23/08/2026
Помалку познат сунет - Техник
Еден од сунетите кои денес се помалку познати и практикувани е техникот – да се земе малку урма, да се омекне и со неа нежно да се протријат непцето и внатрешноста на устата на новороденчето.
За овој сунет сведочи хадисот на Ебу Муса, радијаллаху анху, кој вели: „Ми се роди син, па го однесов кај Пратеникот ﷺ. Тој му го даде името Ибрахим, му направи техник со урма и упати дова за бериќет за него.“
(Бухари и Муслим)
Интересно е што современата неонатална медицина денес користи нешто што има одредена сличност со оваа практика. Кај новороденчиња со ризик од хипогликемија (низок шеќер во крвта) се користи 40% декстрозен гел кој се нанесува на внатрешната страна од образот. Клиничките истражувања, меѓу кои познатата „Sugar Babies Study“, покажале дека ваквиот начин на давање гликоза може ефикасно да помогне во третманот на неонаталната хипогликемија. Денес оралниот декстрозен гел е вклучен и во повеќе современи медицински протоколи.
Секако, техникот не треба да се претставува како медицински третман ниту како замена за декстрозен гел или лекарска грижа. Научните истражувања се однесуваат на прецизно дозирана медицинска декстроза, а не директно на техник со урма. Сепак, интересно е да се забележи оваа сличност со суннет практикуван уште пред повеќе од 1400 години.
Суннетот на Пратеникот ﷺ е богатство – затоа да ги запознаеме, оживуваме и практикуваме неговите суннети.
