28/09/2026
Falënderim dhe mirënjohje për tubimin e djeshëm
Në emër të qendrës sonë, falënderojmë nga zemra të gjithë bashkatdhetarët që morën pjesë në tubimin paqësor për çlirimtarët tanë. Prania juaj, e mbi të gjitha mirësjellja dhe qytetaria që treguat, i dhanë dinjitet këtij tubimi.
Një falënderim i veçantë u takon djemve tanë, të cilët për ditë të tëra ndanë kohë nga obligimet e tyre për ta përgatitur këtë organizim. Falënderojmë stafin e “Liria ka emër” për bashkëpunimin dhe fjalën e tyre prekëse.
Falënderojmë Mr. Driton Morina per moderim, i cili erdhi nga Stuttgarti për ta udhëhequr programin. Mirënjohje për të gjithë ata që dolën në skenë dhe kontribuuan me fjalimet dhe poezinë e tyre. Veçanërisht, falënderojmë hoxhallarët tanë, fjalimet e të cilëve përcollën emocion, dashuri për atdheun dhe thirrje për bashkim e dinjitet.
Stafi ynë është përkujdesur edhe për fotografi dhe video profesionale, që ky tubim të mbetet kujtim për secilin prej jush.
Për mundësinë e mbajtjes së tubimit falënderojmë autoritetet përkatëse, ndërsa Policinë e Karlsruhes e falënderojmë për bashkëpunimin dhe kujdesin për mbarëvajtjen e tij.
Kush mendon se qendra jonë shërben vetëm si vend faljeje, le ta dijë se ajo është edhe një qendër shqiptare: një vend ku flitet shqip, ku fëmijët mësojnë gjuhën shqipe, ku ligjërohet për fenë, atdheun, historinë e kulturën tonë dhe ku organizohen aktivitete sportive për rininë shqiptare.
Tubimi i djeshëm buroi nga zemrat tona. UÇK-ja është pjesë e historisë sonë dhe kujtesës sonë kombëtare. Siç na kujtonte Hoxhë Jakup Hasipi përmes krahasimit të tij, gjaku i njeriut është i njëjtë nga koka deri te thembra. Ashtu duhet të jemi edhe ne si popull: të bashkuar, me dashuri për njëri-tjetrin dhe për flamurin tonë kombëtar.
Së bashku lutemi për çlirimtarët tanë dhe për ushtrinë tonë. Urojmë që akuzat, të cilat ne i konsiderojmë të pabaza, të rrëzohen sa më parë dhe ata të lirohen.
Faleminderit të gjithëve për pjesëmarrjen, kontributin dhe sjelljen shembullore!
