LDM - IWS

10/10/2026

06/10/2026

WORD OF THE DAY: "DEREGULASYON"

Ang deregulasyon ay patakaran ng pag-aalis ng mga restriksyon o proteksyon ng gubyerno sa anumang industriya upang hayaan ang “malayang kumpetisyon” at malayang pagkakamal ng supertubo ng mga kapitalista (Maikling Kurso ng Lipunan at Rebolusyong Pilipino 4th Edition, 2019)

USE IT IN A SENTENCE!

1) Ang DEREGULASYON ay isa sa mga patakaran sa ilalim ng neoliberalismo

2) Hindi makontrol ng gubyerno ang presyo ng langis dahil sa DEREGULASYON.

3) Pinaubaya ng gubyerno ang pagtatakda ng sahod sa Regional Wage Boards. Isang itsura ito ng DEREGULASYON.

4) Ang Oil Deregulation Law at Wage Rationalization Law ay mga halimbawa ng DEREGULASYON.

Mga ka-manggagawa, ano pang halimbawa ng deregulasyon ang nakikita niyo?

06/10/2026

Tanong sa IWS: Sa 4days work 2 days off, babayaran niyo ba ang OT namin o regular pay lang?

Ayon sa batas, dapat may pagpayag ng manggagawa bago ipatupad ang 4 by 2 compressed work week. Dapat din may pagpayag MUNA na regular pay ang 4 days 12 hrs work. At sa tingin niyo, sinong sasang-ayon na lumiit ang sahod? Hindi na nga makaraos, lalo pang maghihikahos!

Paano rin pag tumapat sa linggo o holiday ang 4 by 2? Papasahurin niyo ba kami ng regular pay pati ang mga FTE?

Yan ang pinag-aalala ng mga kapwa namin manggagawa. Sobrang pagod pa sa 12hrs shift. Kaya di makatao na basta kayo magpapatupad ng patakaran dahil sa target output kayo nakafocus. Sunud sunuran naman itong pekeng unyon ni Tamina sa management sa compress work week.

Talagang dapat na palitan ang unyon at gawin na ang eleksyon! Ito lang ang magtitiyak ng ating mga karapatan.

02/10/2026

4 days pasok, 2 days pahinga, dagdag pahirap sa manggagawa!

Hindi maka-manggagawa ang sistemang "4 by 2" na ito na planong ipatupad ngayong October sa P4 at P5. Lalo nitong pabababain ang barat nating sahod, at isasagad ang ating pagod.

Bakit bababa ang ating sahod pero sagad sa pagod? Sa "4 by 2", ang dating 6 days na karaniwang may OT ay isisiksik na sa 4 days with 4 hrs OT. Kung dati tayong sumasahod ng 13 days kinsenas, magiging 10 days na lang ito. Triple pagod rin dahil ang kota ng 6 days ay hahatawin na lang sa 4 days. Nasaan ang kunsiderasyon sa ating kalusugan? Wala rin daw magagawa kapag tumapat sa Sabado Linggo ang pasok na dati nang family day!

Malaking kasinungalingan ng IWS na maghahabol daw ng backlog kaya gagawin ito. Sa simpleng kwentahan, kung may backlog ng 6daysOT, lalong di mahahabol ito ng 4days with OT!

Makakatipid ang kumpanya sa pasahod, at iba pang gastusin, habang tiyak na tutubo nang malaki. Tutulan ang 4 by 2 na lalong magpapahirap sa manggagawa! Palitan ang unyon na kumukunsiti sa tusong IWS!

02/10/2026

"Nagbunga na yung pagiging masipag ko sa work, nagkasakit ako. Parang nagtrabaho ka na lang para may pambili ng gamot kasi nagkakasakit ka sa pagod araw-araw."

Isa ito sa sentimyento ng kapwa nating manggagawa patungkol sa sagad-sa-pagod na pagtatrabaho araw-araw.

Habang tayo ay nagpapakahirap sa paghataw para sa pag-abot ng target output, walang ibang kapalit ito kundi ang sakit sa katawan at dumudulo pa nga sa pagkakasakit nating mga manggagawa. Bukod pa sa mababa na nga ang ating sahod, kulang na rin ito sa pambili sa araw-araw, eh kailangan pa nating ampatan ng lunas ang ating mga sakit sa pagpapacheck-up at pagbili ng gamot. Paldo nga tayo sa OT at sahod, paldo rin naman tayo sa sakit! Aray mo!

Hindi dapat ganito ang ating kalagayan! Hindi dapat palaging hataw lang tayo nang hataw, habang ang kumpanya lamang ang pumapaldo sa bilyong kita nya sa araw-araw nating pagpapakapagod sa loob ng pagawaan! Dapat nakabubuhay na sahod at maalwang buhay ang kapalit ng ating pagpapakasipag sa kumpanya! Dapat makatao ang kundisyon natin sa loob ng production, dapat mayroon tayong sapat na breaktime o pahinga sa araw-araw! Dapat din na ang output natin sa araw-araw ay batay sa katamtamang bilis lamang at hindi hataw sa pagod!

Isa ito sa pinaglalaban ng LDM, hindi lang natin isunusulong ang pagkakaroon ng nakabubuhay na sahod at regularisasyon ng mga FTE o casual – ipinaglalaban rin natin na maging makatao ang kundisyon natin sa loob ng production at pagawaan.

Ang makina nga napapagod, tayo pa kaya? Pagod na tayo na lagi na lang ganito at tila walang solusyon sa ating mga problema sa pagawaan! Sa tunay, palaban, at makabayang unyonismo, kapakanan ng mga manggagawa ang ipinapanguna at ipinaglalaban! Pagbabago naman!

Ipanalo natin ang LDM-IWS-ADLO-KMU para sa makataong kundisyong-paggawa sa loob ng IWS!

01/10/2026

KAISA ANG MGA MANGGAGAWANG BUKID SA ASYENDA LUISITA SA PANAWAGAN NG URING MAGBUBUKID NGAYONG BUWAN NG MGA PESANTE!

Ang buwan ng Oktubre ay tinaguriang buwan ng magbubukid at kaisa ang Alyansa ng Manggagawang Bukid sa Asyenda Luisita (AMBALA) sa lahat ng magsasaka sa buong bansa sa pagpupunyagi sa mga tagumpay ng sama-samang pagkilos ng kanilang hanay at ang patuloy at walang kapagurang pakikibaka para sa lupa at kabuhayan!

Sa gitna ng tumitinding krisis ng kawalan ng lupa, kawalang-katiyakan sa kabuhayan, pangangamkam at kumbersyon ng mga lupang agrikultural, at iba’t ibang anyo ng panggigipit, patuloy nating itinataas ang panawagan para sa tunay na repormang agraryo.

Sa Hacienda Luisita, kalakhan ng lupang ipinamahagi sa ilalim ng CARPER ay wala na sa kamay ng mga manggagawang-bukid. Samu’t saring panlilinlang at iskema ang isinagawa at patuloy na ginagawa ng panginoong maylupang Conjuangco-Aquino-Lorenzo, mga dambuhalang korporasyon na Ayala at Aboitiz, kasabwat at kasangkapan ang DAR at mismong estado. Kaliwa’t kanan ang pangangamkam ng lupa ng mga kapitalista, tulad ng nagpapatuloy na pagtatayo ng 384-ektaryang TARI Estate ng Aboitiz at 290-ektaryang Cresendo Estate ng Ayala at pagkakansela ng mismong Office of the president ng Notice of Coverage ng 358 ektaryang lupang TADECO. Sa pagpapalawak ng kanilang negosyo, malawak na palayasan ang kakaharapin ng napakaraming magsasaka, manggagawang-bukid, at residente ng Asyenda upang bigyang-daan ang mga grandyosong planong nakapaloob sa Hacienda Luisita Masterplan na naglalayong burahin ang lahat ng lupang agrikultural at buong komunidad.

Bahagi rin ito ng pagtutulak sa buong lalawigan bilang Luzon Economic Corridor, kasabay ng nilalakong 1,600-ektaryang Pax Silica ng rehimeng US-Marcos sa Capas, Tarlac, na magpapalayas sa napakaraming katutubong Aeta upang maitaguyod ang mga data center at produksyon ng kagamitang pandigma ng US. Tinatayang ₱174 milyon ang aprubadong badyet ng Bases Conversion and Development Authority (BCDA) para sa extension ng Subic–Clark–Tarlac Expressway (SCTEX) upang pabilisin ang akses patungong TARI Estate, hindi para sa kapakinabangan ng mga taumbaryo.

Naniniwala ang AMBALA na ang pakikibaka para sa lupa ay hindi nagtatapos sa pagkakaroon ng titulo, kundi sa pagtataguyod ng karapatang manatili, magbungkal, at magkaroon ng tunay na kontrol sa lupang kanilang pinagyayaman. Sa harap ng patuloy na pandarahas, intimidasyon, harassment, at surveillance sa mga lider magsasaka, makatarungan lamang ang paglaban ng mga manggagawang-bukid at buong mamamayan ng Luisita.

Kaya, ngayong buwan ng mga Magbubukid, patuloy tayong maninindigan at makikibaka para sa tunay na reporma sa lupa kasama ang iba pang magbubukid mula sa iba't ibang panig ng bansa, kasabay ng ating paniningil sa pahirap at papet ng US na tambalang Marcos-Duterte. Sapagkat ang sama-samang laban para sa lupa ay sama-samang laban para sa pagkain, kabuhayan, at kinabukasan ng buong sambayanan.

MABUHAY ANG MGA MANGGAGAWANG BUKID AT MAMAMAYAN NG ASYENDA LUISITA!
MABUHAY ANG URING MAGBUBUKID!
TUNAY NA REPORMA SA LUPA, IPAGLABAN!

29/09/2026

Suportahan ang welga laban sa OIL PRICE HIKE!
ITAAS ANG SAHOD! IBABA ANG PRESYO NG LANGIS AT MGA BILIHIN!

Ngayong araw magkakaroon ng welga ang mga tsuper at operator ng PISTON sa gitna nang walang humpay na pagtaas ng presyo ng langis. Dahil halos wala nang inuuwing kita ang mga kasama nating tsuper nagkasa sila ng tigil-pasada para sa kanilang mga kahilingan.

Nangyayari ang walang humpay na pagtaas ng presyo ng langis dahil sa patuloy na panggegyera ng US sa mga bansa sa Middle East. Dagdag pa dahil walang kontrol ang gobyerno sa pagtakda ng presyo ng langis, lubusang sinasamantala ito ng malalaking kumpanya tulad ng Petron, Shell at Caltex para kumita ng bilyon-bilyon.

Ang naging solusyon ng gobyerno ay dagdagan ng piso ang pamasahe — na napakaliit lang kumpara sa libo-libong dagdag gastos araw-araw na gastos sa diesel ng mga tsuper. Pinapasa lamang ng gobyerno ang bigat sa mga karaniwang mamamayan ang epekto ng oil price hike. Dagdag-pasanin to para sa mga manggagawa na araw-araw bumabyahe kung hindi naman makakasabay ang kanilang napakaliit na ngang sahod. Kaya dapat ibigay na ang P1,200 o nakabubuhay na sahod upang makasabay sa presyo ng mga nagtataasang bilihin!

Pero ang tunay na magreresolba sa krisis sa langis ay ang pagkakaroon ng kontrol sa presyo nito at ang pagkakaroon ng sariling pagkukuhanan ng langis at hindi lubusang pag-asa sa mga dayuhan para dito. Dapat nating ipaglaban ang pagsasabansa ng industriya ng langis! Dapat nating ipaglaban na mabasura ang Oil Deregulation Law! At dapat nating ipaglaban na tanggalin ang VAT at excise tax sa langis!

Mga kapwa manggagawa, suportahan natin ang laban ng nga tsuper! Itaas ang sahod at ibaba ang presyo ng bilihin!




!

28/09/2026

28/09/2026

Manggagawa ng IWS labanan ang pag-delay sa election!

Para makamit natin ang nararapat na taas sahod at benepisyo kailangan natin magkaisa at ipanawagan na ang Certification Election para makapili na ang manggagawa ng tunay na unyon na ipaglalaban ang isang mabuting CBA!

24/09/2026

Ibigay na ang Taas Sahod at Emergency Relief para sa epekto ng kalamidad at pagtaas ng presyo ng mga bilihin!

Isang buwan matapos ang walang tigil na ulan na nagdulot ng matinding pinsala sa ilang bayan sa tarlac, binaha ang mga komunidad, nasira ang mga pananim, nasira ang mga tulay sa tarlac city na nagpahirap sa mga manggagawa, nagpatagal at nagpamahal ito sa byahe nila papasok sa IWS at pauwi.

Kasabay pa nito ang tuloy tuloy na pagtaas ng presyo ng bilihin dahil sa krisis at gyera, at ngayon umabot na ng 100 ang presyo ng langis, pero ang makabuluhang taas sahod at ayuda na para sana makakatulong makabawas sa hirap ay wala pa rin hanggang ngayon.

Malinaw na pinakikita ng nagdaang kalamidad na dahil pinapayagan ng gobyerno na sirain ng mga malalaking kumpanya sa minahan dayuhan at lokal ang ating kalikasan para sa kita ay nagdudulot ito ng matinding delubyo sa ating buhay at kabuhayan. At ang mga proyekto ng gobyerno na para mabawasan ang epekto ng kalamidad katulad ng mga flood control projects na dahil sa korapsyon ay hindi nakatulong at pinagkuhanan lang ng kickback ng mga nasa pwesto. Malinaw na halimbawa ang pagkasira ng mga tulay sa tarlac city na nagpapakita kung ano ang idudulot ng patuloy na pagsira sa ating kalikasan at pangungurakot sa pondo ng taong bayan.

Halimbawa nalang ang balak na proyektong Pax Silica, na magpapalayas sa mga katutubo at magsasaka, sisira sa kalikasan at kabuhayan ng mamayan na para lang sa interes ng mga dayuhang negosyanteng Americano, Hapon at iba pa.

Pinapakita ng mga ito ang sadyang kapabayaan ng gobyerno sa kalagayan ng manggagawa ng mamamayan, hindi nito tinutugunan ang problema na ating kinakaharap. Ang pagpapanatili nito na mababa ang sahod ng manggagawa kahit tuloy tuloy ang pagtaas ng presyo ay pagpabor nito sa mga dayuhan o lokal nga negosyante. Ang pagpayag ng DOLE na harangan ang taas sahod sa NCR ay pagpapakita na mas pipiliin nito ang interes ng iilang malalaking negosyo kaysa sa milyon milyon naghihirap na manggagawa.

Habang tayong mga manggagawa ay matindi ang paghihirap dahil sa kalamidad, pagtaas ng presyo ang mga kumpanya katulad ng IWS ay patuloy lang kumikita at nakikinabang dito. Ang gobyerno naman at pekeng unyong-Tamina ay pinahihintulutan lang ito.

Kaya higit lalo ngayon ay kailangan itayo nating manggagawa ang ating tunay, palaban at makabayang unyon, na magreresolba sa problema natin sa loob ng pabrika at magsusulong ng tunay na pagbabago sa ating bansa.

Kaya mga manggagawa ng IWS at manggagawa ng Central luzon at bansa, labanan ang dayuhang pangdarambong!
Ipaglaban ang Nakabubuhay na taas sahod, seguridad sa trabaho at maayos na paggawa, at mga demokratikong karapatan!

Imperyalismo Ibagsak!
Nakabubuhay na taas sahod ngayon na!
Emergency Relief Assistance ngayon na!
Sahod itaas! Presyo ibaba!