Ateibo Centro Xuvenil

Casa
España
Lugo
Ateibo Centro Xuvenil

Un lugar de encontro e participación para infancia e mocidade en Lugo

04/09/2026

❤️👣 CAMPOBOSCO 2026 👣❤️

Vai preto dun mes, sete de nós, acompañados por tres persoas moi especiais, adentrámonos nunha experiencia única que, sen dúbida, marcou un antes e un despois nas nosas vidas.

Seguimos as pegadas de Don Bosco por Barcelona e Turín, coñecendo de preto a súa historia e o seu legado, pero tamén achegándonos un pouco máis a el, a Deus e, sobre todo, a nós mesmos.

A nosa primeira gran parada foi Barcelona: unha primeira toma de contacto coa salesianidade, cargada de ilusión, esperanza e moitas emocións. Alí comezaron os grupos, os nervios, as andainas… pero tamén as reflexións, a introspección e o reto de coñecernos a nós mesmos e de abrirnos a Deus.

Despois continuamos a nosa viaxe ata o Colle Don Bosco, nun pequeno recuncho de I Becchi. Co son das campás, comezou o que sería o noso verdadeiro reto: coñecer, recoñecer e conectar.

Visitamos lugares de gran importancia salesiana como Chieri, Castelnuovo e Morialdo, ademais de Turín e, especialmente, Valdocco, alí puidemos descubrir a Basílica de María Auxiliadora e achegarnos ao lugar onde descansan Don Bosco e Domingo Savio.

Pero esta peregrinaxe foi moito máis ca unha viaxe. Foi un reto. Un reto diferente para cada un de nós, porque cada persoa chegou cunha mochila distinta: cargada de vivencias, medos, dúbidas, ilusións e esperanzas. E, pouco a pouco, ao longo do camiño, fomos aprendendo a abrila, a desfacernos dalgunhas cousas, a deixar outras atrás e a enchela de novas experiencias.

Porque seguimos as pegadas de Don Bosco… pero tamén fomos deixando as nosas propias pegadas no camiño.

14/08/2026

🏨💚 Así foi o campamento dos ADS 💚🏨

O Hotel Cinco Estrelas e unha Lúa comezou a súa andaina coa chegada dos ponentes e congresistas ao Hotel, situado en Castrelo, Cambados. Alí, cada un deles recibiu candasúa acreditación que lles permitiría asistir ás diferentes ponencias, talleres e actividades lúdicas que ofrecía o hotel para esta especial ocasión.

Ademais, debemos ter en conta a importancia da fe na estancia do Hotel Cinco Estrelas e unha Lúa. Os congresistas a través das ponencias, puideron abrir a súa mirada e os seus corazóns á fe en diferentes ámbitos da vida cotiá.

E... como esquecer que puideron estrear a piscina do hotel!

É así como, despois dunha estancia breve e efímera, o pouso da fe e do esforzo dos ponentes fixo que agrome, pouco a pouco, unha pequena semente de esperanza e ilusión na mocidade.

O Hotel Cinco Estrelas e unha Lúa quere agradecerlle fondamente ás familias e ao equipo animador por facer da estancia un paraíso onde os soños, ás veces, si se cumplen.

31/07/2026

🥼🧡 Así foi o campamento dos saltimbanquis 🧡🥼

O Laboratorio de Teresa mantén o recordo vivo tras completar, hai xa case un mes, unha das súas edicións máis memorables. Durante eses días, os nosos nenos e nenas Saltimbanquis viviron unha auténtica aventura de aprendizaxe, convivencia e crecemento persoal.

A misión non estivo exenta de retos. Tras unha inesperada explosión no reactor principal e a misteriosa desaparición da nosa científica favorita, Teresa, os pequenos participantes tiveron que activar todo o seu enxeño. A través dunha completa Feira de Ciencias, obradoiros de experimentación, xogos de auga, momentos de piscina e probas de equipo, os diferentes grupos foron recollendo os reactivos necesarios para solucionar a anomalía.

Máis aló da diversión e do xogo, este campamento volveu ser un espazo fundamental de educación en valores, onde a amizade, o traballo en equipo, a empatía e a vivencia da fe foron os auténticos fíos condutores. Cada momento de reflexión e cada “tempo na corda” serviron para fortalecer a identidade e a espiritualidade dos nosos Saltimbanquis.

O gran desenlace chegou co experimento final: logramos reparar a máquina, recuperar a Teresa e celebrar o éxito colectivamente. Ademais, esta edición pasará á historia por un feito moi especial: tras 11 anos de traxectoria, Saltimbanquis estreou por fin o seu himno oficial, unha banda sonora que xa forma parte dos nosos mellores recordos.

Gobernados pola satisfacción do traballo ben feito e co orgullo de ver medrar a esta gran familia, gardamos na memoria esta gran experiencia. Grazas de corazón a todas as familias pola confianza depositada no noso equipo animador.

Misión completada con éxito. Vémonos no vindeiro campamento! 🧡

03/07/2026

🧡 Así foi o curso dos Saltimbanquis 🧡

O curso comezou cunha misión, chegar a Italia e coñecer a Juanito Bosco e as persoas importantes da súa vida. Para conseguilo, os Saltimbanquis construíron un avión peza a peza. Cada venres era un reto que tiña como recompensa unha parte crucial do avión para poder voar.

Cando o avión estivo listo, a tripulación tivo que estudar e practicar o seu funcionamento, vivindo un trimestre de ensaio e erro que lles serviu para aprender e visitar o mundo enteiro.

Ao final do curso, coa tripulación preparada e o avión a punto, viaxaron cada venres a Italia para cumprir por fin o seu obxectivo inicial, coñecendo lugares e persoas importantes na vida do seu amigo Juanito Bosco.

Gracias por compartir connosco este curso. Vémonos o curso que vén!🧡

21/06/2026

🌸❤️ IEF XUVENIL EN MAIO ❤️🌸

1, os grupos de adolescentes, xuventude e cate recibiron unha charla da man da policía nacional. Falouse sobre malos hábitos e adiccións nun ambiente próximo, dinámico e participativo, no que os rapaces e rapazas aprenderon un montón.

2 á 7, como actividade final, o IEF Xuvenil viviu un gran xogo conxunto: o Boscopoly. Un monopoly polas rúas do centro de Lugo no que puideron “mercar” lugares emblemáticos da cidade, superar probas para gañar cartos e evitar que os demais grupos os cachasen. Unha tarde chea de diversión e compañeirismo.

12/06/2026

🌸💚 ADS EN MAIO 💚🌸

1 á 3, os ADS xuntáronse cos maiores de andaina para presentarlles quen é Domingo Savio e o que vivirán o ano que vén. Fixeron un scape room no que foron atopando os símbolos dos ADS, a pañoleta, o pasador e os anacos de himno, mentres descubrían os seus valores.

4 e 5, os ADS fixeron chaveiros de bola, pedras divertidas, pulseiras de abalorios e pompóns para vender no Día das Familias. No Tempo de Paz fixeron unha dinámica cooperativa na que dúas persoas tiñan que desprazarse enriba dun único papel sen rompelo nin saírse del, para reflexionar sobre o traballo en equipo, o ben común e non deixar a ninguén atrás.

6 á 10, os ADS celebraron o último día ordinario cunha tarde de xogos cooperativos, sincronización de aplausos, campo minado e catro en raia con carreiras, para reforzar a unión do grupo e pechar o curso con alegría. No Tempo de Paz escribiron e compartiron tres lembranzas ou momentos significativos do ano.

08/06/2026

✨FIN DO IEF INFANTIL✨

Esta fin de semana quixemos pechar as actividades do IEF Infantil dun xeito moi especial: cunha Festa dos Símbolos chea de emoción e unha acampada final que nos deixou momentos inesquecibles.

1 á 4, despedímonos do curso coa entrega de símbolos aos saltimbanquis, andaina e ADS. Cada ano recibiu o seu: chapas, chaveiros, pulseiras, pelotas, gnomos, estrelas e pasadores. E despedimos con moito agarimo aos que cambian de movemento.

Do 5 ao 7, despois da festa puxemos rumbo á Área Recreativa de San Xoán, en Guitiriz. Alí montamos as tendas, exploramos os arredores, ceamos xuntos e, antes de durmir, xogamos un Rommel & Montgomery que puxo a todos en modo aventura.

Pola mañá, xa cargados de enerxía, comezamos unha serie de probas para atopar a pota que o Leprechaunt nos tiña agochada. Dentro agardaban moedas de chocolate e unhas chapas especiais da acampada. Rematamos cunha celebración e cunha paella deliciosa que Pepelu preparou con todo o cariño.

Un peche perfecto para un curso cheo de descubrimentos, símbolos, xogos, risas e vida compartida.

05/06/2026

🌸💛ANDAINA EN MAIO 💛🌸

1 e 2, os andaina viaxaron a Hawai cos saltimbanquis de terceiro, onde descubriron xogos tradicionais da illa e responderon preguntas sobre a súa cultura. Despois, por equipos crearon máscaras tiki e pecharon cun tempo de paz para compartir sensacións e presentar quen é o grupo Andaina aos saltimbanquis.

3, os andaina foron ata Brasil para vivir o espírito do Carnaval de Río, visitando os seus monumentos máis emblemáticos e colaborando na organización da festa creando instrumentos, traxes e practicando xogos musicais. Remataron cun pequeno desfile polas instalacións antes do tempo de paz, onde reflexionaron sobre a creatividade, a valentía e o sentido de celebrar en comunidade.

4 e 5, finalmente os andaina viaxaron a Madrid para pechar a aventura do curso, onde prepararon unha tortilla, xogaron ao Furor con cancións españolas e correron na plaza de touros escapando do touro. Remataron na Almudena cun tempo de paz para lembrar todos os destinos do ano e despedir aos que comezan nova etapa.

03/06/2026

⛱️ Volven as Colonias Urbanas ⛱️

Un verán cheo de diversión, xogos, talleres e moitas aventuras para nenos e nenas de 3 a 12 anos.

Datas:
• 06 ao 10 de xullo
• 13 ao 17 de xullo
• 20 ao 24 de xullo

Horario: de 10:00 a 14:00 h
Acollida: de 09:00 a 10:00 h
Servizo de comedor: de 14:00 a 15:00 h

Prazas limitadas!

Inscricións a través do QR

Anímate a vir!

02/06/2026

🍗 Remata o IEF XUVENIL🍗

En Ateibo gústanos rematar por todo o alto, así que o vindeiro 12 de xuño os grupos de Adolescentes, Xuventude e Cate teremos unha churrascada.

Teredes que levar a vosa carne para facer na parrilla, nós encargámonos do demais.

Comezaremos cunha eucaristía ás 19:30 para logo encher o bandullo.

Non faltedes!

Dirección

Plaza De La Milagrosa 10
Lugo
27003

Página web

http://www.ateibo.salesianoslugo.es/

Notificaciones

Sé el primero en enterarse y déjanos enviarle un correo electrónico cuando Ateibo Centro Xuvenil publique noticias y promociones. Su dirección de correo electrónico no se utilizará para ningún otro fin, y puede darse de baja en cualquier momento.