16/10/2026
№2. ӨӨРИЙН УРЬДЫН МУУ ДАДЛААС БОЛЖ БУРУУ ҮЙЛДСЭН БОЛ ТЭДГЭЭРТ ГЭМШИН НАМАНЧЛАХ, ЗАСАН ЗАЛРУУЛАХ ХЭРЭГТЭЙ. ЭНЭ АРГАД АЙЛДСАН СУДАР БОЛ ДҮНШИГ ХЭМЭЭХ НОМ ЮМ (№1 постын үргэлжлэл)
Хүн болгон сахил санваар авах албагүй хэдий ч, хүн болгон муу сэтгэлтэйгээ тэмцэх хэрэгтэй. Муу сэтгэлтэй тэмцэхэд наманчлагаа гэдэг асар их чухал юм. Учир нь хүн бурууг буруу гэж мэдэх, буруу гэдгийг мэдээд бурууг үйлдэхгүй гэж бодох, цаашид дахин бурууг үйлдэхгүй гэж бодох, урьд нь яах гэж үйлдэв дээ гэж гэмшин, дахин үйлдэхгүй гэсэн бодол сэтэхүй ирэхгүй бол буруугаас ангижрах боломж өөрт хомс болно.
Бурхан багш сайн сайхан амьдрах, зовлон муу зүйлээс ангид байхын тулд хүн бие, хэл сэтгэлээ арван цагаан буяны зам мөрд хичээвэл сайхан амьдарна хэмээн айлдсан юм.
Сайхан амьдарна гэдэг хүн аз жаргалтай, амар амгалантай байхыг хэлнэ. Аз жаргал, амар амгалан гэдэг хүний биед оршдог. Аз жаргал, амар амгалан гэдэг эд хөрөнгө, сайхан хувцас, унаа байшин, эд материал зэрэг гадна талын зүйлд оршдоггүй юм. Эдгээр нь аз жаргал, амар амгаланг бий болгох хэрэглээ төдий зүйл юм. Аз жаргал, амар амгаланг бий болгоход зөв зохистой хэрэглээ бүрдвэл тэдгээртэй байсны хэрэг нь бүтнэ. Харин тэдгээрийг илүү зовох талд аваад ирвэл бидэнд сөрөг үр дагавар гарах, дараатай зүйл мэт болно. Нэг машин авлаа, бүр дараатай юм боллоо гэх хүн байдаг. Машин гэдэг хүнийг ая тухыг хангах, хурдан шуурхай, аюулгүй очих газар нь хүргэх зэрэг хэрэглээ юм. Харин өөрийн оюун санаа, бодолд гаргаж буй шийдвэр буруу бол тэр нь асуудал дагуулдаг.
Сайхан амьдаръя гэвэл арван цагаан буяны зам мөрд бие, хэл сэтгэлээ чиглүүл. Зовлон, үл ойлголцол, гомдол, харуусал бүгдээс хол байя гэвэл бие, хэл, сэтгэлээ арван хар нүглээс ангид байхыг хичээх хэрэгтэйг Бурхан багш айлдаж байна. Ингэж хичээхэд муу зүйлээс хол, сайн зүйлд ойр байх дадал өөрт хэрэгтэй. Энэ дадлыг эзэмшихэд арга хэрэгтэй, мөн хугацаа орно. Нэг арга нь: (1) Өөрөө урьд муу үйлдсэндээ гэмшин, хойшид үйлдэхгүй гэж амлалт авч хичээвэл муу зүйлээс ангид байж чадна. Мөн (2) бурууг үйлдэхгүй бол өөрт зовлон ирэхгүй. Харин урьдын муу дадлаас болж буруу үйлдсэн бол тэдгээрт гэмшин наманчлах, засан залруулах хэрэгтэй. Энэ аргад айлдсан нэг судар нь Дүншиг хэмээх ном юм.
Дүншиг хэмээх номын эхэнд багш, чухаг дээд гуравт аврал одуулж, наманчлагааны гол орон, наманчлахад гол адистидладаг 35 бурханд мөргөж байна. Дараа нь тэргүүлшгүйгээс хэзээ орчлонг гэтлэх хүртэл (i) Өөрөө хилэнцэт үйл үйлдсэн, одоо үйлдэж буй, ирээдүйд үйлдэх, (ii) Өөрөө үйлдээд зогсохгүй бусдыг хилэнцэт үйл үйлдэхэд оруулсан, (iii) Бусдыг хилэнцэт үйл үйлдэхэд даган баяссан гэм бүгдэдээ гэмшин наманчилж, хойшид үйлдэхгүй хэмээн наманчлах тухай айлдаж байна.
Мөн суварганы гор эд зүйлсийг булаах, хуврагийн эд зүйлсийг булаах, суварга хийгээд хуврагийн гор эд зүйлсийг зохисгүй хэрэглэх, арван зүгийн хувраг нугуудын хувцас, эд зүйлсийг булаах, сүм хийдийн бурхан шүтээнийг хулгайлах; Бусдыг эдгээр үйлдэлд оруулсан; Бусдын эдгээр үйлдэлд даган баяссан бүгдэд наманчилж байна. Цаашлаад Өөрөө алъя гэсэн сэтгэлээр эцэг, эх, дайснаа дарсан архадыг хөнөөх, хөнөөе гэсэн сэтгэлээр бурханы лагшингаас цус гаргах, хуврагууд хооронд талцуулсан зэрэг завсаргүй тамд төрдөг таван нүгэл үйлдсэн; Бусдаар үйлдүүлсэн; Бусдын үйлдсэнд даган баяссан юу бий тэдгээр бүгдэд наманчилж байна. Дараа нь өөрөө 10 хар нүглийг бүрэн гүйцэд, хүчтэй үйлдсэн; Бусдаар үйлдүүлсэн; Бусдын үйлдсэнд даган баяссан алдаа гэмээ наманчилж байна.
Мөн бурхан та бүгдийн өмнө, бурхан та бүгдийг гэрчид барин өөрөө хураасан муу үйл, түүний эрхээр дараа төрөлд там тэргүүтэй муу заяанд, хязгаар газар, эрхтэн дутуу болж төрөх тэргүүтэй муу үр дагавар гарч мэдэх муу үйл бүгдэд чин сэтгэлээсээ наманчлан, хуурмаггүй та бүгд өөрийг шүүж өгнө үү, би нууцалж далдлахгүйгээр наманчилъя, урьд үйлдсэндээ гэмшиж байна, хойшид би үүнийг хийхгүй, үргэлжлэлийг нь зогсоох юм шүү гэж бодоорой гэж айлдаж байна.
Ачит багшийн айлдвараас....2026.10.03
