Slow Food Macedonia, Kliment Ohridski 33/35, Bitola (2026)

03/09/2026

ПРОТАГОНИСТИТЕ НА ТЕРА МАДРЕ 2026: КОЈ ЈА КОНТРОЛИРА НАШАТА ХРАНА И КАКВА И Е ИДНИНАТА?

👨‍💻На Terra Madre 2026 во Торино, протагонисти нема да се само готвачите и производителите. Во конференциската програма ќе се сретнат говорници од различни земји и со различни искуства, ама со заедничка задача: да постават прашања за храната кои одамна го надминуваат вкусот и гастрономијата.

↗️Патем, Тера Мадре секогаш ги носи водечките светски мислители на тема- храна од различни аспекти: Раџ Пател, истражувач и професор по јавни политики, Алис Вотерс, готвачка, авторка и активистка, бивша потпретседателка на Слоу Фуд Интернационал, Сатиш Кумар, еколошки мислител и активист, Ерик Шлосер, новинар и автор, Џесика Данкан, социолог и експерт за трансформација на системите на храна, Хелен Скејлс, морски биолог и автор, Еди Мукииби, претседател на Слоу Фуд Интернационал....

🌳Едно од прашањата, најверојатно е најосновното: како да престанеме да се однесуваме како „господари на природата“ и повторно да воспоставиме однос со Земјата како жив систем од кој зависиме?

🔆Храната не почнува од кујната, туку во почвата, водата, семето..., во биодиверзитетот.
На Тера Мадре ќе се зборува и за силите што не ги гледаме кога седнуваме на маса, а ни го креираат животот: политика, пазарите и нееднаквостите што го обликуваат глобалниот прехранбен систем.

👩‍🌾 Кој одлучува што ќе се произведува? Кои производи ќе стигнат до потрошувачите?
И, кој има најголема моќ врз земјата, ресурсите и храната?

🧩Интересен поглед носи и темата поврзана со "рецептот".
Внимавајте: рецепт не е само список на состојки, туку пренос на знаење меѓу генерации, начин како да се сочува културата, да се развие свеста за природата и луѓето повторно да се соберат околу заедничка маса.

🌎Но, токму спротивниот процес – изедначувањето на вкусовите – е еден од предупредувачките знаци. Кога на различни места во светот почнуваме да јадеме сè послична храна, зад тоа се крие нешто многу поголемо: исчезнување на сорти, локални производи, земјоделски практики и знаења.
Унифицираниот вкус е само последната алка од синџирот што ја осиромашува биолошката разновидност.

🌊Посебно место ќе имаат и океаните. Наместо да се гледаат само како капитал од кој може постојано да се зема, ќе се постави прашањето како да ги третираме како екосистем кој мора да се заштити. Ова прашање е особено важно за иднината на рибарството, крајбрежните заедници и храната што доаѓа од морето.

🫂А можеби најтешката тема е онаа за гладот и конфликтите.
Двете појави се длабоко поврзани и можат да создадат маѓепсан круг: конфликтите ја загрозуваат храната, а гладта и нееднаквоста можат дополнително да ги продлабочат конфликтите.

📍На Тера Мадре ќе се разговара за правото на храна, грижата за земјата и правичноста како основа на заедничките политики.

📝Сите овие теми ја објаснуваат и пораката на годинешното издание: „Биодиверзитет – биди разновидност“.
Значи, не станува збор да зачуваме што повеќе видови растенија и животни, туку за свет во кој ќе има место за различни култури, различни знаења, различни начини на производство и различни заедници.

🥖Токму затоа протагонистите на Тера Мадре 2026 ќе зборуваат за храната, односно за моќта, природата, мирот, климатските промени и начинот на кој сакаме да живееме.

‼️А во центарот на сето тоа останува едно едноставно прашање:
Ако утре сакаме разновидна храна, дали сме подготвени денес да ја зачуваме разновидноста на светот што ја создава?

Slow Food Events

#ТераМадре #протагонисти
#прашањазахрана
#стопзаунифицираност

29/08/2026

СЛОУ ФУД РЕЦЕПТ:
ТИКВИЧКИ ШТО ЗАВЕДУВААТ, ЗА КРАЈОТ НА ЖЕШКИОТ ЖЕТВАР

📝 Овонеделниот Слоу Фуд рецепт е на Vanja Todorovska, Координатор за комуникации во Slow Food Macedonia, а нејзиниот избор се – заводливи тиквички.
Вања ужива да готви, а полната трпеза секогаш ја доживува како можност за слоу фуд дружба – да се вкуси, сподели и ужива заедно.
Но, што всушност ги прави тиквичките „заводливи“? Што се крие зад овој мал кулинарски флерт? Одговорот, во продолжение, низ нејзината приказна – во прво лице.

🔆 „Летото е мојата лична филозофија на „бавноста“, особено во овој период кога најчесто муабетиме за жештини.
Долгите денови полека се скусуваат – како омилениот фустан по едно предолго вртење во центрифуга.
А јас, токму затоа, деновите од остатокот на најлежерното годишно време сакам да ги трошам полека — на трпеза, со луѓе што ми се блиски, со полни чинии, отворени шишиња и разговори што не завршуваат пред полноќ.

👩‍🍳 Мојата летна трпеза речиси секогаш има некоја своја приказна. Овојпат на неа е смилевски комат — па, каков би бил мојот избор ако не е смилевски?
Коматот на фотографијата го подготвив со свинска маст, па тестото излезе ровко, кревко и миризливо, како што треба.
Зајрето го направив од блитва, изварка и јајца — едноставно и раскошно во исто време.
До почесната позиција на коматот сакам кога има печени пиперки – во било кое издание, сочна македонска салата со домати, неколку добри- а најсреќна сум кога се тоа -сирењата на Слоу Фуд производители, и мојот фаворит: заводливи тиквички.

💚 Зошто заводливи?
Затоа што на прв поглед се едноставни, речиси тивки. А кога ќе ги вкусите, ве освојуваат со онаа неочекувана игра на солено, благо, мирисно и сочно.
Имаат нешто разиграно во себе, нешто што ве тера да посегнете по уште едно парче, па уште едно...
Процедурата е едноставна: ги сечам тиквичките на подебели тркалца и ги редам во тава. Им додавам по неколку капки масло и малку сол, па ги ставам во рерната, таа да ја заврши својата работа.
Кога ќе заруменат по рабовите и ќе омекнат колку што треба, ги вадам и ги редам на чинија.
Тогаш доаѓа зелениот мирис на свежиот магдонос и остриот, топол здив на толчениот лук.
Ставам по малку од едното, по малку од другото — доволно за тиквичките да добијат карактер.
А потоа доаѓа изненадувањето.
🍯 Медот.
Плиснувам неколку „бранови“ мед, внимателно распоредени преку топлите тиквички, и одеднаш „обичниот“ зеленчук станува нешто сосема поинакво.
Заводлив.
Медот ја заокружува приказната и ја носи токму онаму каде што сакам: во прекрасна рамнотежа меѓу соленото и благото.

🥒 Овие тиквички се за оние што сакаат вкусови со мала тајна, за оние што уживаат кога едноставна состојка ќе изненади со нешто неочекувано.
Поинакви и превкусни.
Утре е недела: соберете се и уживајте во трпезата и муабетите.“

‼️Пробајте ги тиквичките со мед и поделете го вашето искуство.

#СлоуФудМакедонија #рецепти #домашнивкусови #тиквицинапоинаковначин

20/08/2026

СЛОУ ФУД ВИКЕНД: Pansion Kutmičevica - Vevčani – ВКУСОТ НА ВЕВЧАНИ ШТО СЕ ПАМЕТИ

📝Постојат места на кои се оди за да се почувствува крајот, да се запознаат неговите луѓе, да се слушнат приказните и конечно- да се вкуси традицијата што со генерации се пренесува од трпеза на трпеза.

🏠Таква е Кутмичевица во Вевчани – етнопансион и гостилница сместена во стара семејна куќа, стара повеќе од два века, реставрирана со многу љубов, мерак и почит кон автентичната вевчанска архитектура.
Старите материјали, предметите и деталите од некогашниот живот денес се дел од амбиентот во кој се доживува Вевчани на еден поинаков начин.

🔆И, ако куќата е приказната, храната е нејзиниот највкусен јазик.
„Никогаш нема да згрешите доколку менито го направи баба ви“, вели сопственикот на „Кутмичевица“, Настко Богоески – реченица која можеби најдобро ја опишува филозофијата на ова место. Во која нема потреба од непотребно комплицирање на нешто што со генерации било добро- токму затоа што било едноставно, локално и домашно.

🌶На трпезата доаѓаат вкусови што се паметат: пинџур, домашен золеник со пченкарно брашно, зелник, ѓомлезе, вевчански гулаш, домашни колбаси – вевчански луканец, пиперки со лук, качамак, домашни сирења, јадења под сач а за оние што сакаат вистинска гурманска трпеза – и јагнешко печено.

🍅Тука доминира вкусот и мирисот на македонската кујна– свеж сезонски зеленчук, домашни салати, традиционални пити, ајвар и лутенка, производи од локални производители и рецепти што не се само запишани, туку живеат во кујната.
Кутмичевица има и сопствено производство и долгогодишна соработка со локални земјоделци и мали производители од Вевчани и околината.
Од сопствени лозови насади до домашни производи и свежо овошје и зеленчук – идејата е храната да има свое потекло, свој производител и своја приказна.

🐌Инаку, "Кутмичевица" беше меѓу 17-те македонски гостилници избрани за првиот водич „Slow Food гостилници“ и ја доби ознаката „црвен полжав“ на Slow Food International. Критериумите за полжавчето се темелеа на традиционалната подготовка на храната, рецепти карактеристични за микрорегионот, со силен акцент на поврзувањето на угостителството со локалната заедница.

📸Приказната за Кутмичевица стигна и до Торино. Во 2022 година, пансионот беше дел од „Terra Madre Salone del Gusto“, каде што ги претстави вевчанските луканци и пченкарното брашно од вевчанската воденица пред посетители од целиот свет, а истата година пред тамошната публика се промовираше водичот Slow Food гостилници.

🌊А покрај храната, тука е и погледот. Од терасата се отвора широката панорама кон Вевчани, Дримкол и планинските предели, со поглед што стигнува до Јабланица, Охридското Езеро и Пелистер.

🏞Ако планирате Slow Food викенд, Slow Food Macedonia ви ја препорачува Кутмичевица: Вевчани е место што вреди да се стави на гастрономската мапа.

#Кутмичевица #Вевчани #ВевчанскиЛуканец #МакедонскаКујна #ЛокалнаХрана #ТрадиционалнаХрана #Гастрономија

16/08/2026

НА "ВКУСИ ГО ОХРИД, ЛОКАЛНО -VOL.5" СЕ ЗАСЛАДИВМЕ СО МЕДОВИНА И СЛАДОВИНА

🌊Синоќа Долна Порта во Охрид мирисаше на домашни производи, вино и лето. Се слушаше музика, се наздравуваше, се дегустираше, а посетителите - охриѓани, домашни гости и туристи од разни краишта на светот, уживаа во ова "патување" полно со гастрономски изненадувања.

↗️Петтото издание на „Вкуси го Охрид – локално: Охридска медовина“ полека, ама сигурно, прераснува во еден од оние охридски летни ивенти што не се само дел од програмата, туку стануваат дел од доживувањето на градот.
Од оние вечери што, таман кога ќе си речеш дека Охрид веќе си го видел во сите изданија, ќе ти покажат уште едно – миризливо, вкусно и наше.

🥂 Се беше осмислено внимателно и со многу стил, до најситни детали: на влезот, на "портата на вкусовите" две лични охриѓанки ги пречекуваа гостите со домашен леб и медовина- за добредојде. И тука, всушност, започна овогодинешната приказната.

🐝 Медовината е вкус што патувал низ вековите – од медот собран од пчелите, преку водата и природниот процес на ферментација, до напиток со препознатлива сладост и карактер.
Некогаш, кога немало ниту модерни винарии ниту разновидни пијалаци по полиците, медот и неговата природна ферментација биле доволни за да се создаде нешто што ќе се памети.
Во охридската традиција медот имал и посебно место во свадбените обичаи. Слаткоста на медот била симбол за она што младите требало да го очекуваат во заедничкиот живот – љубов, среќа, плодност и многу убави денови.

👰‍♀️🤵 Медовината затоа не била обична здравица. Таа се поврзувала со младенците и со првите мигови од нивниот брачен живот – како желба и нивниот заеднички пат да биде сладок како мед.

🥂 И можеби токму затоа, синоќа, секоја чаша медовина имаше нешто повеќе од вкус.

✨️„На овој настан бевме минатата година и многу се израдувавме кога видовме дека повторно се одржува. Сакаме да вкусиме нешто ново (луто слатко од цреши), да си купиме од ‘пробаното’ (зимница, сирење и кашкавал) и да ја почувствуваме атмосферата.
Ова е Охрид каков што сакаме да го запомниме – локален, гостопримлив и со вкусови што не можеш да ги најдеш на друго место- ни раскажаа туристите од Земун, Србија, кои вторпат го посетуваат „Вкуси го Охрид – локално“.
За оние што првпат дојдоа на настанот ама и се запознаа со филозофијата на Слоу Фуд, изненадувањето беше уште поголемо.
„Во Охрид доаѓаме често, ама првпат сме на овој Слоу Фуд настан“- вели симпатична брачна двојка од Утрехт, Холандија. „Пробавме медовина, купивме превкусни сирења, најубав маџун, а на истата тезга ни подарија штотуку набрано грозје. Тука, во Македонија, се има поинаков вкус кога ќе ти го понуди човекот што самиот го направил. Се одушевивме од лутиот ајвар, пробавме ѓомлезе и многу симпатични овошни џемови и слатка. Ова е вистинска гастрономска дестинација“- ни кажаа овие туристи, со насмевка наздравувајќи со македонските вина, од кои исто така беа воодушевени.

🥖🍷🍯 А на тезгите, како да е празник на локалните вкусови, имаше сè и сешто: сирења и кашкавали, ајвар и лутенка, слатко од сливи, цреши, кајсии..., мед, производи од тартуфи и производи од афион, вина, домашен маџун, ѓомлезе, пресен леб.., козметика од пчелини производи, рачно направени кукли, сапуни и оригинални дамски, ретро плетени чанти – предмети и вкусови во кои се чувствува човечка рака, трпение и љубов.

‼️И уште нешто важно: зад секоја тезга стоеше - човек.
Производители раскажуваа како настанал нивниот производ, како се "лови" тартуф, како се добива медот, суши овошје, прави маџунот..., како се создава нешто што можеби изгледа едноставно, но зад себе има многу работа, знаење и посветеност.

🐌Токму тоа е суштината на „Вкуси го Охрид – локално“.
Не само да вкусиш, туку да дознаеш кој го направил тоа што го пробуваш.
Да ја запознаеш "приказната зад залчето", раката зад ракотворбата и посветеноста зад вкусот. Да застанеш, да прашаш, да пробаш.
Да си купиш нешто „за дома“, ама со него да понесеш и едно мало парче од местото.

🌸Долна Порта синоќа беше празник за очи и душа – со внимателно наличена сценографија и вистинска мала гастрономска сцена.

🌊Охридска августовска ноќ, музика, муабети, ведри лица и полни чаши, создадоа и слоу фуд атмосфера во која никој не брзаше.

👏 Slow Food Ohrid и Слоу Фуд Македонија уште еднаш демонстрираа дека најубавите стории не се секогаш оние што ги пишуваат туристичките водичи. Понекогаш се сервираат на мала чинија, се точат во мала чаша, се пренесуваат од рака на рака.
И се раскажуваат со она наше, едноставно „ај, пробај“.
А ние си заминавме со вкусот и со мислата дека убавите стории, како добрата медовина, најубаво е да се споделат.

📝До следната приказна, до следната чаша и до следното „наздравје“ за она што е наше.

💪Настанот е поддржан од Општина Охрид, Slow Food Macedonia и Факултет за туризам и угостителство - Охрид.

#ВкусиГоОхридЛокално
#ОхридскаМедовина #ЛокалнаХрана

11/08/2026

🍯 ВКУСИ ГО ОХРИД – VOL. 5 : ОХРИДСКА МЕДОВИНА

📍 Долна Порта – Охрид
📅 15 август
🕖 19:00 часот

🐝 Од пчеларникот до чашата – оваа сабота (15 август) Охрид ќе се заслади со приказната за медот и охридската медовина!
Долна Порта ќе мириса на вкусот на локалната традиција, ќе дише со добра музика, ќе биде со убаво друштво и онаа препознатлива атмосфера поради која „Вкуси го Охрид – локално“ одамна е вистински летен празник на Охрид.

⚓️По четири исклучително успешни и посетени изданија, настанот повторно е "во жижа", со сидро фрлено во срцето на стариот град, меѓу охридските приказни, вкусови и луѓе.

✅️Сите досегашни изданија беа магнет за туристите, радост за Охриѓаните и мелем за душата – место каде што илјадници посетители имаа можност да го запознаат Охрид преку она највредно: автентичните вкусови и луѓето што со љубов ги создаваат.

✨️А сега – време е за VOL. 5!
Овојпат во главната улога е охридската медовина – традиционален пијалак со природен карактер и приказна која започнува далеку пред да се најде во чашата.

🍯 Ќе дегустираме охридска медовина.
🐝 Ќе ја откриеме приказната за медот – од цветот, преку пчеларникот, па сè до чашата.
🥖 Ќе дегустираме локални производи и традиционални залчиња.
🌿 Ќе ги запознаеме локалните производители и нивните приказни.
🎶 Ќе има музика, дружење и летна охридска атмосфера.
🤗 А пред сè – ќе уживаме во она што е наше и локално.

📝Хроничарите бележат дека во таквите моменти се создаваат најубавите спомени:
Долна Порта околу нас и Охрид во својот најдобар августовски ритам.
Slow Food Ohrid и Слоу Фуд Македонија канат: доаѓајте да наздравиме за локалното! 🍯🥂

💪Настанот е поддржан од Општина Охрид, Slow Food Macedonia и Факултет за туризам и угостителство - Охрид.

#ВкусиГоОхридЛокално #Охрид #ОхридскаМедовина #ЛокалнаХрана

08/08/2026

СЛОУ ФУД РЕЦЕПТ: СИРЕЊЕ СО СМОКВА, ВО КОМБИНАЦИЈА СО МЕД И СЕЗОНСКО ОВОШЈЕ НА ДАВИД ОД Кози Млеко Планина

🧀 Сирење со смоква, една жива егзотика на Slow Food фармерот Давид Неделковски - Кози Млеко Планина од Раштак, е направено со еден од најстарите начини - со природно билно сириште од локално потекло.
Интересно, автентично и добро е да се забележи.

‼️Патем, било кое сирење што сега го имате дома, искомбинирано со мед и сезонско овошје, во овие изгор денови може да биде супер оброк.
Ова е само идеја – мал потсетник дека за убаво летно мезе понекогаш се доволни неколку автентични вкусови, плодови што ги носи сезоната и малку креаативност

⌛️Давид за сирењето со листови од смокви требаше да го дочека точниот момент во сезоната, кога растението ги има сите природни својства потребни за да го коагулира млекото и да го одвои сирниот дел од сурутката. Тоа е едно поинакво мерење на времето: не со часовник, туку со сезоната.

📝Овој пат сириштето е добиено од млади листови и плодови од смоква која живее во синергија со неговата бавча и е дел од неговиот мал екосистем.
🗣„Постапката и сознанието ми се напишани во трудот за "моето праисториско патување", каде ги обработувам искуствата од правењето на најстарите начини на сирење кои се во исчезнување"– вели Давид.
Сириштето најчесто се прави со ензим кој се наоѓа во желудникот на младо јаре, јагне или теле. Токму тој ензим го коагулира млекото и ги одвојува тврдите материи – сирната смеса, од течните – сурутката.

↗️"Денес- раскажува Давид- најчесто го имаме во течна или прашкаста форма, произведено во лабораториски контролирани услови.
Но коренот на ова знаење е многу постар. Постојат и сиришта од габи, а низ историјата луѓето користеле и различни растителни извори за да го претворат млекото во сирење".

☘️Младите листови од смоквата внесуваат нежна арома, па во секое залче се среќаваат млекото и смоквата – едноставно, суптилно и природно.

🌳А на самото финале, доаѓа најубавиот дел.
Давид сирењето секогаш го консумира на зелените пасишта, соочен со небото над и зеленилото- пред себе.
Вкусовите го инспирираат за нови гастрономски авантури.

📸Фотографијата зборува се: сирењето го искомбинирал со мед, малини, ореви, диви сливи, цреши, листови од дива шипинка и цветови камилица.
Рапсодија од убавини за сите сетила.

🐌Завршницата на овој интересен рецепт ја има Slow Food: најубавиот оброк не е оној со најмногу состојки, туку оној во кој секоја состојка си има свое време и своја приказна.

#СлоуФудМакедонија
#КозиМлекоПланина #ПриродниСиришта #ВегетарјанскоСирење #Раштак

02/08/2026

ЧЕСТИТ ИЛИНДЕН!

🇲🇰Денес со гордост се сеќаваме на сите што ја вградија својата храброст во историјата на Македонија. Нека духот на Илинден нè обединува и ни биде вечен потсетник дека слободата се заслужува, а љубовта кон татковината се носи во срцето со дела, чест и достоинство.

За многу години!
📷 Креирано со AI, инспирирано од фреската „Илинден 1903“ на Борко Лазески (1991)

01/08/2026

СЛОУ ФУД РЕЦЕПТ:МУСАКА СО ДОМАШНИ КОЛБАСИ ОД ПЛАНИНАРСКИОТ ДОМ "ЦАРЕВЕЦ"

🌳Во срцето на Маврово, опкружен со густи шуми и планински пејзажи, се наоѓа Планинарскиот дом „Царевец“ (Carevec Mountain Hut), создаден со многу љубов на Владимир Ѓорѓиоски и Соња Манчевска.
Изграден од камен и дрво, на три ката и со површина од 80 квадратни метри, домот е совршен спој на традиционалната архитектура и природата што го опкружува.
„Царевец“ е дел од семејството на Slow Food гостилници, место за одмор и простор каде што се негуваат локалните вкусови и гастрономските адути на Маврово.
Гостите уживаат во мирисни планински чаеви набрани од мавровските падини, домашна проја со коприви, бакардан со шумски печурки – вргањ, лисичарка и смрчка, овчо сирење од околните бачила, пиперки полнети со ориз и печурки, енергетски бомбички со мед...

📝Еден од специјалитетите што ја носи приказната за семејната традиција е мусаката со домашни колбаси, подготвени по рецептот на дедо Стефче.

📌Состојки:

*Домашни колбаси по рецептот на дедо Стефче
*Компири
*Кромид
*Морков
*Доматен сос
*Јајца
*Млеко
*Павлака

🍲Подготовка:
Компирите се лупат и се сечат на тенки кругови, а кромидот и морковот кратко се запржуваат. Домашните колбаси се сечат на парчиња и се додаваат во зеленчукот, заедно со доматниот сос, па смесата се остава кратко да се динста.
Во намрсен сад за печење се реди слој компири, потоа филот со колбасите, па повторно слој компири. На крај се прелива со смеса од изматени јајца, млеко и павлака.

🔥Мусаката се пече во загреана рерна на 180°C околу 45 минути, додека компирите омекнат, а површината добие убава златно-румена боја.
Од Царевец велат дека мусаката е највкусна кога ќе отстои десетина минути а најдобро се комбинира со раскошна летна сезонска салата.

#мусакаоддомашниколбаси
#ПланинарскиДом
#СлоуФудГостилници
#СлоуФудМакедонија

30/07/2026

И ЈАС СУМ СЛОУ ФУД: ТИКВЕШКИ МАЏУН НА ФАМИЛИЈАТА ФИЛИПОВ

🍯Во секоја тегла маџун на Љупка и Марјан Филипов има многу повеќе од природната сладост на грозјето. Во неа се вткаени семејната традиција, вредните раце на сите генерации и рецептот што со децении се пренесува од баби на внуци.

🟣Од сопствените лозја во Неготино, па сè до долгото варење на тивок оган, семејството Филипов го создава маџунот на истиот начин како што тоа се правело некогаш – без кратенки и без компромиси.

📝Приказната започнува во 2015 година, кога Љупка и Марјан решиле да ја продолжат традицијата што ја наследиле од својата баба. Денес маџунот го подготвуваат исклучиво од грозје од сопствените лозови насади во Неготино, по стар македонски рецепт.

🗣„Маџунот се прави на тивок оган, во шерпи, по стар испробан рецепт.
За неговата подготовка се потребни многу труд, трпение и, пред сè, љубов. ... А најголема радост е кога некој ќе го проба и ќе каже: „Со вкусот ме вративте во детството“- велат Филипови.

🍇Производството започнува со бербата на зрелиот грозд. Плодот се мули и пресува, а свежиот гроздов сок веднаш се става во големи шерпи, каде со часови тивко се вари додека не ја добие препознатливата густина и природна сладост.

↗️Најинтензивниот период за семејството е од крајот на август до октомври, кога зрее грозјето и започнува подготовката на маџунот. Тогаш сите се вклучени во работата.
„Во тој период дома секој си ја знае работата. Од најмал до најстар – сите сме тим. Работата е многу за еден човек, па затоа заедно го создаваме нашиот маџун“.

🥞Љупка пред секој настан меси домашни пишии и ја подготвува познатата тиквешка раванија без шеќер, која посетителите ја дегустираат во комбинација со маџун.

🐌Филипови се редовни учесници на настаните што ги организира Слоу Фуд Македонија, каде секогаш со гордост го претставуваат својот традиционален тиквешки маџун.

🗣„Благодарение на Слоу Фуд, како мали домашни производители, станавме видливи и транспарентни. Научивме подобро да го претставуваме нашиот маџун и стекнавме многу пријателства со други производители. Сфативме колку Македонија е богата со квалитетни домашни производи“- велат Љупка и Марјан.

🎯Ова е причината зошто НИЕ сме Слоу Фуд.
Ние НЕ консумираме.
Ние избираме.
Ние сме Слоу Фуд
Сите заедно, можеме да го ПРОМЕНИМЕ светот почнувајќи од храната.
Придружи ни се!
Биди и ТИ дел од Слоу Фуд

https://shorturl.at/umRpg

✅️Слоу Фуд има вредни и инспиративни луѓе кои посветено ја прикажуваат големината на човекот преку културата на храна.

26/07/2026

УГАНДИСКИОТ ЗЕМЈОДЕЛЕЦ ЕДВАРД МУКИИБИ ГО ВОДИ ДВИЖЕЊЕТО „СЛОУ ФУД“ НАДВОР ОД НЕГОВИТЕ ИТАЛИЈАНСКИ КОРЕНИ

📝Неодамна новинарката на Ројтерс, Алвизе Армелини, објави интересен текст за иднината на меѓународното движење „Слоу Фуд“ и неговиот нов лидер, угандискиот земјоделец и агроном Едвард Мукииби.
Движењето „Слоу Фуд“, основано во Италија во 1986 година од Карло Петрини како протест против ширењето на брзата храна, денес го предводи 39-годишниот Едвард Мукииби од Уганда. Иако во времето на основањето на движењето тој сè уште не бил роден, денес има задача да ја продолжи визијата на неговиот основач и да ја прошири мисијата на организацијата далеку надвор од нејзините италијански корени.

👨‍🌾Мукииби, кој живее и работи на семејната фарма во близина на езерото Викторија, каде што одгледува кафе и банани, смета дека принципите на „Слоу Фуд“ се особено важни за земјите во развој. Како што пишува „Ројтерс“, Карло Петрини „...Отсекогаш сакал „Слоу Фуд“ да продолжи без него“, додавајќи дека организацијата е подготвена да ја продолжи неговата визија бидејќи „тој нè негуваше, тој нè изгради“.

↗️Карло Петрини успеа локалниот протест против брзата храна да го претвори во глобално движење кое се залага за „добра, чиста и правична храна“ за сите.
Со текот на годините стана еден од највлијателните светски застапници за одржливо земјоделство, а неговите идеи добија поддршка и од личности како што е британскиот крал Чарлс и покојниот папа Франциск.

🐌Како претседател на „Слоу Фуд“ од 2022 година, Мукииби сака организацијата да одговори на современите предизвици – климатските промени, корпоративното земјоделство и сè потешката положба на малите производители на храна.
Еден од неговите главни приоритети е да ја разбие перцепцијата дека здравата, одржлива и органска храна е привилегија само на богатите.
🗣„Тоа е заблуда на богатиот свет“, вели Мукииби, посочувајќи дека многу рурални африкански семејства природно произведуваат и консумираат органска храна. Според него, вистинскиот предизвик е создавање систем во кој земјоделците ќе бидат праведно платени, а храната ќе остане достапна за сите. Затоа тој силно се залага за пократки синџири на снабдување и развој на локалните пазари.

‼️Осврнувајќи се на последиците од пандемијата, Мукииби истакнува дека таа само ја потврдила исправноста на долгогодишната порака на „Слоу Фуд“: „Јадење локално, градење локални економии и поддршка на локалното производство.“

🌎Денес „Слоу Фуд“ е присутно во повеќе од 160 земји преку мрежа од локални организации, земјоделци, производители и угостители кои работат на зачувување на локалната храна, традицијата и биодиверзитетот.

Во интервјуто за „Ројтерс“, Мукииби изразува и загриженост за сè поголемото економско влијание на Кина во Африка. Според него, кинеските инвестиции често се проследени со стремеж кон контрола врз природните ресурси.
„Кина е заинтересирана да дава многу пари, но и да добива контрола врз нашите ресурси за возврат“, вели тој, предупредувајќи дека задолженоста на африканските држави може да доведе до губење на земјиште и други ресурси. Од друга страна, кинеското Министерство за надворешни работи, во одговор за „Ројтерс“, соопшти дека кинеските инвестиции придонесуваат за економскиот развој на Африка и за подобрување на животниот стандард.
Мукииби ја поврзува својата животна мисија со детството поминато меѓу земјоделци и рибари во Уганда. По неуспешен универзитетски проект заснован на монокултурно производство на пченка, кој пропаднал поради суша, го открил движењето „Слоу Фуд“. Тој момент, како што самиот вели, бил „момент што му го променил животот“, бидејќи сфатил дека не е сам, туку дел од глобално семејство кое верува во поодржливо и поправедно земјоделство.
🗣„Не сум сам. Јас сум со семејство од милиони луѓе кои веруваат и работат кон истото. Ова е вистинскиот пат за планетата и за сите земјоделци“, порачува Едвард Мукииби.

Извор: https://www.reuters.com/world/china/ugandan-farmer-mukiibi-steers-slow-food-beyond-its-italian-roots-2026-07-15/

Slow Food Macedonia

03/09/2026

29/08/2026

20/08/2026

16/08/2026

11/08/2026

08/08/2026

02/08/2026

01/08/2026

30/07/2026

26/07/2026

Address

Website

Alerts

Contact The Organization

Shortcuts

Share

Listing takedown request