25/05/2026
OPISYAL NA PAHAYAG NG PINALAD YOUTH COUNCIL PATUNGKOL SA NAGING PAHAYAG, POST, COMMENTS, PATUSYADA NG SK KAGAWAD JEPOY BANGAYAN MULA SA BRGY. SAN JOAQUIN
Bilang kabataan ng Pinalad Youth Council, mariin naming ipinapahayag ang aming suporta sa pagsusulong ng respeto, pagkakapantay-pantay, at ligtas na espasyo para sa lahat, lalo na sa kababaihan.
Hindi kailanman magiging tama ang paggamit ng mga salitang mapanlait, mapanghusga, at nakabababa ng dignidad ng sinuman —lalo na kung ito ay nagmumula pa sa isang halal na lingkod-bayan. Ang posisyon sa pamahalaan ay kaakibat ng responsibilidad na maging huwaran ng respeto, maayos na asal, at wastong paggamit ng impluwensya.
Naniniwala kami na ang tunay na lider ay hindi nanghuhusga batay sa personal na buhay ng isang babae, kundi nagsisilbi nang may malasakit, pag-unawa, at paggalang sa karapatan ng bawat isa. Ang kababaihan ay hindi dapat gawing sentro ng pangmamaliit, biro, o anumang uri ng diskriminasyon.
Kaisa kami sa panawagan na pairalin ang accountability at mas paigtingin ang edukasyon hinggil sa gender sensitivity, safe spaces, at pagrespeto sa dignidad ng bawat tao. Nawa’y magsilbi itong paalala na ang kabataan at mga lider ng komunidad ay may mahalagang papel sa paghubog ng isang ligtas at makataong lipunan.
Ang Pinalad Youth Council ay naninindigan para sa respeto, pagkakapantay-pantay, at proteksyon ng karapatan ng kababaihan.
