19/09/2026
🔬 Durante unha semana completa, Carballo converterase nun gran espazo para a ciencia
Hoxe presentamos a programación coa que nos sumamos á Noite Europea das Persoas Investigadoras, unha proposta que do 21 ao 27 de setembro levará a divulgación científica aos centros educativos, ao Pazo da Cultura, ao mercado municipal, á Praza do Concello e ás Escolas do Xardín Agra de Caldas.
Na presentación participaron o alcalde, Daniel Pérez; o concelleiro de Innovación e Fondos Europeos, Iván Andrade; Verónica Bolón, en representación da UDC e da Academia Joven de España; Diego Iglesias, de Axober, e Mónica Mariño, do IES Alfredo Brañas.
Foi tamén un acto para lembrar á profesora Isabel Regueiro, colaboradora de LandraCiencia recentemente falecida. Mónica Mariño puxo voz a unha homenaxe moi emotiva a unha docente que deixou unha fonda pegada no alumnado e que contribuíu a transmitir curiosidade, paixón pola ciencia e ganas de aprender💚
Iván Andrade destacou que con esta ampla e variada programación queremos facer visible a ciencia de Carballo, en Carballo e feita en Carballo. E tamén o talento das nosas universidades, centros educativos e empresas.
Charlas, visitas, experimentos, drons, astronomía, intelixencia artificial, maxia, química, teatro, zarzuela e encontros con grandes referentes como Ángel Carracedo e Chus Lamas conforman unha programación extensa, diversa e pensada para todas as idades.
Porque o que buscamos é aproximar a ciencia á xente: experimentar, preguntar, tocar, mirar, escoitar e deixarnos sorprender.
📅 Do 21 ao 27 de setembro
🔗 Consulta o programa e as inscricións en carballo.gal
A programación forma parte da Noite Europea das Persoas Investigadoras e do proxecto europeo TALK0, financiado pola Unión Europea.
