12/03/2024
د لوی او بښونکي څښتن تعالی په سپېڅلې نامه
لکه څرنګه چې په کلیولینډ کې د افغان کمېونېټي لپاره نوی تعمیر اخیستل شوی دی، تېره ورځ یې د پاک کارۍ چارې خپله د افغان کمېونېټي غړو له خواتر سره شوې. دا چې تعمیر نوی دی او ډېرو اسبابو او لوازمو ته په کې اړتیا لیدل کېږي.
د کمېونېټي مرکز اسبابو او وسایلو اخیستلو دنده افغانانو خپله په غاړه واخیستله چې په لړ کې یې افغان پانګوال او په کلیولینډ کې د نور مارکېټ څښتن حاجي صیب نور الله نجیمي دېرش بابه نوې قالینې د کمېونېټي مرکز ته د مرستې په توګه ورکړې او د لا نورې همکارۍ ژمنه یې وکړله.
د دې تر څنګ په کلیولینډ کې د اریانا مارکېټ مالک حاجي صیب حفیظ الله سلیمان شاه د یاد مرکز سره د یو تعداد توشکونو مرسته وکړله.
د یادونې وړ ده چې په کلیولېنډ ښار کې د کابل مارکېټ مالک نصر الله صافي هم د نوموړي مرکز سره د درې بابه نوې قالینو مرسته وکړله.
دا په داسې حال کې ده چې افغان سوداګر انجینر ضیاء نواز د تل په څېر یو ځل بیا د افغان کمېونېټي سره مرسته تر سره کړه او د مرکز د فرش کولو چارې په خپله غاړه واخیستلې.
په کلیولینډ کې د افغان کمیونېټي رهبري هیئت، د بورد غړي او په مجموع کې د کمېونېټي ټول غړي د نوموړیو مرسته کوونکو منندوی دي، د الله له درباره ورته نور موفقیت او بریالیتوب غواړي او په راتلونکي کې د نورو مرستو هیله ورڅخه لري.
په نورو افغانانو هم غږ کېږي چې د یاد کمېونېټي مرکز په جوړولو او ابادولو کې مرسته وکړي تر څو کمېونېټي مرکز زر تر زره د پرانېستې جوګه شي او د افغانانو د راټولېدو یو مرکز شي او تر څنګ یې افغان کوچنیان په کې په اسلامي او افغاني روحیه وروزل شي.
د افغانانو د یووالي او یو موټي کېدو په هیله!
