18/05/2026
မနက်ဖြန်မနက်စောစော ကမ္ဘာနားကနေဖြတ်သန်းသွားမယ့် ဂြိုဟ်သိမ်
၂၀၂၆၊ မေလ ၁၉ ရက်နေ့ မြန်မာစံတော်ချိန် မနက် ၃:၅၃ မှာ 2026 JH2 ခေါ် ဂြိုဟ်သိမ်ဟာ ကမ္ဘာမြေကြီးနဲ့ အတော်ကို နီးနီးကပ်ကပ်ဖြတ်သန်းသွားမှာပဲ ဖြစ်ပါတယ်။ အဲ့ဒီ အဆောက်အဦးအရွယ် ဂြိုဟ်သိမ်ကြီးဟာ လထက် လေးဆခန့်ပိုမိုနီးကပ်လာမှာ ဖြစ်ပြီး အခြားသော နီးကပ်တယ်လို့ယူဆရတဲ့ ဂြိုဟ်သိမ်ဂြိုဟ်မွှားတွေထက်တောင် အဆမတန်နီးပါတယ်။ ဒီလိုမျိုး ပုံမှန်မဟုတ်တဲ့ ဂြိုဟ်သိမ်ကြီးက ကမ္ဘာပေါ် တကယ်ပဲ ကျရောက်နိုင်သလားကို ဒီဆောင်းပါးလေးထဲမှာ တင်ပြပေးသွားမှာပဲ ဖြစ်ပါတယ်။
၂၀၂၆၊ မေလ ၁၉ ရက်နေ့ မနက် ၃:၅၃ မှာ မကြာသေးခင်က တွေ့ရှိထားတဲ့ 2026 JH2 ခေါ် ဂြိုဟ်သိမ်ဟာ ကမ္ဘာမြေကြီးနဲ့ ကီလိုမီတာ ၉၀,၀၀၀ ခန့်အကွာအဝေးကနေ ဖြတ်သန်းသွားမှာ ဖြစ်ပါတယ်။ အာကာသ အတိုင်းအတာတွေအရပြောရင်တောင် ဒီအကွာအဝေးက အရမ်းပဲ နီးကပ်လွန်းပါတယ်။ ဒါပေမဲ့ ဂြိုဟ်သိမ်ဟာ ကမ္ဘာပေါ်ကျရောက်ဖို့ လုံးဝမဖြစ်နိုင်တာကြောင့် စိုးရိမ်စရာမလိုဘူးဟု နက္ခတ္တဗေဒပညာရှင်များက ဆိုပါတယ်။
2026 JH2 ဟာ ၁၅ ကနေ ၃၄ မီတာခန့် ကျယ်ဝန်းပြီး ၂၀၁၃ ခုနှစ်တုန်းက ရုရှားနိုင်ငံမှာ လေထုထဲမှာပဲ ပေါက်ကွဲသွားတဲ့ Chelyabinsk ဂြိုဟ်သိမ်ရဲ့ အရွယ်အစားလောက်ရှိတယ်ဟု သိရပါတယ်။ 2026 JH2 လို သေးငယ်တဲ့အရာဝတ္ထုတွေက ကြီးမားလွန်းပြီး မှောင်နက်နေတဲ့ အကာသထဲမှာ သေချာမမြင်ရတာကြောင့် 2026 JH2 ကို ကမ္ဘာနဲ့ အနီးဆုံးအချိန်မတိုင်မှီ တစ်ပတ်ကျော် မေလ ၁၀ ရက်နေ့မှသာ ပထမဦးဆုံး ရှာဖွေတွေ့ရှိခဲ့ခြင်း ဖြစ်ပါတယ်။
2026 JH2 ကို ညကောင်းကင်ပေါ်မှာ Ursa major နဲ့ Leo နက္ခတ်တာရာအစုအဝေးများ တစ်လျှောက် ဖြတ်သန်းသွားနေတာကိုမြင်ရမှာဖြစ်ပြီး ကမ္ဘာသို့ နီးကပ်လာတာနဲ့အမျှ အလင်းပမာဏ (Magnitude) ၁၁.၈ လောက်အထိ ပိုမိုတောက်ပလာနိုင်ပါတယ်။ သာမန်မျက်စိနဲ့ မမြင်နိုင်ပေမဲ့ အဝေးကြည့်မှန်ပြောင်းသုံးပြီး လေ့လာမယ်ဆိုရင်တော့ ကမ္ဘာကိုဖြတ်ပြီး ပျံသန်းသွားတာကို မြင်လိုက်ရနိုင်ပါတယ်။
2026 JH2 ကို အကြောင်းစစချင်းဖတ်မိရင် ကြောက်ဖို့ကောင်းအောင် သတင်းတွေက ရေးထားပေမယ့် တကယ်တော့ အန္တရာယ်မရှိတဲ့အပြင် နက္ခတ္တဗေဒပညာရှင်များအတွက် ဂြိုဟ်သိမ်တစ်ခု လက်တွေ့ဘဝမှာ နီးနီးကပ်ကပ်လေ့လာဖို့ အဖိုးတန်တဲ့ အခွင့်အရေးပဲဖြစ်ပါတယ်။
~ MASES / Hillary
Ref - https://starwalk.space/en/news/should-you-worry-about-an-asteroid-hitting-earth
