16/08/2026
Santa Comba precisa solucións, non simplemente pechar a piscina
A falta de auga obriga a pechar a única piscina municipal, pero os veciños reclaman explicacións sobre as medidas adoptadas nos últimos anos para garantir o abastecemento
A seca é unha realidade e aforrar auga é responsabilidade de todos. Iso non está en discusión.
O que si merece unha explicación é como un municipio como Santa Comba chega ao verán de 2026 tendo que pechar a súa única piscina pública por falta de auga, sen que os veciños coñezan unha alternativa inmediata que permita manter este servizo.
Nun municipio do interior, situado a uns 40 quilómetros do mar, a piscina municipal representa para moitos nenos e familias o único espazo público dispoñible durante o verán para bañarse, atoparse e g***r do tempo libre.
Ademais, a piscina non é só unha instalación deportiva. Tamén xera actividade económica e vida no municipio: as familias desprázanse, consumen nos establecementos locais e créase movemento nun concello do interior que necesita manter poboación e actividade.
Por iso sorprende que a resposta ante a situación sexa, simplemente, anunciar que este verán a piscina non abrirá.
Por suposto que hai que aforrar auga. Pero, despois de tres anos de mandato municipal, os veciños tamén poden formular unha pregunta: **que se fixo durante este tempo para garantir o abastecemento de auga de Santa Comba?**
E a cuestión cobra especial relevancia porque o problema non apareceu de repente.
O propio Concello dispoñía xa en 2022 dunha **Auditoría dos Abastecementos Municipais e dun Plan de Actuacións**. Segundo aquela auditoría, en 2021 captáronse 412.287 metros cúbicos de auga, dos cales 70.797 metros cúbicos figuraban como auga non rexistrada, o equivalente ao 16,76 %.
As deficiencias e necesidades do sistema de abastecemento, polo tanto, xa eran coñecidas antes do actual mandato.
Agora cómpre saber que medidas se adoptaron desde 2023: que actuacións do plan se executaron, que investimentos se realizaron para aumentar as reservas, que alternativas de captación se estudaron e se recuperaron ou actualizaron proxectos anteriores.
Tamén sería necesario coñecer se se estudou seriamente unha posible captación vinculada ao sistema hídrico do Xallas ou outras alternativas tecnicamente viables, así como que actuacións se solicitaron a Augas de Galicia e cales foron finalmente concedidas ou rexeitadas.
Estas son as explicacións que debería recibir a cidadanía.
Porque gobernar non consiste unicamente en xestionar unha emerxencia cando chega. Tamén significa anticiparse aos problemas.
Antes de privar todo un municipio da súa única piscina pública deberían terse estudado e explicado todas as alternativas posibles: restricións temporais, redución de consumos, optimización do enchido, reutilización cando sexa tecnicamente posible, aportes alternativos ou calquera outra medida compatible coas garantías sanitarias.
# # E a auga que bebemos?
Existe ademais unha cuestión aínda máis importante: a calidade da auga destinada ao consumo humano.
Os veciños teñen dereito a coñecer con claridade de onde procede a auga, como se trata, que controis se realizan, cales son os resultados das análises e que garantías existen sobre a súa calidade.
Non debería ser necesario agardar a unha situación de seca para falar do abastecemento.
Por iso sería desexable que o Concello publicase periodicamente, e de maneira comprensible para todos, os datos relativos ás análises, incidencias, consumos, reservas e situación de cada sistema de abastecemento.
A transparencia tamén forma parte da xestión da auga.
# # Cos residuos tamén queremos resultados
A mesma esixencia debería aplicarse á política de residuos.
Santa Comba dispón de recollida selectiva, punto limpo, compostaxe doméstica e contedor marrón. É positivo, pero agora cómpre coñecer os resultados.
Cantas toneladas de residuos xera Santa Comba cada ano? Canto acaba na fracción resto? Canto papel e cartón se recupera? E vidro? Cantos envases? Cantos biorresiduos?
E, sobre todo, cal é o porcentaxe real de reciclaxe do municipio e como evolucionou desde 2023?
Unha política medioambiental non se mide unicamente polo número de contedores instalados ou polas campañas realizadas. Mídese tamén polos resultados obtidos.
# # Unha cuestión de prioridades
Todo isto leva a unha reflexión máis ampla sobre as prioridades do Goberno municipal.
Despois de tres anos de mandato, é razoable que os veciños poidan preguntar que lugar ocuparon o abastecemento de auga, a súa calidade, o saneamento, a xestión dos residuos e os servizos públicos esenciais entre as prioridades municipais.
Santa Comba necesita investimentos que melloren a vida cotiá e preparen o municipio para os próximos vinte anos.
Necesita auga suficiente e de calidade. Unha política moderna de residuos e reciclaxe. Servizos públicos que se manteñan. E espazos nos que nenos, mozos e maiores poidan g***r do municipio.
Por iso, o debate non debería limitarse a preguntar se hai seca e se debemos aforrar auga.
**Por suposto que debemos facelo.**
A verdadeira cuestión é outra: **por que chegamos a esta situación sen dispoñer dunha alternativa suficiente?**
Pechar unha piscina pode facerse mediante unha decisión administrativa. Garantir o abastecemento de Santa Comba require planificación, investimentos, proxectos e anos de traballo.
E para iso, precisamente, están os gobernos municipais.
Os veciños teñen dereito a saber **que se fixo, que non se fixo e cal é o plan para evitar que esta situación volva repetirse o próximo verán.**
