23/10/2025
SDPI ക്രിമിനലുകൾ ആംബുലൻസ് തീവച്ച് നശിപ്പിച്ച സംഭവം:
ഉന്നതതല ഗൂഢാലോചന പുറത്തു കൊണ്ടുവരണം
മുഴുവൻ പ്രതികളെയും ഉടൻ അറസ്റ്റ് ചെയ്യണം -
DYFI തിരുവനന്തപുരം ജില്ലാ കമ്മിറ്റി
________________________________________
DYFI നെടുമങ്ങാട് ബ്ലോക്ക് കമ്മിറ്റിയുടെ റെഡ് കെയർ ആംബുലൻസ് SDPI ക്രിമിനലുകൾ തീവച്ചു നശിപ്പിച്ച സംഭവത്തിന് പിന്നിലെ ഉന്നതതല ഗൂഢാലോചന പുറത്തു കൊണ്ടുവരണമെന്നും മുഴുവൻ പ്രതികളെയും ഉടൻ അറസ്റ്റ് ചെയ്യണമെന്നും DYFI ജില്ലാ സെക്രട്ടറി ഡോ. ഷിജൂഖാൻ, പ്രസിഡൻ്റ് വി . അനൂപ് എന്നിവർ ആവശ്യപ്പെട്ടു. ആശുപത്രിക്ക് മുന്നിൽ പാർക്ക് ചെയ്ത വാഹനം കത്തിച്ച് ,
വഴിയാത്രക്കാരും ആശുപത്രിയിലെത്തുന്ന രോഗികളും ഉൾപ്പടെ നിരവധി പേരുടെ ജീവഹാനി ലക്ഷ്യം വച്ചു കൊണ്ടുള്ള പ്രവൃത്തിയാണ് അരങ്ങേറിയത് .മുൻകാല പോപ്പുലർഫ്രണ്ട് നേതാക്കളാണ് SDPI യെ നയിക്കുന്നത്. സംഭവത്തിന് പിന്നിൽ SDPI യുടെ ഉന്നത നേതൃത്വം നടത്തിയ ഗൂഢാലോചന പുറത്തു കൊണ്ടുവരണം.ന്യൂനപക്ഷ വർഗീയ പ്രസ്ഥാനങ്ങളായ പോപ്പുലർ ഫ്രണ്ടും എൻ ഡി എഫും ഇതുപോലെ നിരവധി ഭീകര കൃത്യങ്ങൾ നടത്തിയിട്ടുണ്ട്. സമുദായ സൗഹാർദ്ദം തകർത്തും നിരപരാധികളെ കൊന്നും സാധാരണക്കാരെ അക്രമിച്ചും സമാധാനാന്തരീക്ഷം തകർക്കലാണ് അവരുടെ രീതി. ജനാധിപത്യവാദികളും സമാധാനകാംക്ഷികളായ വിശ്വാസികളുമടക്കം മുഴുവനാളുകളും SDPI യുടെ പ്രവൃത്തികൾക്കെതിരെ ശബ്ദമുയർത്തണം.
നെടുമങ്ങാട്ട് ആംബുലൻസ് കത്തിച്ചതിന് ശേഷം അർദ്ധരാത്രിയും എസ്ഡിപിഐക്കാർ സോഷ്യൽ മീഡിയയിൽ ആഹ്ലാദം പങ്കിട്ട് പോസ്റ്റിടുന്നുണ്ടായിരുന്നു.
പ്രകോപനം സൃഷ്ടിച്ച് ബോധപൂർവം കലാപമുണ്ടാക്കലാണ് അവരുടെ ഉദ്ദേശം.
പാവപ്പെട്ടവരും രോഗികളുമായ ആയിരക്കണക്കിന് ആളുകൾക്ക് സൗജന്യനിരക്കിലും പലപ്പോഴും സൗജന്യമായും സേവനം നടത്തുന്ന ആംബുലൻസാണ് തീവച്ചു നശിപ്പിച്ചത്. വൻ സംഘർഷം ലക്ഷ്യം വച്ച്, അക്രമങ്ങൾ വ്യാപിപ്പിക്കാനാണ് എസ്ഡിപിഐ പദ്ധതിയിട്ടതെങ്കിലും DYFI പ്രവർത്തകർ അങ്ങേയറ്റം സംയമനം പാലിച്ചു.എസ് ഡി പി ഐ ലക്ഷണമൊത്ത ഭീകര സംഘമായി മാറുന്നത് വച്ചുപൊറുപ്പിക്കാൻ കഴിയില്ല; വൻ ഹവാല ഇടപാടും സാമൂഹ്യ വിരുദ്ധ പ്രവൃത്തിയും നടത്തി സമ്പൂർണമായും ക്രിമിനലുകളുടെ സംഘമായി മാറുകയാണ് അവർ. നെടുമങ്ങാട്ട് വാഹനം തീവയ്ക്കുകയും അതിലൂടെ വൻ ആൾനാശവുമായിരുന്നു അവരുടെ പദ്ധതി.
ഇത് ഭീകരസ്വഭാവമുള്ള ചെയ്തികളാണ്.
പുരോഗമന കലാസാഹിത്യ സംഘം ജില്ലാ ജോയിൻ്റ് സെക്രട്ടറിയും CPIM കരകുളം മുക്കോല ബ്രാഞ്ച് സെക്രട്ടറിയുമായ എസ് എസ് ദീപുവിനെ SDPI ക്രിമിനലുകൾ കൊല്ലാൻ ശ്രമിച്ചത് ഞായറാഴ്ചയാണ്. ഭാര്യ ദീപ, മകൻ ദീപരാജ് എന്നിവർക്കൊപ്പം അഴിക്കോട് കടയിൽ പോയപ്പോൾ, കാറിലെത്തിയ നാലംഗ SDPI സംഘം കമ്പിപ്പാര ഉപയോഗിച്ച് ആക്രമിക്കുകയും കൊല്ലാൻ ശ്രമിക്കുകയും ചെയ്തു.ദിവസങ്ങൾക്ക് മുമ്പ് കായ്പ്പാടിയിൽ CPIM ഏരിയ കമ്മിറ്റി അംഗവും മുൻ കരകുളം പഞ്ചായത്ത് പ്രസിഡൻ്റുമായ ആർ പ്രീത, CPIM ബ്രാഞ്ച് സെക്രട്ടറി ജലീൽ, ഹക്കീംജി, തൻസീർ എന്നിവരെയും SDPI സംഘം ആക്രമിച്ചു.
ന്യൂനപക്ഷ വർഗീയ സംഘാടനം ഭൂരിപക്ഷ വർഗീയതയ്ക്ക് ഇന്ധനം പകരാനാണ് ഇടയാക്കുക;തുടർച്ചയായി SDPI നടത്തുന്ന കൊടുംക്രൂരതകൾക്കെതിരെ തിരുവനന്തപുരം ജില്ലയിൽ DYFI നേതൃത്വത്തിൽ വിപുലമായ ക്യാമ്പയിൻ സംഘടിപ്പിക്കും.ആംബുലൻസ് കത്തിച്ച സംഭവത്തിൽ പോലീസ് സമഗ്രമായി അന്വേഷണം നടത്തി , SDPI യുടെ ഉന്നത നേതൃത്വം മുതൽ പ്രാദേശിക നേതാക്കൾ വരെ ആരൊക്കെ ഇതിനു പിന്നിലുണ്ടോ മുഴുവൻ ആളുകളെയും നിയമത്തിനു മുന്നിൽ കൊണ്ടുവരണമെന്നും
DYFI ഭാരവാഹികൾ ആവശ്യപ്പെട്ടു.
