Abaim

02/11/2026

Depi laz 6 an, Oreli finn grandi avek Abaim. ❤️

Depi tifi ki finn grandi dan Saturday Care, partisip dan lanrezistreman albem koudpwin ' 16 ti morso nou lanfans ' ek klip Ti Marmit... ziska zordi fam epanwi.

Li partaz osi so lavantir dan regroupman « Depi lakaz Ziska Liniver », enn group bann diaspora ki finn ena enn listwar spesial avek Abaim dan lekel li evolie asterla.

So mesaz pou bann zenn: kontign reve, krwar dan zot mem ek pa per pou viz lwin. Zot osi ena kapasite pou realiz zot bann rev!

31/10/2026

Ti marmit ? Lakord sote ? Lamarel? Dan Saturday care ek Sunday care ABAIM, bann zanfan zwe tou kalite zwe lontan. Less zanfan zwe inportan pou zot devlopman fizik ek emosionel. Alor, li lozik ki transmision patrimwann kiltirel zwe lontan res enn valer inportan pou ABAIM 🇲🇺❤️

Me pena zis sa. Degaze swiv nou paz ek met an komanter zwe to ti pli kontan kan to ti tipti. Pas blie tag to kamarad ar ki to ti zwe sa zwe la dan to lanfans❤️

29/10/2026

De zwe, enn sel bon repons, eski to kone lekel sa?

Si tonn zwe sa tipi mo sir li fasil. Met to repons an komanter nou gete si to vremem kone!

Repons 1 - Lakord Sote
Repons 2 - Telefonn

Eski to anvi re zwe avek nou ek dekouver seki ena deryer Abaim ? Swiv nou paz pou pa rat nanye!

27/10/2026

To anvi kone ki ena deryer laport?

To kapav panse ki ena zis lamizik, me ena plis ki sa deryer laport Abaim.

To kirye? Abonn twa a nou paz, gete ki ena deryer sa serir-la ek dekouver Abaim.

27/10/2026

Avan nou ziz nou bann zenn, eski nou finn vremem donn zot enn sans pou reisi?

Depi tipti, ena bann zenn ki grandi avek bann zizman, bann etikiet ek bann parol ki fer zot krwar ki zot pa pou kapav al pli lwin. Kan zot sorti dan sertin landrwa, bien souvan se sa landrwa-la ki koz pou zot avan mem ki dimounn dekouver kisann-la zot ete ek ki zot kapav fer.

Me eski problem-la zis dan bann zenn, ouswa eski nou bizin osi get nou responsabilite antan ki sosiete?

Nou pa kapav demann bann zenn pou krwar dan zot lavenir si sosiete pa donn zot bann loportinite, si pa akonpagn zot ek si nou kontign fer zot santi ki zot pa pou reisi.

Nou bann zenn aspir a enn bon kalite sosiete, ki kapav ousi regle bann linzistis, amenn bann vre solision dirab.

Nou bann zenn pa bizin plis zizman. Zot bizin dimounn ki krwar dan zot, ki akonpagn zot ek ki ed zot dekouver seki zot kapav vini. Zot bizin gagn drwa reve, ena lanbision, viz lwin ek gagn bann veritab sans pou realiz zot bann rev.

Dan sa video-la, Marousia, kordinatris nasional rapel linportans pou pran konsians lor difikilte bann zenn ek lasosiete.

Video: https://www.youtube.com/watch?v=vlXBHLK_NFo&t=39s

Anou aret met etikiet lor zot. Anou ed zot avanse. Anou montre zot ki zot kapav reisi.

Marousia Bouvery, artiste et membre de l’ONG Abaim, lance un appel ...

17/10/2026

17/10/2026

Zordi, 17 Oktob, nou selebre Zourne Internasyonal Patrimwann Kiltirel Imateryel. 🎶

Lamizik tradisionel, ladans, rakont zistwar, reset, artizana,metye... tou sa ki nou bann gran dimounn finn partaz avek nou, pa dan mize: zot dan nou lavwa, dan nou lame, dan nou lakouzinn, dan nou zardin.

Dimounn ki protez li ek transmet li, zot ki rann nou diversite kiltirel pli riss ek nou kreativite pli for.
Ki nou kontinie pass bann trezor-la, zenerasion apre zenerasion. 🌍✨

17/10/2026

Latelie fabrikasion ravann ek tanbour Rodrig pe deroule dan Abaim zordi alokazion Zourne Mondial Patrimwann Kiltirel Intanzib

15/10/2026

Bes laz responsabilite kriminel pa pou rezoud bann rasinn violans. Met bann zanfan pli zenn dan sistem zidisier kriminel riske met zot ankor plis a lekar sosiete.

An 2023, Komite Nasion-Zini lor Drwa Zanfan (UNCRC) ti fer enn rekomandasion bien kler: enn fwa ki laz responsabilite kriminel finn fixe, fode pa bes li.

Pou adres problem violans dan nou sosiete, nou bizin al pli lwin ki pinision. Nou bizin konpran bann rezon ki pous bann zanfan ver violans, adres bann problem sosiete, problem ki zot pe fer fas ek donn zot akonpagnman, ankadreman ek bann alternativ pou konstrir enn meyer lavenir.

Abaim zwenn so lavwa avek bann lezot lorganizasion pou demann Gouvernman pa al delavan avek sa mezir-la, me plito angaz enn vre refleksion lor bann alternativ ki protez nou bann zanfan ek nou sosiete.