13/11/2026
ഗായിക പുഷ്പവതിയുടെ പരിപാടിക്ക് അനുമതി നിഷേധിച്ച തിരുവനന്തപുരം കോർപ്പറേഷൻ്റെ നടപടി അപലപനീയവും ആവിഷ്കാര സ്വാതന്ത്ര്യത്തിന് എതിരുമാണ്.
തിരുനന്തപുരം മാനവീയം വീഥിയുടെ ഒരു വർഷം നീളുന്ന രജത ജൂബിലി ആഘോഷങ്ങൾ നടക്കുകയാണ്.
അതിൻ്റെ ഭാഗമായി എല്ലാ രണ്ടാം ശനിയാഴ്ചയും വിവിധ സാംസ്കാരിക പരിപാടികൾ സംഘടിപ്പിക്കുന്നതിന് തീരുമാനിക്കുകയും നവംബർ പതിനാലാം തീയതി ഗായിക പുഷ്പവതിയുടെ ഗാനസന്ധ്യ സംഘടിപ്പിക്കുന്നതിന് കോർപ്പറേഷനിൽ അപേക്ഷയും നൽകി എങ്കിലും അനുമതി നൽകിയിട്ടില്ല.നഗരസഭ സെക്രട്ടറി അടക്കം അപേക്ഷ ഫോർവേഡ് ചെയ്തിട്ടും മേയർ അകാരണമായി അപേക്ഷ തടഞ്ഞു വച്ചിരിക്കുകയാണ്. കോർപ്പറേഷന്റെ അനുമതി ലഭിക്കാത്തതിനാൽ മൈക്ക് പെർമിഷൻ ലഭിച്ചിട്ടില്ല.
സാംസ്കാരിക പരിപാടികൾക്കും നൈറ്റ് ലൈഫിനുമായി ഒരുക്കിയ
മാനവീയം വീഥി എന്ന സാംസ്കാരിക ഇടനാഴിയിൽ കലാസാംസ്കാരിക പരിപാടികൾ സംഘടിപ്പിക്കുവാൻ അനുമതി നിഷേധിക്കുന്നത് ശരിയല്ല. സാംസ്കാരിക പരിപാടികൾക്ക് അനുമതി നിഷേധിക്കുകയും കച്ചവട താല്പര്യമുള്ള പലതരം എക്സ്പോകൾക്ക് സ്റ്റാളുകൾ അനുവദിക്കുകയും ചെയ്യുന്നുണ്ട്.
ബിജെപി അനുകൂല പരിപാടികൾക്ക് മാത്രം അനുമതി നൽകുന്ന സമീപനമുണ്ട്.
കോർപ്പറേഷൻ ഭരിക്കുന്ന ബിജെപിയുടെ സങ്കുചിത രാഷ്ട്രീയ താല്പര്യമാണ് ഇതിന് പിറകിൽ.
മാനവീയം വീഥിയിൽ
‘പുഷ്പവതി പാടുന്നു” എന്ന ഗാനസന്ധ്യയ്ക്ക് അനുമതി നിഷേധിച്ചതിൽ ഡിവൈഎഫ്ഐ സംസ്ഥാന സെക്രട്ടേറിയറ്റ് ശക്തമായി പ്രതിഷേധിക്കുന്നു.