10/11/2025
Usa ka van ang mibangga sa pader ug motorsiklo sa Ligason St., Barangay Bool, alas 3:45 sa kadlawn niadtong Nobyembre 8, nga miresulta sa danyos sa kabtangan apan walay naangol.
Giila ang drayber sa van nga si Princess Yana, 21 anyos, lumad sa Bagacay, Talibon, ug kasamtangang nagboarding house sa CPG East, Tagbilaran City, Bohol.
Sumala sa imbestigasyon, si Yana nakainom ug ilimnong makahubog ug mitug-an nga nagtan-aw lamang siya og YouTube video isip giya sa pagmaneho tungod kay dili pa kini kabalo mag-drive. Tungod niini, nawadan siya og kontrol sa manibela ug mibangga sa pader sa balay ni Merlita Pahang, 61 anyos, diin naapil usab ang motorsiklo nga gipanag-iyahan ni Martin Pahang.
Matod pa ni Martin, nakigsabot na sila ni Yana kabahin sa bayad sa danyos ug andam kini nga mobayad sa tanang kadaut. Apan giingon nga kinahanglan pa kini klarohon tungod kay hubog pa ang babaye sa dihang nagkastorya pa sila.
Kasamtangan, ang van gi-impound sa Tagbilaran City Police Station samtang padayon pa ang imbestigasyon sa insidente. | ZE
