Бизнес өсөлт ТББ

Home
Mongolia
Ulaanbaatar
Бизнес өсөлт ТББ

Directions Website

Contact information, map and directions, contact form, opening hours, services, ratings, photos, videos and announcements from Бизнес өсөлт ТББ, Community Center, Ulaanbaatar.

Бизнесүүд бодит туршлагаа хуваалцаж, хамтдаа хөгжин, зөв соёлыг түгээн дэлгэрүүлж, тогтвортой харилцааг эрхэмлэн, эерэг нөлөө үзүүлж, төрд дуу хоолойгоо хүргэх зорилготой гишүүддээ үйлчлэх ТББ

08/09/2026

📣Бүгд Найрамдах Солонгос улсад болох ”ЖИЖИГ ДУНД ҮЙЛДВЭРИЙН БАРАА БҮТЭЭГДЭХҮҮНИЙ ҮЗЭСГЭЛЭН ХУДАЛДАА"-НЫ БҮРТГЭЛ ЭХЭЛЛЭЭ.
🟦Монгол улсын үндэсний үйлдвэрийн бараа бүтээгдэхүүнийг экспортлох боломж нөхцөлүүдийг нэмэгдүүлэх, хоёр орны бизнесийн харилцан түншлэлийг өргөтгөх зорилгоор 2026 оны 10 сарын 16-23-ны өдрүүдэд БНСУ-ын Сөүл хотноо “МОНГОЛД ҮЙЛДВЭРЛЭВ–2026, БНСУлсад” үзэсгэлэн худалдаа 9 дэх удаагаа зохион байгуулагдахаар боллоо.
🔵Энэ удаагийн үзэсгэлэн худалдаа:
📍 Кёнги мужийн Янпён-гүн -д 4 өдөр
📍 Сөүл хотын Дунгдэмүн дүүрэгт 3 өдөр зохион байгуулагдах юм.
🔷Үзэсгэлэн худалдаанд
✅Аялал жуулчлал
✅Ноос, ноолууран бүтээгдэхүүн
✅Арьс ширэн бүтээгдэхүүн
✅Сарлагийн хөөврөн бүтээгдэхүүн,
✅Бэлэг дурсгал
✅Эрүүл мэндийн бүтээгдэхүүн
✅Хүнсний бүтээгдэхүүн чиглэлээр үйл ажиллагаа эрхлэгч байгууллага, аж ахуйн нэгжүүд оролцох боломжтой.
🔹Ерөнхий зохион байгуулагч:
Бизнес өсөлт ТББ
🗒️Бүртгэл:
БНСУ-н виз мэдүүлэхэд хугацаа шаардагдах тул 2026.09.23-ий өдрийг дуустал бүртгэл явагдана.
☎️Дэлгэрэнгүй мэдээллийг 88125575, 96050988 дугаараас авна уу
🌐Дараах линкээр орж анхан шатны бүртгэлээ үүсгэнэ үү!
https://docs.google.com/forms/d/e/1FAIpQLSchbGQDuHrZJxrgtQnzDl2GvNEO6lCu5F2GDzJ9qgVk1yihgQ/viewform?usp=header

17/08/2026

НҮБ -н COP17 бага хурал Монгол улс, Улаанбаатар хотноо энэ сарын 17-28 хооронд зохион байгуулагдаж байгаа билээ. БИЗНЕС ӨСӨЛТ ТББ гишүүд энэхүү бага хурлын үеэр Rio Tinto н санхүүжилттэй ӨСӨЛТ ХӨГЖЛИЙН ТӨВ буюу В8 павелионд бүтээгдэхүүн үйлчилгээгээ танилцуулан оролцож байна. Та бүхэн байгальд ээлтэй, цэвэр технологийн бүтээгдэхүүнүүдтэй танилцан худалдан авалт хийх боломжтой.

10/07/2026

Бизнес Өсөлт ТББ эрхэм гишүүдийн танилцуулыг цуварлаар хүргэж байна
“Баян хийц” нөхөрлөлийн үүсгэн байгуулагч
Д.Амарбаясгалан

Би нөхөртэйгөө 25 жилийн өмнө оюутан байхдаа танилцаж байлаа. Өдгөө бид хүү, охинтой болж аз жаргалтай, өнөр өтгөн гэр бүл болжээ. Сургуулиа төгссөний дараа банканд эдийн засагчаар ажиллаж байх үед буюу 2011 онд хүндээр өвдсөн минь амьдралд тохиолдсон сорилтуудын нэг байлаа хэмээн ярих бүсгүйг Д.Амарбаясгалан гэдэг. Тэр бол “Баян хийц” нөхөрлөлийн үүсгэн байгуулагч. Энэ цаг үед хань маань чадах бүх зүйлээ хийж хөл дээр маань босгосон ч хүнд өвчний улмаас би хөдөлмөрийн чадвараа алдсан юм. Ажилгүй гэртээ суух болсон энэ үеэс л би анх декупаж урлал сонирхож, хичээлүүдийг нь интернэтээс үзэж гарын доорх материал, хог хаягдлаар бэлэг дурсгал, гоёл чимэглэл хийж эхэлснээр “Тэрэм” брэндийн үндэс суурь тавигдсан. “13 дугаар зуунд Тоорил хаан Онон мөрний хөвөөнд алтан тэрэм барьж хурим найраа хийв” гэсэн түүхээс сэдэвлэн “Тэрэм” гэдэг нэрийг өгчээ.
“Тэрэм” брэнд өдгөө 20 орчим нэр төрлийн модон эдлэл, бэлэг дурсгал, эко тоглоомыг үйлдвэрлэж сүлжээ болон бэлэг дурсгалын дэлгүүрүүдээр борлуулж, Солонгос, Япон, АНУ, Франц зэрэг гадаадын зах зээлд үйлчлүүлэгчидтэй болсон. Тэдний хийдэг бүх бүтээгдэхүүн байгальд ээлтэй, хүний эрүүл мэндэд ямар ч сөрөг нөлөөгүй байдгаараа онцлог. Шинэ бүтээгдэхүүний санаагаа өдөр тутмын амьдралаас олж авдгаа Д.Амарбаясгалан ярив. Тухайлбал, бага насны 2 хүүхдээ гэртээ өсгөж байхад жимсний нухашны шил өдөр тутам гардаг байж. Ийм бэлэн материалыг хог руу хаяхын оронд нухашны шилэнд арвай хийгээд бэлэг дурсгалын зүйл болгох гэх мэтчилэн уйгагүй ажилладаг байв.
Түүний нөхөр Д.Энх-Амар нь “Тэрэм” брэндийг өдий зэрэгтэй явахад хос багана мэт зүтгэсэн хүмүүсийн нэг юм. Арга билигт суурилсан гэр бүлийн бизнес. Гэрээрээ эхэлж байхад тоног төхөөрөмж гэх зүйл байхгүй. Нөхөр Д.Энх-Амар нь захаас гар хөрөөнөөс нэгийг авч, надад модон бэлдэц хийж өгч байсныг мартдаггүй гэж тэрбээр ярьсан юм. Төрийн болон төрийн бус байгууллагуудын зохион байгуулж буй арга хэмжээ, үйл ажиллагаанд идэвхтэй оролцож, үргэлж тэмүүлж, зүтгэж ирсний үр шим олон удаа гарчээ. Тухайлбал, анхны бүтээгдэхүүн болох монгол гэр хэлбэртэй модон түлхүүрийн өлгүүрээ гаргаад 2018 онд Нийслэлийн хөдөлмөр эрхлэлтийг дэмжих төвийн үзэсгэлэн худалдаанд оролцоход модон урлал төрөлд тэргүүн байрт шалгарч байж. Хөгжлийн Шийдэл ТББ-ын зөвлөхөөс BEST хөтөлбөрийн талаар мэдээлэл авч, үүнд хамрагдах хүсэлтээ гаргасан нь бизнесээ дараагийн шатанд гаргах чухал алхам болсон байна.
Коронавирус цар тахалтай холбоотойгоор аялал жуулчлалын салбар бүхэлдээ түр зогсолт хийж, лангуугаа хаасан нь тус нөхөрлөлийн борлуулалтыг “0” болгосон. Тухайн үед тэд шантарсандаа бизнесээ зогсоогоод гэр бүлээрээ гадагшаа гарч амьдрах гээд зуучлалын компанитай ч уулзаж байсан удаатай гэж гэр бүлийн хоёр ярилаа. Аз болоход яг ийм эгзэгтэй үед BEST хөтөлбөрийн зөвлөхтэй холбогдон бизнесийн хүндрэлүүдээ ярьснаар цаг үедээ нийцсэн олон хэрэгтэй зөвлөгөө авчээ.
Энэ уулзалтын дараа BEST хөтөлбөрийн зөвлөхийн санал болгосноор бизнесийн нөхцөлдөө уян хатан хандаж, бүтээгдэхүүнээ дэлгүүрт өгөхөөсөө илүүтэй захиалгаа аваад борлуулалтаа хийх хэв маягт шилжсэн байна. Тэдний бизнестээ хэрэгжүүлж эхэлсэн захиалга авангуутаа үйлдвэрлэж загвар амжилттай байсан ч дараагийн асуудал урган гарчээ. Энэ бол түүхий эдийн хомсдол, хүний нөөц, тоног төхөөрөмжийн хүртээмжийн асуудал. Тухайлбал, тус нөхөрлөлийн хийдэг “Гэр” өлгүүрээс 15 мянгыг захиалга авлаа гэхэд тэдэнд 3 мянган өлгүүр гаргах хүчин чадал, нөөцтэй байв. Тиймээс бүтээгдэхүүний түүхий эдийн нөөцөө хангалттай бэлдэх, үйлдвэрлэлээ өргөжүүлэх зорилгоор хөнгөлөлттэй нөхцөлтэй зээлийг BEST хөтөлбөрийн тусламжтайгаар авч эргэлтийн хөрөнгөө нэмэгдүүлжээ.Энэхүү зээлийн санхүүжилтээр 2 контейнер түүхий эд худалдан авч, нөөцөлж чадсанаар захиалга орж ирэхэд бүтээгдэхүүнээ шууд үйлдвэрлэх боломжтой болсон. Зээл авснаас хойш нэг жилийн хугацаанд борлуулалт 30 хувиар, цэвэр ашиг 13 хувиар нэмэгдсэн сайн мэдээтэй. “Тэрэм” брэндийг үүсгэн байгуулагч Д.Амарбаясгалан бизнес эрхэлж буй залуучуудад хандаж, ажил хийхэд асуудал үргэлж гардаг. Бэрхшээлийг давж, шийдэж чадвал ялалт, бууж өгвөл ялагдал болдог юм шүү гэж зөвлөлөө.
Товч мэдээлэл
Бизнесийн төрөл: Модон жижиг эдлэл үйлдвэрлэл
Бүтээгдэхүүний онцлог: Уламжлалыг хадгалсан хэрэглээтэй, блэгэ дурсгалын бүтээгдэхүүн
Хаяг: УБ хот, СХД Москва хороолол, 119а -77
Утас: 96050988
И-мэйл: [email protected]
Фэйсбүүк хуудас: Тэрэм / Terem –Монгол бэлэг дурсгал

09/07/2026

Бизнес Өсөлт ТББ эрхэм гишүүдийн танилцуулыг цуварлаар хүргэж байна
“Сүүн гэр” ХХК-ийн захирал У.Пагма
“Сүүн гэр” ХХК-ийн захирал У.Пагмаагийн уламжлалт, эрүүл хүнсээр бүтээгдэхүүн хийх бизнесийн санаа нь түүний өдөр тутмын амьдралаас төржээ. Эмэгтэй хүн ээж болсныхоо дараа үр хүүхдийнхээ эрүүл мэнд, хэрэглэж буй хоол хүнс гээд олон зүйлд анхаарал хандуулж, гэртээ сайн дурын “судлаач” болдог. Яг үүнтэй адил У.Пагмаа хүүхдүүдээ цэвэр агаарт, эрүүл хүнс хэрэглэж, амьдралын зөв хэв маягтай болгохоор шийдэж, хөдөөг зорьсон түүхтэй. Ээжийн хувиар эхлүүлсэн эрүүл хоол, хүнсний аялал нь түүний цаашдын бизнесийн төлөвлөгөө болж, өнөөдрийн “Сүүн гэр” ХХК байгуулагдах үндэс суурийг тавьсан.
Мэдээллийн хурдацтай хөгжлийн эрин зуунд У.Пагмаагийн эрүүл хоол, хүнсний эрэл хайгуул буцаад л уламжлал руугаа чиглэх болов. Монголчууд цаг уурын нөхцөл байдал, бие хүний онцлог, улиралтайгаа яв цав нийцсэн идээ, ундааны аугаа их соёлтой ард түмэн билээ. Шинэ, содон бүхэнд татагдаж буй орчин цагийн нийгэмд бидний өвөг дээдсийн идээ, ундааны соёл мартагдан, устаж, үгүй болсоор байна. Уламжлалаас шинэчлэл рүү явж байгаа ч монголчуудын дунд хорт хавдрын өвчлөл жил бүр нэмэгдсээр байгаа нь харамсалтай. Тэр дундаа элэг, ходоодны хорт хавдраар манай улс дэлхийд тэргүүлж яваа нь иргэдийн амьдралын хэв маягтай холбоотой гэдгийг эрүүл мэндийн салбарынхан анхааруулж буй. Энэ асуудлыг шийдвэрлэхэд хувь нэмрээ оруулахаар “Сүүн гэр” ХХК-ийн хамт олон “Өглөөний цайгаа заавал уу, өлөн элгээ тайл” уриатайгаар гурван төрлийн арвай, овьёосны бөмбөлгийг органик орц, найрлагатайгаар баяжуулан гаргаж, зах зээлд амжилттай нэвтрүүлээд байна.
“Айлаас эрэхээр авдраа уудал” хэмээн монголчуудын хэлдгээр уламжлалаа ухвал ухаарал, гарц шийдэл, асуултын хариулт нь бий гэдэгт У.Пагмаа огтхон ч эргэлздэггүй. Тиймээс ч “Сүүн гэр” ХХК-ийнхаа эрхэм зорилго, алсын харааг “Эрүүл мэндийн өндөр ач холбогдолтой уламжлалт хүнсийг инновацад суурилсан шинэлэг технологиор үйлдвэрлэж, хэрэглэгчдэд хүргэнэ” гэж тодорхойлж, энэ зорилгынхоо төлөө тасралтгүй хөдөлмөрлөсөөр байна. Түүний сэтгэлдээ тээж явдаг нууцхан мөрөөдлийн нэг нь уламжлалт өв соёл шингэсэн түргэн хоолны үйлчилгээг эх орондоо нэвтрүүлэх. Хэзээ нэгэн өдөр залуучууд өвөг дээдсийнхээ өв соёл, уламжлалын үнэ цэнийг улам их ухамсарлаж, хүн бүр хайрлаж нандигнадаг, түүгээрээ омогшиж бахархдаг болно гэдэгт тэрбээр итгэлтэй явдгаа ярьсан.
Уламжлалт хүнсээ тренд болгох хүсэлтэй “Сүүн гэр” ХХК бизнесийн үйл ажиллагаагаа өргөжүүлэхэд BEST хөтөлбөрийн зээлийн зуучлал, зөвлөхүүдийн мэдээлэл, сургалтууд чухал үүрэг гүйцэтгэжээ. “Сүүн гэр” ХХК анх удаа, ямар ч туршлагагүйгээр ЖДҮ-ийг дэмжих сангийн сонгон шалгаруулалтад ороод, дөрвөн үе шатыг амжилттай давж, 50 сая төгрөгийг гурван хувийн хүүтэйгээр авч чадсан нь BEST хөтөлбөрийн зөвлөхүүд шат болгонд оновчтой зөвлөгөө өгч, анхнаасаа бичиг баримтуудаа маш цэгцтэй, нягт нямбай бүрдүүлсэнтэй шууд холбоотой гэсэн юм. Ийнхүү ЖДҮ-ийг дэмжих сангаас авсан зээлээрээ эргэлтийн хөрөнгө, тоног төхөөрөмжөө сайжруулж, үйлдвэрлэлийн хүчин чадлаа 30 хувиар нэмэгдүүлсэн байна.
Түүнчлэн BEST хөтөлбөрийн компанийн засаглал, маркетинг болон бусад сургалт, зөвлөгөөнүүдээс бизнес, бүтээгдэхүүнээ олон нийтэд хэрхэн сайн танилцуулж, хөрөнгө оруулагч татах, ярих, илтгэх ур чадварт суралцжээ. Хөтөлбөрийн сургалтуудаас олж авсан ур чадвараа ашиглан “Сүүн гэр” ХХК нь “Mongol HD” телевизээс зохион байгуулдаг “Шарк Танк” нэвтрүүлэгт оролцон, бүтээгдэхүүн, компаниа амжилттай танилцуулж, хөрөнгө оруулалт татаж чадсан нь олон амжилтын шанг татах нь тэр. “Шарк Танк”-аас хөрөнгө оруулалт татаж, эргэлтийн хөрөнгө нэмэгдэж, CU сүлжээ дэлгүүрүүдээр өглөөний цайгаа түгээснээр борлуулалт хоёр дахин өссөн байна. Үүнээсээ урам зориг авч, “Номин” супермаркеттай холбогдон, бүтээгдэхүүнээ нийлүүлж эхэлснээр эргэлтийн хөрөнгө 2.5 дахин, үндсэн хөрөнгөө гурав дахин, ашгаа 30 хувь, ажилтны тоогоо хоёроор нэмэгдүүлжээ. Мөн тэрээр Европын Холбооны СВИЧ-Эйшиа хөтөлбөрийн санхүүжилттэй “Эдийн засгийн ногоон шилжилт” төслийн хугацаанд бүхий л сургалт хөтөлбөрүүдэд хамрагдаж явсаар Монголдоо анхны БОНЗ-ын үнэлгээ хийлгэж ESG стандарт нэвтрүүлсэн 22 компанийн нэг болсон билээ.
Бизнес бага багаар өсөхийн хэрээр асуудал ч тасрахгүй. Бизнес эрхлэх хугацаандаа У.Пагмаа захирал тоглоомын дүрмээ анхнаасаа тодорхой болгож, холбогдох хуулиа уншиж, гэрээгээ сайн байгуулж, “Алаагүй баавгайн арьсыг хэрхэн хувааж авах вэ” гэдгээ эхнээсээ л ичиж зовохгүйгээр ил тод, нээлттэй ярилцах хэрэгтэйг ойлгож авчээ. Уламжлалт хүнсээ түгээн дэлгэрүүлж, худалдан авагчийн эрүүл мэндэд эерэг нөлөө үзүүлж байгаа нь ямар ч ашиг орлогоос илүү сэтгэл ханамж, бахархал төрүүлдэг гэдгийг тэрбээр ярив. Урт хугацаандаа гэнэтийн их ашиг орлогоос илүүтэй, эрүүл, уламжлалт, бүтээлч үйлдвэрлэлийг хөгжүүлэхэд анхаарч ажиллахыг эрхэмлэдэг ч зарим нэг хамтрагчид өнөөдрийн ашиг орлого, боломжуудыг л олж харж байсан нь зөрчил үүсэхэд хүргэсэн удаа бий. Гарааны бизнес эрхэлж байгаа хүмүүс компанийнхаа үнэт зүйлийг хамгаалах, түүнийхээ төлөө бат зогсох зоригтой байх хэрэгтэйг энэ жишээ ойлгуулсан байна. Сэтгэлээр унах, сорилтод орох бүрдээ У.Пагмаа эхэлсэн цэгээ бодож, анхны санхүүжилтээ аваад хөл нь газар хүрэхгүй “нисэж” явснаа санадаг. Ямар ч цагт гэр бүлийнхэн нь түүний ард асаалттай танк шиг зогсдог учраас бууж өгөх, шантрах эрхгүй зүтгэж яваа бүсгүй юм. Тэрбээр амьдралын сорилт, бэрхшээлийн өмнө бүрмөсөн бууж өгөхгүйн тулд түр “зогсож”, бодож тунгаах цаг гаргаж байхыг залуу бизнес эрхлэгчдэд зөвлөлөө.
Товч мэдээлэл
Бизнесийн төрөл: Эрүүл хүнс
Бүтээгдэхүүний онцлог: Уламжлалт хүнсэнд инновац шингээсэн бүтээгдэхүүн
Хаяг: Улаанбаатар хот, Баянгол дүүрэг, 16-р хороо, Орхоны гудамж
Утас: 96099292
И-мэйл: [email protected].
Фэйсбүүк хуудас: ДЭМ эрүүл хүнс

08/07/2026

“Мөнх Халдун тэнгэр” ХХК-ийн үүсгэн байгуулагч Ж.Мягмардорж
“Мөнх Халдун тэнгэр” ХХК-ийн захирал, үүсгэн байгуулагч Ж.Мягмардорж барилгын инженер мэргэжилтэй. Тэрбээр “Мэргэжлээрээ багагүй хугацаанд ажилласан, магадгүй тууштай ажилласан бол илүү амжилтад хүрэх байсан байж магад. Гэхдээ өөрийн сонирхлоо дагаж, үйлдвэрлэлийн салбарыг сонгож, өдий зэрэгтэй яваадаа хэзээ ч харамсаж байгаагүй” гэв. Түүнийг компани байгуулах, эрүүл мэндийн бүтээгдэхүүн үйлдвэрлэлийн салбар руу орох гээд судалж байх 2014 оны үед Монгол Улсаас 140-150 тэрбум орчим төгрөг гадаад руу урсдаг байсан. Энэ их мөнгөний урсгалыг Монголдоо үлдээх боломж байгааг мэдэж байсан учир харамсалтай санагдаж, барагшунаар эрүүл мэндийн бүтээгдэхүүн үйлдвэрлэх болжээ.
Ж.Мягмардорж барагшун бол хүний бүх эд эрхтэнд сайн, тэр дундаа эсийн түвшинд үйлчилгээ үзүүлдэг, гайхамшигтай ургамал гэдгийг дахин дахин онцолж байлаа. Барагшуныг хүний биед сайн гэдгийг оюутан байхаасаа эмээгийнхээ зөвлөснөөр өөрөө хэрэглэж, мэдэрчээ. Гэхдээ зах зээлд нийлүүлэхдээ, хүний бүх эд эрхтэнд сайн гэвэл хүмүүс тэр бүр итгэхгүй. Тиймээс үйлчлүүлэгчдээ ангилж, тэдэнд тохирсон бүтээгдэхүүнээ сурталчлах болсон байна. Үүний хүчинд алдагдлаа нөхөж, хүнд үеийг даван туулжээ. Анх “2020 оны эхэн үеэс найз нөхөд, хувь хүн, банк бус санхүүгийн байгууллагаас зээл авч, бизнесээ эхлүүлж байлаа. Одоо энэ зээлээ төлөөд дуусаж байгаа. Анх хоёр төрлийн бүтээгдэхүүн үйлдвэрлэдэг байсан” гэв.
Бүтээгдэхүүнээ анх үйлдвэрлээд зах зээлд нийлүүлэхдээ цар тахлын нөлөөг тооцоолоогүй нь түүнийг санхүүгийн эрсдэлд оруулжээ. Учир нь 2020 оны Цагаан сарын үеэр үзэсгэлэн худалдаанд бүтээгдэхүүнээ худалдаалах том төлөвлөгөөтэй байсан ч цар тахлаас үүдэн, бүх үзэсгэлэн худалдааг хориглосон нь дөнгөж бизнесээ эхлүүлсэн залууд хүнд цохилт болох нь тэр. Гэхдээ энэ бүхэн түүнд төлөвлөгөөтэй байх, эрсдэлийг тооцоолох хэрэгтэй гэдгийг ойлгуулжээ. Одоогийн байдлаар “Мөнх Халдун тэнгэр” ХХК Барагшунтай зөгийн балтай цай, Өтгөрүүлсэн барагшун, Барагшунтай цай, Барагшунтай банны дүрлэг зэрэг дөрвөн төрлийн бүтээгдэхүүнийг зах зээлд нийлүүлж байна. 4 ажилтантай бөгөөд 40 гаруй эмийн сан, томоохон хүнсний зах, аймгуудад бүтээгдэхүүнээ борлуулдаг. Хүний хөдөлмөрийг хөнгөвчилсөн технологийг үйлдвэртээ нэвтрүүлж, цомхон мөртлөө хүчтэй баг бүрдүүлж чаджээ. Бүтээгдэхүүнийхээ төрлийг нэмэгдүүлэх, технологио сайжруулахын тулд банк, ЖДҮ-ийг дэмжих сангаас зээл хөөцөлдсөн ч түүнд бизнесийн урт хугацааны түүх байхгүй учраас зээл олдох амаргүй байв. Энэ үед тэрбээр BEST хөтөлбөрийн зөвлөхүүдийн тусламжтайгаар энэхүү чанга давааг амжилттай давсан байна.Тэрээр ЖДҮ-ийг дэмжих хөнгөлөлттэй зээлийг авч маш үр өгөөжтэй зарцуулжээ. Тодруулбал, бүтээгдэхүүнээ үйлдвэрлэхийн тулд цэвэр ус их хэмжээгээр худалдан авдаг байж. Зээлээрээ цэвэр усанд зарцуулдаг зардлыг 90 хувь бууруулсан байна.
Мөн түүнчлэн дижитал маркетингийн сайжруулалт хийн фэйсбүүк хуудсаа идэвхжүүлснээр борлуулалт 20 орчим хувиар өсөж, нэг ажлын байр шинээр нэмж үйл ажиллагаа явуулдаг болжээ.
Ж.Мягмардорж “BEST хөтөлбөрт хамрагдахаасаа өмнө бизнесээ ямар ч төлөвлөгөөгүй эхлүүлж байсан гэдгээ мэдсэн. Одоо бол маш олон зүйл өөрчлөгдсөн. Анх бизнес хийх гээд ганцаараа бүхнийг хийж явсан бол одоо хамтарч ажиллах багтай болж, удирдах ажил хийж байна. Бизнесийг хөгжүүлэх хурдасгуур хөтөлбөрт хамрагдаж, бизнесээ зөв удирдах ур чадварт суралцан Захирлуудын клубт элсэн орж танилын хүрээлэл, түншийн хэлхээ холбоогоо тэлж туршлагажиж яваа гэв.
Байгаль дээрх барагшуныг бүтээгдэхүүн болгож, хэрэглэгчийн гарт хүргэхэд 15-20 хоногийн хугацаа шаарддаг. Тэрбээр олон технологийг өөрийн биеэр судалсны эцэст, ноу хау шингээсэн технологийг бий болгосон. Түүхий эдээ Ховд, Баян-Өлгий аймгаас бэлтгэдэг. Мөн бүтээгдэхүүн хөгжүүлэлтээ хийсээр байгаа бөгөөд шинэ бүтээгдэхүүнээрээ хэрэглэгчидтэйгээ уулзана гэдгийг Ж.Мягмардорж онцолсон юм.
Товч мэдээлэл
Бизнесийн төрөл: Эрүүл мэндийн бүтээгдэхүүн үйлдвэрлэл
Бүтээгдэхүүний онцлог: Уламжлалт хэрэглээг орчин үеийн техник технологитой хослуулсан бүтээгдэхүүн
Хаяг: Улаанбаатар хот, Хан-Уул дүүрэг 11-р хороо, Зайсангийн тойруу гудамж 32-б байр 81а тоот
Утас:88125575
И-мэйл: [email protected].
Фэйсбүүк хуудас: ДОНОР БРЭНД

07/07/2026

Бизнес Өсөлт ТББ эрхэм гишүүдийн танилцуулыг цуварлаар хүргэж байна
“Жожилдаян” ХХК-ийн ерөнхий менежер Б.Байгальмаа
Тус компани 2010 онд жимс, ногооны худалдаа, газар тариалангийн чиглэлээр үйл ажиллагаагаа эхлүүлсэн. Урд хөршөөс жимс, ногоогоо зөөж байхаар өөрсдөө оролдоод үзье гэдэг сэдлээр нарийн ногоо тариалж байснаа Б.Байгальмаа ярив. Түүний хувьд тус компанийн менежер. “Жожилдаян” бол түүний үеэл эгч, хүргэн ахынх нь хамтран үүсгэн байгуулсан компани юм. “Жожил” гэдэг нь хүргэн ахын ургийн овог, манайхан “даян” хүмүүс байсан учир “Жожилдаян” хэмээн нийлүүлэн нэрлэсэн хэмээн Б.Байгальмаа тайлбарлав. Анх тус компани хоёр хүлэмжтэйгээр өргөст хэмх, улаан лоолийн тариалалтаа эхлүүлсэн бол өдгөө зуны 40 хүлэмжид өргөст хэмх, улаан лооль, бууцай, юуцай, яншуй, салатны навч, ногоон сонгино, хулуу, чинжүү, хаш, цэцэгт байцаа, газрын алим гээд 10 гаруй нэр төрлийн нарийн ногоог тарьж ургуулан хэрэглэгчдэдээ нийлүүлж байна. Манай орны жимс, нарийн ногооны хэрэглээний дийлэнхийг импортын бүтээгдэхүүн эзэлдэг. Тиймээс дөрвөн улирлын хүлэмж барихаар ЖДҮ-ийн зээлд материалаа бүрдүүлж байхдаа BEST хөтөлбөртэй холбогдсон байна. Хөтөлбөрийн зөвлөхүүдийн чиглүүлэг, зөвлөгөөний тусламжтай төслөө амжилттай танилцуулж, 92 сая төгрөгийн зээл авсан. Анхны зорилго нь өвлийн хүлэмж барьж, дөрвөн улирлын турш зах зээлд нарийн ногоо нийлүүлэх байсан ч, өвлийн хүлэмжийн өртөг өндөр тул барьцаалж буй үл хөдлөх хөрөнгө шаардлага хангаагүй байна.
Авсан санхүүжилтээрээ хүлэмжийн 2 дахь талбайгаа байгуулж, нийлэг хүлэмжийнхээ тоог дөрвөөр нэмэгдүүлж, тоног төхөөрөмж авч, жилийн ургацаа 56-80 тонн буюу 30 хувиар өсгөжээ. Одоогоор тогтмол 10 хүнийг, улирлын чанартай ажилладаг хүмүүсээ оролцуулаад нийт 20 хүнийг ажлын байраар хангаж байна.
BEST хөтөлбөртэй холбогдсоноор ЖДҮ-г дэмжих сангаас зээл авсан иргэд аж ахуйн нэгжүүдтэй танилцаж, мэдээлэл солилцож, нэг нэгнийхээ үйл ажиллагаагаа харилцан дэмжээд явж байгаа нь бас нэг давуу тал боллоо гэж онцолсон. Хөтөлбөрийнхөө ачаар хүлэмжийн аж ахуй эрхэлдэг компани гэдгээрээ олон хүнд танигдаж чадсан. Мөн түүнчлэн хөтөлбөрийн сургалт, зөвлөгөө нь олон улсын бизнесийн туршлага, үзэл санаанд тулгуурлан боловсруулагдаж, онол практик хосолсон байдаг нь зүг чигээ олохгүй байгаа, дэмжлэг хэрэгтэй олон зуун бизнесийн амжилтын гараа болж байгаад их талархдаг хэмээсэн юм.
Ногоо тарьж ургуулна гэдэг нь хүүхэд өсгөж, хүмүүжүүлэхээс өөрцгүй. Цаг үргэлж чин сэтгэл, хичээл зүтгэл, тууштай байдлаар усалж, тордохыг шаарддаг. Гэтэл хүлэмж байгуулаад ногоо тариад боллоо гэж хүмүүс боддог. Тариалангийнхаа явцад технологийн алдаа гаргаад амжилтгүй болбол энэ бизнес “худлаа” юм байна гээд бууж өгөх нь түгээмэл ажиглагддаг. Газар тариалангийн салбарт шууд ашиг хүртэх боломжгүй. Нэгэнт цаг хугацаа, хөрөнгө мөнгөө зарцуулж байгаа бол үр дүн нь гартал тууштай хөдөлмөрлөөсэй гэж хүсдэг. Ингэж байж салбараа хамтдаа хөгжүүлж, зах зээлээ дотоодын жимс, нарийн ногоогоор хангах боломж бүрдэнэ. Тиймээс шинээр бизнес эрхэлж буй хүмүүс шантрахгүй зүтгэвэл манайд хэрэглэгч, зах зээл хангалттай бий. Түүнчлэн төрийн зүгээс ч бодлогоор дэмжиж олон төрлийн хөтөлбөр хэрэгжүүлж байна. Тиймээс жимс, хүнсний ногооны салбарт илүү олуулаа хүч түрэн нэгдэж ажиллах нь чухал гэж боддогоо тэрбээр хуваалцав.

Товч мэдээлэл

Бизнесийн төрөл: Хүлэмжийн аж ахуй
Бүтээгдэхүүний онцлог: Монгол хөрсөнд тарьж ургуулсан эрүүл чанартай Монгол нарийн ногоо
Хаяг: УБ хот, Баянгол дүүрэг 3-р хороо Барс худалдааны төв
Хүлэмжийн аж ахуйн: СХД 21-р хороо 361 гарам Баян-Өндөр
Утас: 88008848, 99102209
И-мэйл: [email protected]
Фэйсбүүк хуудас: Жожилдаян ХХК/jojildayan llc/

06/07/2026

Бизнес Өсөлт ТББ эрхэм гишүүдийн танилцуулыг цуварлаар хүргэж байна
“Сэцэн Фэйшн” ХХК-ийн захирал У.Ганцэцэг
“Сэцэн Фэйшн” ХХК-ийн захирал У.Ганцэцэг үндэсний өв соёл, уламжлалаа шингээсэн хувцас, бүтээгдэхүүнийг эхлээд Монголдоо таниулж, дараа нь олон улсад гаргах “том” амбиц, дэврүүн мөрөөдөлтэй нөхрийн хамт 2015 онд компаниа байгуулжээ. У.Ганцэцэг, түүний нөхөр хоёул загвар зохион бүтээгч, дизайнер мэргэжилтэй, бүтээгдэхүүний арт хөгжүүлэлт, шинэлэг санаа дүүрэн явдаг хүмүүс. Төрмөл авьяас байвч компанийг удирдаж авч явна гэдэг түүнээс ч олон ур чадвар шаарддаг болохыг энэ хугацаанд ойлгожээ.
У.Ганцэцэг захиралд компанийн санхүүжилт, хүний нөөц, үйлчилгээ, борлуулалт, компанийн засаглал гээд олон асуудлыг шийдвэрлэх шаардлага үүсэх нь тэр. Ингээд эхний ээлжид санхүүжилтээ нэмэгдүүлэх боломж хайж, 2020 оны арван нэгдүгээр сард ЖДҮ-ийг дэмжих сангийнхантай уулзахад, тэд BEST хөтөлбөрийг санал болгож, тийшээ очиж уулзвал “Танд энэ бүх асуудлыг шийдвэрлэх арга замыг олоход тусална” гэжээ. Үнэхээр ч BEST хөтөлбөртэй танилцсан нь бизнесийн “ментор”-тойгоо уулзсан мэт аз завшаантай явдал байсныг тэрбээр онцолсон.
Санхүүгийн ямар боломжууд байдаг талаарх ойлголтгүйгээр BEST хөтөлбөр дээр очоод, тэндээс өнөөдрийн хүчирхэг “Сэцэн Фэйшн” бий болгох санаа оноо, зөвлөгөөг шүүрч авсандаа талархдаг. ЖДҮ-ийг дэмжих санд тус компани материал илгээсэн боловч бичиг баримтын бүрдэл дутуу гэх шалтгаанаар шалгарч чадаагүй. Яг энэ үеэр BEST хөтөлбөр Зээлийн батлан даалтын сантай хамтарсан мэдээлэл өгөх уулзалтад У.Ганцэцэг захирал сууж, санхүүжилтийн мэдээлэл авч, ажил хариуцсан хүмүүстэй нь холбоо тогтоож чадсан. Ингэснээр Азийн хөгжлийн банкны 12 хувийн хүүтэй 276 сая төгрөгийн зээлд хамрагдаж, 2019 оны арван нэгдүгээр сард “Бахархал” нэрийн үндэсний брэндийн дэлгүүрээ нээж, өөрийн болгож авснаар түрээс болон бусад урсгал зардлыг бууруулж чадлаа.
“Сэцэн Фэйшн” ХХК BEST хөтөлбөртэй анх уулзах үедээ 5 ажилтантай байсан бол сургалт, уулзалтуудад тасралтгүй сууж, санхүүжилтээ нэмэгдүүлж, зээлд хамрагдаж чадсанаар 13 ажилтан буюу хүний нөөцөө хоёр дахин бэхжүүлж, ажлын бүтээмжээ өмнөх жилүүдээс 25 хувиар нэмэгдүүлжээ. Одоогийн байдлаар 16 харилцагч байгууллагын захиалгат бүтээгдэхүүнийг нийлүүлэхээс гадна нэрийн дэлгүүрээрээ борлуулж байна. Түүнчлэн БНХАУ-ын зах зээлд гарч, ӨМӨЗО-ны Хөх-Хотод “Да Хүрээ” цахим дэлгүүрт “Бахархал” брэндийн бүтээгдэхүүнээ зарж байгаа бол саяхнаас АНУ-д байрлах хоёр дэлгүүртэй холбогдон, борлуулалт хийж эхэлсэн байна.
Амны билгээс ашдын билэг гэж монголчуудын хэлдэгчлэн олон улсад Монголынхоо нэрийг гаргах “том” амбиц биеллээ олж, Дэлхийн банкны дэмжлэгтэйгээр Япон Улсыг зорьж бүтээгдэхүүний дээжээ япончуудад амжилттай танилцуулав. “Сэцэн Фэйшн” ХХК ийнхүү бизнесээ амжилттай эрхэлж, олон улсад гарах хүртэл амжилтын хөтөч, чиглүүлэгч нь BEST хөтөлбөрийн зөвлөхүүд болон үйл ажиллагаа байсныг У.Ганцэцэг захирал тодотгов. Тус компанийн хамгийн том онцлог бол үндэсний өв соёл, ахуйг бүтээгдэхүүн дээрээ гаргахдаа түүхийн болоод соёлын судалгаанд суурилж, олон эрдэмтэн, судлаачтай хамтран ажилладагт оршдог. Үндэсний өв соёлыг тээсэн, экспортод гарч буй брэнд учир туйлын хариуцлагатай хандаж, алдаа мадаггүй бүтээгдэхүүн гаргахыг эрмэлздэг байна.
У.Ганцэцэг захирлын хувьд үндэсний өв соёлоо дээдэлж, бахархаж явдаг хүмүүсийн нэг. Тиймээс дэлгүүрээ “Бахархал” хэмээн нэрлэж, “Шинэ эриний соёлын голомтыг хамтдаа бүтээе” гэсэн уриатайгаар өдөр бүр урам зориг дүүрэн ажиллаж байна. Хувцас загварын салбар маш хурдтайгаар хувьсан өөрчлөгддөг. Энэ салбарт тэсэж үлдэхийн тулд цаг үетэйгээ хөл нийлүүлж, орчин үеийн чиг хандлагаас хоцрохгүй байхыг тэрбээр өөртөө болоод ажилтнууддаа үргэлж сануулдаг байна. Компаниа дөнгөж эхлүүлж байхдаа өөр дээрээ төвлөрч, “Өөрийгөө л хөгжүүлье”, “Би хоцрогдоод байна” зэргээр боддог байсан бол BEST хөтөлбөрийн сургалтуудад сууснаар “Бүгдээрээ, цугтаа, хамтдаа хөгжье” гэдэг эерэг хандлагатай болсноо анзаарсан хэмээн тэрбээр ярив. Түүгээр ч зогсохгүй BEST хөтөлбөрийн зөвлөхүүд “Би хэний, ямар асуудлыг шийдвэрлэж байна вэ” гэж өөрөөсөө асууж байхыг уулзалтын үеэр хэлсэн нь өдгөө бизнесийнх нь зарчим болжээ. У.Ганцэцэг захирал хэрэглэгчийнхээ, хамтрагчийнхаа, ажилтнуудынхаа ямар асуудлыг шийдэж байна вэ гэдгээ эргэцүүлэн бодож байж, шийдвэр гаргадаг. Ингэснээр ажиллах чин хүсэл эрмэлзэлтэй ажилтнуудаа дэмжих, нийгмийн асуудлыг шийдвэрлэхэд анхаардаг. Өөрийн компанийн экспорт хийж буй туршлагаа бусад аж ахуйн нэгжтэй нууж хаалгүй нээлттэй хуваалцаж, 5-8 үндэсний үйлдвэрлэгчтэй гэрээ байгуулан, бүтээгдэхүүнийг танилцуулах, захиалга авах, борлуулах, хүргэх зэргээр хамтран ажиллаж байна. Ижил төстэй бизнес эрхлэгчид Монголдоо нэгэнтэйгээ өрсөлдөх биш, хэн нэгнийгээ хийснийг шүүмжлэх биш, нэгдэж, хамтраад олон улсын зах зээлд гарахад л хүч ухаанаа зарцуулах хэрэгтэй байна хэмээн У.Ганцэцэг захирал уриаллаа.
Товч мэдээлэл
Бизнесийн төрөл: Үндэсний хувцасны үйлдвэрлэл
Бүтээгдэхүүний онцлог: Үндэсний хэв маягийг шингээсэн хувцас үйлдвэрлэл
Хаяг: Улаанбаатар хот, Баянгол дүүрэг, Богд-Ар хороолол, Төмөр замын арктай шар байр, Бахархал үндэсний брэндийн дэлгүүр
Утас: 99319900
И-мэйл: [email protected]
Фэйсбүүк хуудас: Бахархал үндэсний брэндийн дэлгүүр.

05/07/2026

Бизнес Өсөлт ТББ эрхэм гишүүдийн танилцуулгыг цувралаар хүргэж байна
“Цагь” ээзгийний амттан үйлдвэрлэгч Г.Чанцалдулам
“Таван хошуу малынхаа ашиг шимийг хүртэж ирсэн монголчууд эрүүл чийрэг, хийморь золбоотой, өвчин эмгэг ч тэр бүр тусаад байдаггүй байсан. Гэтэл орчин үед уламжлалаасаа холдон, орц, найрлагыг нь сайн судлалгүй, өнгөнд хууртаж, амттанд дурлах болсон. Үүнийг дагаад монгол хүний дархлаа суларч, өвчинд өртөмхий, эмзэг болоод байх шиг. Монгол хүн ер нь уламжлалаасаа холдох дэмий. Цагаан идээ бол монголчуудын идээний дээж юм шүү дээ” гэж “Цагь” ээзгийний амттан үйлдвэрлэгч, бизнес эрхлэгч Г.Чанцалдулам бүсгүйн аав нь үр хүүхдүүддээ захидаг байжээ. Арга ч үгүй биз, түүний аав хүүхдүүддээ уламжлалт хоол, хүнс хэрэглүүлж өсгөөд зогсохгүй, малын сүүг ээдүүлэн ширгээж авсан ээзгийг ашиглан амттан гаргаж, түүнийгээ “Цагь” хэмээн нэрлэсэн, тодорхой хэмжээний захиалагч, хэрэглэгчидтэй болсон өрхийн үйлдвэрлэгч байжээ. Гэхдээ улирлын чанартай үйлдвэрлэл эрхэлдэг байв. Намар нь түүхий эдээ бэлдэж аваад, Цагаан сар дөхүүлэн бүтээгдэхүүнээ хийж, үзэсгэлэн худалдаагаар борлуулдаг байв.
Тухайн үед Г.Чанцалдулам эзэмшсэн мэргэжлийнхээ дагуу программистаар ажиллаж, хажуугаар нь өрхийн үйлдвэрлэлдээ тус дэм болдог байжээ. Гэтэл нэг л өдөр тэрбээр аавынхаа үүсгэн байгуулсан энэ өрхийн үйлдвэрлэлийг үргэлжлүүлэн авч явах хариуцлагатай бөгөөд хүндхэн үүрэг хүлээх болов. Аавынхаа нөр их хөдөлмөрөөр босгосон жижигхэн ч байнгын худалдан авагчтай өрхийн үйлдвэрлэлийг өргөжин хөгжүүлэхээр шийдэн, 2019 оны тавдугаар сард “Даргиат найман шарга” ХХК гэр бүлийн компанийг үүсгэн байгуулжээ.
Ээзгийний амттан хийхэд ордог гол орц нь өрөм, зөөхий, ээзгий юм. Хэрэглэгчийн гар дээр бэлэн бүтээгдэхүүнээ тавих хүртэлх бүх процесс уламжлалт аргаар, гар ажиллагаагаар хийгддэг онцлогтой. Жишээ нь, ээзгийгээ уламжлалт аргаар ширгээж, буцалгахад цаг хугацаа их орно. Бүтээгдэхүүний хэлбэр, хэмжээ том, жижиг ялгаатай байх, түүнийг буталж, жижиглэх гээд хийх ажил мундахгүй их. Энэ бүх шат дамжлагадаа анхаарч байтал маркетинг, борлуулалт ард хоцрох нь бий. Хугацаа алдах, сурталчилгаа дутахын хэрээр хэрэглэгчдийн худалдан авах сонирхол буурч, сонголтоо өөрчлөх эрсдэл тулгарах нь энүүхэнд. Тиймээс Г.Чанцалдулам гар ажиллагааг багасган, хөдөлмөр хөнгөвчилж, цаг хугацаа хэмнэсэн орчин үеийн тоног төхөөрөмжтэй болохоор шийдэж, зээл хөөцөлдөж эхэлсэн байна.
Энэ зорилгоо ажил хэрэг болгоход, юуны түрүүнд 98 сая төгрөг шаардлагатай гэсэн тооцоо гаргасан байна. Бичил бизнес эрхэлж буй хүмүүсээс асууж байгаад ЖДҮХС-д төсөл бичиж үзэхээр шийдэв. Эхний удаад хүмүүсийн бичсэн бэлэн төслийг олж, дуурайлгаад явуулсан нь амжилт олсонгүй. Тэрбээр үүнээсээ сургамж авч, зээл авах нөхцөл, боломжуудыг анхнаас нь ул суурьтай судлах, санхүүгийн мэдлэгээ дээшлүүлэх, мэргэжлийн хүмүүсээс зөвлөгөө авах хэрэгтэйг ойлгожээ.
Энэ чиглэлээр эрэл хайгуул хийсээр 2020 онд ВЕSТ хөтөлбөрийн онлайн сургалтад хамрагдав. Коронавирус гарсан үе байсан тул гэрээсээ 7-14 хоногийн шаталсан сургалтад цахимаар номын дуу сонссон байна. Сургалт сонирхолтойн дээр хичээлээс хичээлийн хооронд нүд нээх мэт санхүүгийн мэдлэгийнхээ хүрээг тэлж байсан тул коронавирусийн дэглэм цуцлагдахад ВЕSТ хөтөлбөрийг зорьж очин, сургалтад биечлэн суух хүсэлт гаргажээ. Учир нь, түүнд бизнесээ өргөжүүлэх, зээл авахын тулд компанийн засаглалаа сайжруулах, санхүүгээ зөв удирдах, орлого, зардлаа зөв тооцоолох, санхүүгийн тайлангаа гаргаж сурах шаардлага тулгарч байлаа. Г.Чанцалдулам ямар ч их ажилтай байсан хамаагүй, сурч мэдэхэд үргэлж цаг зарцуулж байхыг залуу бизнес эрхлэгчдэд захисан юм.
Ийнхүү тэрбээр ВЕSТ хөтөлбөрийн 5 сарын хугацаатай бизнесийг хөгжүүлэх хөтөлбөрт хамрагджээ. Энэ тухайгаа Г.Чанцалдулам “ВЕSТ хөтөлбөр бүхнийг анхнаас нь, дэс дараатай нарийн зааж сургасны үр дүнд зээлийн зуучлалд хамрагдаж, 2020 онд ЖДҮХС-д дахин төсөл бичсэн маань амжилттай болж, 81 сая төгрөгийн хөнгөлөлттэй зээл авч чадсан. Ингэснээр эргэлтийн хөрөнгөө нэмэгдүүлж, дөрвөн улирлын турш үйлдвэрлэлээ тасралтгүй явуулах боломж бүрдсэн. Ээзгий бутлах машин болон нөөц хадгалах хөргүүрийн тоног төхөөрөмжтэй болсноор ажлын бүтээмж сайжирч, эргэлтийн хөрөнгө 40 хувиар нэмэгдсэн” хэмээн ярив.
Тус компани ээзгийний амттанаа зөгийн балтай хольж, бүтээгдэхүүний технологиор оюуны өмийн гэрчилгээ авчээ. “Оргил”, “Номин”, “E-mart” зэрэг томоохон сүлжээ дэлгүүр, “Хороолол-1, 2” , “Фермер”, “Эко” зэрэг захуудаар бүтээгдэхүүнээ борлуулж, үйлдвэрлэлийн хэмжээ болон орлого 30-50 хувиар нэмэгдүүлээд байна. “Бид зөвхөн дотоодынхоо зах зээлд бүтээгдэхүүнээ гаргадаг. Гэхдээ худалдан авагчид маань манай бүтээгдэхүүнийг гадаадын улс руу найз нөхөд, үр хүүхдүүддээ илгээх зэргээр гадагшаа сурталчилж байгаа нь том урам өгч байна. Цаашид бүтээгдэхүүнийхээ хэмжээг нэмэгдүүлэх, шинэ нэр төрлүүдийг зах зээлд гаргахаар бэлтгэлээ хангаж байгаа. Энэ чиглэлд ВЕSТ хөтөлбөртэй хамтран ажиллаж, үнэт зөвлөгөөг нь хэрэгжүүлж, шинэ үнэ цэнийг бүтээнэ гэдэгтээ эргэлзэхгүй” байгаагаа тэрбээр онцолсон.

Товч мэдээлэл
Бизнесийн төрөл: Ээзгийний амттан үйлдвэрлэл
Бүтээгдэхүүний онцлог: Хүний биед хэрэгтэй амин дэм, эрдэс бодис агуулсан эрүүл хүнс үйлдвэрлэл
Хаяг: Улаанбаатар хот, Сүхбаатар дүүрэг, 14-р хороо, “Даргиат найман шарга” ХХК-ийн байр
Утас: 99043627
И-мэйл: [email protected]

Address

Ulaanbaatar

Website

http://www.business-growth.org/

Alerts

Be the first to know and let us send you an email when Бизнес өсөлт ТББ posts news and promotions. Your email address will not be used for any other purpose, and you can unsubscribe at any time.