23/10/2026
KGS PRET DELEGACIONIN E BIZNESEVE NGA TURQIA – MUNDËSI TË REJA PËR BASHKËPUNIM DHE INVESTIME NË KOSOVË
Komuniteti i Bizneseve Kosovaro-Gjermano-Zvicerane (KGS) ka zhvilluar një takim me një delegacion biznesor nga Turqia dhe disa prej bizneseve anëtare të KGS-së, me qëllim të eksplorimit të mundësive për bashkëpunim ekonomik, krijimit të partneriteteve të reja dhe identifikimit të mundësive për investime ndërmjet bizneseve nga të dyja vendet.
Delegacioni nga Turqia u udhëhoq nga z. Rifat Sait, President i Qendrës Ballkanike për Kërkime Strategjike, ndërsa delegacioni Kosovës, i përbërë nga disa biznese anëtare, u udhëhoq nga z. Shkelzen Jusaj, President i KGS-së.
Bizneset dhe sektorët e përfaqësuar nga delegacioni turk përfshinin tregtinë ndërkombëtare dhe eksportin, kozmetikën, teknologjinë dhe aksesorët për telefona, produktet për kujdesin e automjeteve, industrinë e mbrojtjes, arsimin dhe menaxhimin e cilësisë, trashëgiminë kulturore dhe restaurimin, si dhe marrëdhëniet institucionale, kërkimet strategjike dhe median.
Gjatë takimit, përfaqësuesit e bizneseve prezantuan aktivitetet e tyre dhe diskutuan mundësitë konkrete të bashkëpunimit, shkëmbimit tregtar dhe zhvillimit të marrëdhënieve të qëndrueshme ndërmjet kompanive.
Me këtë rast, z. Shkelzen Jusaj i njoftoi përfaqësuesit turq me potencialin ekonomik të Kosovës dhe mundësitë që ofron vendi për zhvillimin e bizneseve dhe investimeve, duke i ftuar ata që të shqyrtojnë mundësitë për investim dhe zgjerim të aktiviteteve të tyre në Kosovë.
Takim ishte mjaft i frytshëm dhe me shumë interesa të përbashkëta, të cilat pritet të pasohen me bashkëpunime konkrete dhe investime në Republikën e Kosovës. Si rezultat i kësaj, palët u pajtuan që gjatë muajit të ardhshëm të organizohet edhe një takim, në të cilin pritet të marrin pjesë edhe biznese të tjera nga Turqia. Ky takim do të krijojë hapësirë edhe më të gjerë për lidhjen e bizneseve kosovare me partnerë potencialë turq.
KGS do të vazhdojë të krijojë ura bashkëpunimi ndërmjet bizneseve vendore dhe atyre ndërkombëtare, duke lehtësuar kontaktet, shkëmbimin e përvojave dhe zhvillimin e partneriteteve të reja.
Ftojmë bizneset nga Kosova që janë të interesuara për bashkëpunim me kompani nga Turqia të përcjellin njoftimet e KGS-së për takimet e ardhshme. Informacionet për mundësitë e pjesëmarrjes do të publikohen me kohë.