awtorità tal-Ippjanar hija kemm tal-mistħija kif ukoll imbarazzanti għall-Gvern, hekk kif ir-rapport tal-case officer ġie ppreżentat fl-istess ħin li Project Green qed jiċċelebra l-konklużjoni tal-konsultazzjoni pubblika tiegħu dwar il-futur ta’ tliet parks pubbliċi ġodda, inkluż Manoel Island.

Kemm din il-konsultazzjoni kif ukoll dik tagħna wrew b’mod ċar ix-xewqa tal-pubbliku għal park li jirrappreżenta spazju mhux kummerċjali mibni fuq viżjoni ħolistika. Se jkunu l-Ministru għall-Ippjanar Clint Camilleri, il-Ministru għall-Artijiet Owen Bonnici, u l-Kap Eżekuttiv tal-PA Johann Buttigieg li se jdgħajfu din il-viżjoni?

📝 L-eżerċizzji ta’ konsultazzjoni pubblika huma farsa jekk ħbieb tal-ħbieb jitħallew jingħataw konċessjonijiet għad-detriment tal-pubbliku. Pace mistenni jħallas biss is-somma redikola ta’ €900 talli kesa bil-konkos parti mill-wirt kulturali tagħna — kemm figurattivament kif ukoll litteralment!

Numru ta’ fdalijiet arkeoloġiċi li jmorru lura għall-perjodu klassiku huma dokumentati fiż-żona li Pace kesa bil-courts tal-padel illegali. Dawn huma fost l-eqdem evidenza ta’ attività umana fiż-żona. Minkejja li kienet konxja sew tax-xogħlijiet li saru illegalment u bi ksur sħiħ tal-protokoll, is-Sovrintendenza tal-Wirt Kulturali ma tidhirx li għandha xi tħassib dwar ir-rapport tal-case officer, fejn sempliċement tgħid li aktar xogħlijiet għandhom ikunu suġġetti għal monitoraġġ arkeoloġiku.

📣 Il-Prim Ministru Robert Abela kien stqarr li l-viżjoni tal-Gvern għal Manoel Island hija bħal dik tal-kampanja Manoel Island: Post Għalina, il-komunità ta’ organizzazzjonijiet ambjentali u soċjali, u kważi 30,000 firmatarju tal-petizzjoni li tirrappreżenta. Madankollu, l-azzjonijiet tal-awtoritajiet jidhru li qed idoqqu nota differenti.

Nappellaw lill-Prim Ministru u lill-Ministru għall-Ippjanar Clint Camilleri biex jieħdu l-passi meħtieġa sabiex jirranġaw il-ħsara li qed issir lis-sit u lir-reputazzjoni tal-Gvern stess fir-rigward tal-wegħda tiegħu li jagħti park lin-nies.

Read in English in the comments below.

07/05/2026

Ilbieraħ, il-PA irrakkomandat li padel courts privati, mibnija illegalment minn Sharlon Pace (negozjant involut fin-negozju tal-padel) fuq fdalijiet arkeoloġiċi f'Manoel Island, jingħataw permess bi ħlas ta' €900.

Illum, il-Gvern tenna l-wegħda tiegħu għal Manoel Island bħala park nazzjonali.

⚠️ Il-Ministru Clint Camilleri, u l-kap tal-PA, Johann Buttigieg, se jfottu dan il-pjan?

Isimgħu l-intervent tagħna.

Moviment Graffitti | FAA Flimkien għal Ambjent Aħjar | Manoel Island: Post Għalina

16/04/2026

👀 Min verament qed jaġixxi fl-interess tal-komunità tal-Gżira?

🥅 Ir-residenti kienu mwiegħda pitch tal-futbol sa mill-emfitewsi oriġinali tal-MIDI fl-2000, iżda minflok qed jinbnew courts tal-padel. Ix-xogħlijiet bdew illegalment, mingħajr konsultazzjoni, u issa jinsabu f’riskju li jiġu approvati wara li diġà saru.

❓Nitolbu lin-nies tal-Gżira biex jirriflettu:
Dan hu t-tip ta’ deċiżjonijiet li jirrappreżentaw lill-komunità u l-bżonnijiet tagħha?

😒 Proprju hekk kif Manoel Island tinsab fil-proċess li tintradd lura lill-pubbliku mingħand il-MIDI, il-ħolma ta’ park nazzjonali qed tiġi mhedda minn interessi kummerċjali oħra.

🌳 Minkejja li l-Prim Ministru Robert Abela sostna li l-futur ta’ Manoel Island għandu jitqies b’mod olistiku, it-tentattiv biex jiġi sanzjonat żvilupp illegali ta’ kumpless tal-padel minn Sharlon Pace qed idgħajjef kemm l-awtorità tal-Gvern fuq il-gżira kif ukoll l-opportunità għal park li jaqdi l-bżonnijiet tal-maġġoranza, mhux tal-ftit.

❗ Dan il-każ huwa eżempju ċar ta’ proċess ta’ infurzar dgħajjef, fejn l-iżviluppaturi qed jiġu effettivament imħeġġa jibnu illegalment.

👉 Din is-sitwazzjoni, però, tmur oltre mill-problemi fil-proċess tal-ippjanar f’Malta.

👀 Il-manuvra ta’ Sharlon Pace hija ċarament intenzjonata sabiex jitfa’ pressjoni fuq il-Gvern sabiex jitħalla jagħmel li jrid.

✋ Il-Prim Ministru kien ċar: dik l-art tappartjeni lill-Istat.

🤔 Se jkun Sharlon Pace li jiddetta lill-Gvern kif se tintuża?

⚽ Hawnhekk intennu l-appoġġ sħiħ tagħna sabiex il-Gżira United Football Club ikollu l-faċilitajiet tiegħu fil-Gżira. Madankollu, dawn għandhom jiffurmaw parti mill-masterplan usa’ ta’ Manoel Island, u mhux jinbnew mingħajr permess qabel ma l-Gvern ikun saħansitra ħa lura s-sit.

🌱 Il-Gvern għandu jagħmilha ċara li m’huwa ser iħalli l-ebda interess kummerċjali jhedded l-awtorità li ll-Gvern kiseb fuq Manoel Island f’isem il-poplu. Għandu wkoll jagħmilha ċara li kull żvilupp ser ikun konformi mal-viżjoni għall-gżira.

🖋 Sadanittant, inħeġġu lill-pubbliku sabiex isemma’ leħnu qabel ma tittieħed deċiżjoni dwar din l-applikazzjoni, billi jibgħat l-oġġezzjonijiet tiegħu fuq [email protected] u jikkwota PA/07995/25.

17/03/2026

💚 Il-kampanja tilqa’ l-aħbar li ħabbar il-Prim Ministru lbieraħ li l-Gvern u l-MIDI laħqu ftehim biex Manoel Island, kif ukoll il-Forti Tignè, jingħataw lura lill-poplu.

📅 Din l-aħbar pożittiva ġiet ftit inqas minn sena mit-tnedija tal-kampanja Manoel Island: Post Għalina. Il-kampanja dejjem saħqet li l-Gvern u l-MIDI għandhom jinnegozjaw mill-ġdid l-enfitewsi li permezz tagħha Manoel Island u Tignè ngħataw lill-MIDI biex jiġu żviluppati f’kumplessi residenzjali, turistiċi u kummerċjali.

🤝 Infaħħru kemm lill-Gvern kif ukoll lill-MIDI talli sabu soluzzjoni rapida u diplomatika, li tevita dewmien bla bżonn fl-impenn tal-Gvern li jrodd lura Manoel Island lill-pubbliku bħala park nazzjonali. Konna fil-fatt iddikjarajna li r-rimborż tal-investimenti tal-MIDI biex Manoel Island terġa’ tingħata lill-pubbliku ma kellux jiswa lill-pajjiż mijiet ta’ miljuni.

🌼 Il-kampanja se tibqa’ attiva biex tikseb l-għan tagħha li tara lil Manoel Island trasformata f’park pubbliku fejn il-komunità tista’ tgawdi l-ambjent storiku u naturali tal-gżira.

🛑 Ninsabu sodisfatti wkoll li l-Awtorità tal-Ippjanar waqqfet uffiċjalment l-iżvilupp illegali ta’ padel courts fiż-żona tal-eks grawnd tal-futbol tal-Gżira FC wara t-tħassib tal-pubbliku. Aħna determinati li kwalunkwe xogħol illegali jiġi rrevokat sabiex deċiżjonijiet dwar l-użu tal-art fuq il-gżira jittieħdu b'mod olistiku bħala parti minn masterplan għall-park nazzjonali. Qed insegwu l-eżerċizzji ta' konsultazzjoni pubblika ta' Project Green biex nippromwovu l-valuri li l-kampanja tagħna żviluppat permezz tal-għarfien espert u d-diskussjoni pubblika.

✊ Il-kampanja Manoel Island: Post Għalina hija xhieda tal-qawwa tan-nies meta ningħaqdu biex flimkien niksbu għan komuni. Nerġgħu nieħdu din l-opportunità biex nifirħu lil dawk kollha li għamlu din il-kampanja tagħhom.

10/03/2026

❗️ Le għal żvilupp illegali fuq Manoel Island ❗️

🔴 Il-kampanja Manoel Island: Post Għalina tinsab imħassba dwar l-azzjonijiet li qed jittieħdu minn Gżira United Football Club biex jiżviluppa diversi courts tal-padel mingħajr permess. Attivitajiet bħal dawn, li effettivament jikkostitwixxu żvilupp illegali fuq sit li reċentement ġie ddikkjarat bħala park nazzjonali ġdid u integrat fil-Malta Vision 2050, għandhom jieqfu immedjatament.

⚽ Manoel Island: Post Għalina temmen li l-isport u l-attività fiżika għandhom ikunu parti integrali mill-futur ta’ Manoel Island bħala park nazzjonali, kif saħansitra kienu għal ġenerazzjonijiet sħaħ. Wieħed mill-valuri ewlenin li ħarġu minn sensiela ta’ ħames workshops biex jiġi diskuss park bħal dan kien li għandu jkun spazju fejn jiġu ċċelebrati s-saħħa u l-benesseri.

🤝 Għalhekk, nappoġġjaw bis-sħiħ il-ħtieġa li Gżira United Football Club jkollu grawnd tal-futbol fuq il-gżira, u nilqgħu l-isforzi tiegħu biex jinkoraġġixxi aktar parteċipazzjoni tal-komunità fl-isport. Dawn l-isforzi huma kontribuzzjoni importanti għall-viżjoni fit-tul għal Manoel Island.

💬 Il-kampanja Manoel Island: Post Għalina ippruvat ripetutament tidħol f’djalogu ma’ Gżira United matul l-aħħar 12-il xahar — matul il-kampanja tal-petizzjoni biex Manoel Island issir park nazzjonali, matul is-sensiela ta’ workshops, u anke l-ġimgħa li għaddiet meta ġejna nfurmati li qed jinbnew courts tal-padel mingħajr permess. Dawn it-tentattivi ma rnexxewx.

🗣 Aħna nemmnu bis-sħiħ li l-interessi ta’ Gżira United Football Club jinqdew l-aħjar permezz tal-parteċipazzjoni sħiħa u attiva tiegħu fil-proċess ta’ konsultazzjoni pubblika li għaddejja bħalissa mill-Gvern. Parteċipazzjoni ġenwina bħal din twassal għal riżultati li jkunu ta’ benefiċċju kemm għall-klabb kif ukoll għall-komunità in ġenerali.

🚫 L-iżvilupp ta’ kumpless ta’ courts tal-padel mingħajr permess, min-naħa l-oħra, imur kontra l-ispirtu ta’ kollaborazzjoni ġenwina li s’issa kkaratterizza l-isforz nazzjonali biex Manoel Island tinbidel f’park nazzjonali.

💡 Filwaqt li nirrikonoxxu l-pussess attwali u d-dritt ta’ użu ta’ Gżira United Football Club fuq in-Nicholl Ground, ċerti stqarrijiet li għamel il-klabb jeħtieġu kjarifika. In-Nicholl Ground — effettivament iż-żona ta’ daqs grawnd tal-futbol wara r-ristorant li bħalissa jopera eżatt wara l-pont ta’ Manoel Island — hija inkluża fil-pjanijiet biex Manoel Island issir park. In-Nicholl Ground kienet inkluża fil-konċessjoni mogħtija lil MIDI, bil-ftehim li Gżira United Football Club iżomm il-pussess tagħha sakemm jiġi pprovdut grawnd alternattiv.

📌 Il-post eżatt ta’ dan il-grawnd qatt ma ġie stabbilit b’mod definittiv. Fil-fatt, il-masterplan ta’ MIDI għal Manoel Island, li kien jinvolvi l-bini ta’ mijiet ta’ appartamenti lussużi u stabbilimenti kummerċjali, ippropona li l-grawnd tal-futbol jiġi rilokat fix-xatt tat-tramuntana ta’ Manoel Island, faċċata tas-Sliema Ferries.

✅ Il-kampanja Manoel Island: Post Għalina għalhekk qed tiċċara li l-art li fuqha Gżira United bħalissa qed jiżviluppa courts tal-padel bl-ebda mod ma tista’ “tinftiehem separatament minn proposti usa’ li jikkonċernaw partijiet oħra ta’ Manoel Island,” kif qed jiddikjara l-klabb.

🚨 Dikjarazzjonijiet bħal dawn huma perikolużi. Jiftħu l-bieb għal approċċ frammentat, immexxi minn interessi privati, għal dak li għandu jkun sforz nazzjonali ġenwin li jservi bħala dikjarazzjoni ta’ intenzjoni għall-futur ta’ Malta. Jimminaw il-leħen tal-eluf ta’ nies li talbu biex Manoel Island issir park nazzjonali protett minn valuri ewlenin ibbażati fuq identità mhux kummerċjali. Jisfidaw ukoll l-isforzi tal-Gvern stess biex iwettaq konsultazzjoni pubblika wiesgħa.

😨 Għalhekk huwa ta’ diżappunt li Gżira United Football Club għażel li jaġixxi waħdu, billi jferra’ l-konkos u jpoġġi strutturi sabiex isegwi interessi kummerċjali tiegħu, f’oppożizzjoni għal kunsens nazzjonali fejn diversi gruppi, residenti u aktar minn 29,000 persuna qed jappoġġjaw l-għan iddikjarat tal-Gvern li kull bidla fuq Manoel Island għandha toħroġ minn masterplan koerenti u mibni fuq il-bżonnijiet u t-talbiet tal-komunitajiet u l-poplu.

❌ Dan huwa wkoll illegali. Il-kampanja Manoel Island: Post Għalina topponi b’mod qawwi kwalunkwe żvilupp li mhux kopert minn permess validu. L-unika applikazzjoni għall-iżvilupp li bħalissa hija attiva fuq is-sit għadha lanqas biss ġiet sottomessa kompletament, aħseb u ara approvata.

✍️ Għalhekk ressaqna ilment uffiċjali mad-Direttorat tal-Konformità u l-Infurzar fl-Awtorità tal-Ippjanar, u se nkomplu nsegwu l-każ biex niżguraw li l-liġi tiġi osservata.

05/03/2026

😨Qed nirċievu rapporti inkwetanti dwar żvilupp ta’ mill-inqas sitt courts tal-padel ġodda fuq Manoel Island, eżatt ħdejn il-courts tal-padel li diġà qed joperaw ftit wara d-daħla. Dan l-iżvilupp ma jidhirx li huwa konformi ma’ xi permess approvat mill-Awtorità tal-Ippjanar (PA). Sal-lum, l-uniku permess tal-PA disponibbli pubblikament li jsemmi l-kostruzzjoni ta’ courts tal-padel kien tressaq minn MIDI PLC fl-2023, u ma ġiex approvat.

🌳Lil hinn mill-kwistjoni fundamentali li ebda żvilupp m’għandu jseħħ mingħajr il-permessi meħtieġa, irridu wkoll niftakru li Manoel Island kienet imwiegħda lill-pubbliku bħala Park Nazzjonali. Il-gżira ta’ Manoel Island bħalissa tinsab taħt konsultazzjoni pubblika proprju sabiex residenti, NGOs, esperti u l-pubbliku jkunu jistgħu jissottomettu l-fehmiet tagħhom dwar kif għandu jkun dan il-park. Li jitħallew jinbnew faċilitajiet ġodda waqt li dan il-proċess għadu għaddej jhedded kemm l-ispirtu kif ukoll l-integrità ta’ din il-konsultazzjoni.

⚽ Filwaqt li l-workshops komunitarji tagħna għarfu l-importanza tal-isport, tal-fitness u tar-rikreazzjoni attiva fil-park futur, dejjem kien ċar li kull faċilità għandha tifforma parti minn masterplan olistiku u trasparenti. Dawn m’għandhomx jitfaċċaw permezz ta’ interventi frammentati li jippreġudikaw ir-riżultat tal-konsultazzjoni pubblika. Aħna mħassba li t-tkabbir ta’ infrastruttura sportiva privata f’dan l-istadju jista’ jkabbar il-firxa tal-attivitajiet kummerċjali eżistenti, u potenzjalment jagħmilha aktar diffiċli sabiex il-Gvern jinforza jew jirrevedi l-pjanijiet skont l-interess pubbliku ladarba jintemm il-proċess tal-konsultazzjoni.

🛑 Inħeġġu lill-awtoritajiet kompetenti sabiex jinvestigaw immedjatament dawn ix-xogħlijiet u jwaqqfu u jreġġgħu lura kull żvilupp li qed isir mingħajr permess. Barra minn hekk, l-ipproċessar ta’ applikazzjonijiet ġodda ta’ ppjanar għandu jiġi sospiż sakemm jiġi adottat formalment masterplan komprensiv li jirrifletti l-valuri u l-viżjoni espressi mill-komunità. Manoel Island tappartjeni lill-pubbliku, u d-deċiżjonijiet dwar il-futur tagħha għandhom jirrispettaw kemm il-liġi kif ukoll il-proċess demokratiku.

24/02/2026

✨ Our vision is for a park with a non-commercial identity, a serene place to reset from the urban frenzy and communal custody to safeguard the site’s ambience and heritage.

❓ Why all the fuss about supporting this specific vision?

‼️ Within the EU, Malta holds the highest population density and the highest percentage of built-up areas by a very wide margin. Malta has the lowest tree cover, the highest obesity prevalence, a marked recent increase in mental and respiratory illness and thus a desperate need for public green spaces.

🌳 Manoel Island is the last green area in Malta’s most densely populated zone and yet it is segregated enough to provide ample tranquillity. A place that offers a genuine respite from our urban lifestyles.

🏊 The activities performed here are truly varied, spanning recreational and creative, swimmers fighting the cold winters in the sheltered harbour, yoga practitioners absorbed in meditation, painters capturing the moment and musicians in search of a muse, just to name a few.

👨‍👩‍👧‍👧 The location comprises of an extremely rare car-free and safe area that provides the right setting and freedom for kids to be kids. Whereby childhoods are filled to the brim with countless outstanding adventures in the company of true friends.

😇 Most importantly, parks are essential for enhancing our urban lives. Here, we need to take a step back and evaluate our quality of life. A good life is a meaningful one. Rinsing out the grandiose fortunes and prestige, all the shallow and pretend, we are left with savouring the simple pleasures of life.

🖋️ Kenneth Busuttil Griffin

Full article in the comments.

Manoel Island: Post Għalina

14/05/2026

10/05/2026

08/05/2026

08/05/2026

07/05/2026

16/04/2026

17/03/2026

10/03/2026

05/03/2026

24/02/2026

Address

Website

Alerts

Contact The Organisation

Shortcuts

Share

Category