25/10/2026
ALLES TEN GOEDE
"Ons weet dat vir hulle wat God liefhet, alles ten goede meewerk." (Romeine 8:28) [AFR53]
Wat 'n sterk woord is geloofsvertroue nie: alles werk ten goede saam.
Alle dinge – nie net die goeie nie, maar ook rampe, pyn, siekte en smart – alles werk ten goede saam. Ja, ook die kwade dinge! Watter lot ons ook al tref, dit tref ons ten goede.
Laat ons dink aan die kwade dinge, en veral siekte. Daar is mense wat dit nie kan verdra om teenspoed te hê nie. Daar is mense wat meen dat siekte byvoorbeeld 'n kwaad is wat 'n mens tref as jou geloof nie reg is nie. Maar is 'n gelowige dan nie meer in die hand van sy Hemelse Vader as hy siek is nie? Hoe verskriklik is dit nie om aan so iets te dink nie! Ons is dankbaar, onuitspreeklik dankbaar as ons gesond is. Ons kan dit nooit genoeg waardeer nie, en ons sê daarvoor: "Loof die Here, o my siel." Maar as ons ten spyte van ons gelowige gebed tog siek bly, moet ons nie met pynlike inspanning gaan soek na wat verkeerd is in ons nie. Ons het gelowig gebid en nie gesond geword nie! Nou moet ons met diepe ontsag buig voor die majesteit van God; maar ons moet ons ook gelowig in die liefdevolle hand van onse Vader stel en gewillig ontvang wat Hy oor ons beskik. So sal ons rus en vrede hê, die vrede wat alle verstand te bowe gaan. En in die geestelike ervaring daarvan sal ons ook kan sê: "Ons weet dat vir hulle wat God liefhet, alles ten goede meewerk."
![ALLES TEN GOEDE"Ons weet dat vir hulle wat God liefhet, alles ten goede meewerk." (Romeine 8:28) [AFR53]Wat 'n sterk woo...](https://img5.ngos1.com/417/010/1121286374170104.jpg)
