22/08/2026
विश्व साइकल यात्री पुष्कर शाहलाई एनआरएनए पोर्चुगलद्वारा सम्मान
विश्व साइकल यात्री पुष्कर शाह हाल पोर्चुगल भ्रमणमा रहनुभएको छ। उहाँको उपस्थितिमा “Zero to 8848” शीर्षकको वृत्तचित्र प्रदर्शन गरिएको अवसरमा गैरआवासीय नेपाली संघ राष्ट्रिय समन्वय परिषद् (एनआरएनए) पोर्चुगलले उहाँलाई सम्मान गरेको छ।
कार्यक्रममा पोर्चुगलका लागि नेपाली राजदूत महामहिम प्रकाशमणि पौडेल, एनआरएनए युरोप क्षेत्रीय उपसंयोजक राजकुमार थापा, एनआरएनए पोर्चुगलका वरिष्ठ उपाध्यक्ष सुरज बिष्ट, एनआरएनएका पूर्व आईसीसी सदस्य धन शेर्पा, ठकुरी समाज पोर्चुगलका अध्यक्ष सज्जन हमाल ठकुरीलगायत विभिन्न संघसंस्थाका प्रतिनिधि तथा विशिष्ट व्यक्तित्वहरूको सहभागिता रहेको थियो।
कार्यक्रमलाई सम्बोधन गर्दै एनआरएनए पोर्चुगलका वरिष्ठ उपाध्यक्ष सुरज बिष्टले विश्वभर नेपालको नाम र पहिचान चिनाउन महत्त्वपूर्ण योगदान पुर्याउनुभएका पुष्कर शाहलाई सम्मान गर्न पाउँदा खुसी लागेको बताउनुभयो। उहाँले शाहको साहस, संघर्ष र योगदानको उच्च मूल्याङ्कन गर्दै राज्यले समेत उहाँको सम्मान र योगदानको कदरका लागि अझ विशेष पहल गर्नुपर्नेमा जोड दिनुभयो।
