03/10/2026
O Balaang Maria, Inahan sa Dios ug among Inahan,
Karong sagrado nga Unang Sabado, nagduol kami kanimo uban ang puno nga kasingkasing,dili lamang aron mangayo og grasya o pakitabang, kundili aron dayegon ug sundon ang imong maanindot nga kinabuhi nga nahimong hingpit nga salamin sa kabubut-on sa Dios.
Naghunahuna kami karon kung giunsa ka pagpili sa Amahan, ikaw nga yano nga babaye sa Nazaret, walay garbo, puno sa pagsalig, ug kanunay nag-ingon: “Ania ang sulugoon sa Ginoo; mahitabo kanako sumala sa Imong pulong.” ug sa imong pagbarog sa tiilan sa Krus. Kanunay ka nagtipig ug naghunahuna sa kalinaw ug paglaum.
O Inahan nga puno sa gugma, karong adlawa gitugyan namo kanimo ang among tibuok kinabuhi. Tan-awa ang among mga kahuyang, ang panahon nga nagduha-duha kami, ang higayon nga nasuko o nasakitan kami, ug ang mga panahon nga nakalimot kami sa pagtan-aw kang Hesus. Himoa kaming sama kanimo nga bisan unsa man ang mahitabo, dili kami mawad-an sa pagsalig sa Dios. Tudloi kami nga magpaubos sama kanimo, magserbisyo sa uban uban ang kalipay sama kanimo, ug magpadayon bisan pa kung lisod ang dalan.
Dawata kining among paghalad karong Unang Sabado, ang among paghinulsol sa among mga sala, ang among pag-antos ug kakapoy, ang among mga pag-ampo alang sa among pamilya, sa among nasakitan nga mga igsoon, ug alang sa kalinaw sa tibuok kalibutan. Ibutang kini sa Imong balaang kasingkasing, ug dad-a kini kang Hesus nga Imong Anak ug among Ginoo. Pag-ampo alang kanamo, O Mahimayaong Inahan, aron nga sama kanimo, makatuman kami sa tanan nga gipangayo sa Dios, ug sa katapusan makadawat sa grasya nga mahiusa kanimo sa Langit.
Ikaw ang among dalan, ikaw ang among kalinaw, ikaw ang among dangpanan karon ug sa oras sa among kamatayon.
Sa ngalan ni Hesus, uban sa Amahan ug sa Balaang Espiritu. Amen
Viva Maria
Viva Jesus
Presider/ Homilies
Rev.Fr. Red Rosales
Parish Priest
