28/08/2026
🏘️ Descubrindo “A nosa pequena vila” con Gene Muíños
No noso obradoiro estivemos traballando arredor da segunda edición da exposición “A nosa pequena vila. Redondela”. Como parte da actividade, visitamos esta impresionante colección de maquetas, que nos permitiu percorrer as rúas, os edificios e a historia da nosa contorna desde unha perspectiva moi especial.
Ademais, tivemos a sorte de contar coa participación do seu creador, Gene Muíños, nunha das sesións do obradoiro. Gene compartiu con nós numerosas historias e curiosidades sobre Redondela: contounos que antigamente a zona onde se atopa o actual mercado era auga e que ata alí chegaban os barcos de pesca; falounos da Picota, situada na parte máis alta, e das orixes de Redondela e Vilavella. Tamén coñecemos historias das familias que habitaron algúns dos edificios representados, como a de Don Pancho, o médico.
Sorprendeunos especialmente a maqueta da rúa Ernestina Otero, a máis longa de Redondela: unha peza de aproximadamente nove metros que representa unha vía de case un quilómetro de lonxitude. Para conseguir tanta precisión, Gene pode empregar arredor de 300 fotografías como referencia.
Leva máis de 25 anos dedicándose a este labor. Cada maqueta pode requirir entre tres e catro meses de traballo, cunha dedicación de ata cinco horas diarias. Un esforzo enorme que se aprecia no coidado dos materiais e, sobre todo, nos pequenos detalles que tanto lle gusta reproducir. 🔎🏠
Foi unha actividade moi enriquecedora coa que traballamos a memoria, a curiosidade, a creatividade e o sentimento de pertenza á nosa comunidade.
Moitas grazas, Gene, pola túa proximidade, xenerosidade e por compartir con nós tantos anos de traballo, historias e amor por Redondela.
