01/05/2026
𝑲𝑨𝑩𝑨𝑻𝑨𝑨𝑵, 𝑴𝑨𝑲𝑰𝑰𝑺𝑨 𝑺𝑨 𝑳𝑨𝑩𝑨𝑵 𝑵𝑮 𝑼𝑹𝑰𝑵𝑮 𝑴𝑨𝑵𝑮𝑮𝑨𝑮𝑨𝑾𝑨! 𝑲𝑨𝑴𝑻𝑰𝑵 𝑨𝑵𝑮 𝑴𝑨𝑺 𝑴𝑨𝑹𝑨𝑴𝑰 𝑷𝑨𝑵𝑮 𝑻𝑨𝑮𝑼𝑴𝑷𝑨𝒀 𝑷𝑨𝑹𝑨 𝑺𝑨 𝑺𝑨𝑯𝑶𝑫, 𝑻𝑹𝑨𝑩𝑨𝑯𝑶, 𝑨𝑻 𝑲𝑨𝑹𝑨𝑷𝑨𝑻𝑨𝑵!
𝑶𝑷𝑰𝑺𝒀𝑨𝑳 𝑵𝑨 𝑷𝑨𝑯𝑨𝒀𝑨𝑮 𝑵𝑮 𝒀𝑨𝑪𝑨𝑳 𝑷𝑰𝑳𝑰𝑷𝑰𝑵𝑨𝑺 𝑺𝑨 𝑷𝑨𝑮𝑫𝑰𝑹𝑰𝑾𝑨𝑵𝑮 𝑵𝑮 𝑷𝑨𝑵𝑫𝑨𝑰𝑮𝑫𝑰𝑮𝑨𝑵𝑮 𝑨𝑹𝑨𝑾 𝑵𝑮 𝑴𝑨𝑵𝑮𝑮𝑨𝑮𝑨𝑾𝑨
Kaisa ng buong sambayanang Pilipino at ng buong daigdig ang YACAL Pilipinas sa pagdiriwang ng Pandaigdigang Araw ng Manggagawa. Sa araw na ito, pinagpupugayan natin ang mga nagtatrabaho at lumilikha ng yaman ng bansa mula sa mga pabrika, sakahan, at opisina; at pati rin ang mga militanteng nakikibaka para sa buhay at kabuhayan sa gitna ng malaganap na sahurang pang-aalipin ng pandaigdigang sistemang kapitalista.
Kabi-kabila ang inilunsad na mga welga, protestang bayan, at iba pang porma ng pagkilos sa nagdaang mga buwan. Habang nasasadlak ang Pilipinas sa krisis sa ekonomya na ginatungan ng imperyalistang panggegera ng United States at “Israel” laban sa Iran, lalong nagdaranas ang mga manggagawang Pilipino sa mababang pasahod, inseguridad sa trabaho, at panggigipit sa kanilang mga karapatan.
Sa National Capital Region, nananatili sa ₱695 ang abereyds na minimum wage na mas mababa ng 45.1% sa nakalkulang ₱1,266 na nakabubuhay na sahod para sa isang pamilyang may limang myembro. Dahil sa Wage Rationalization Act na nagtatag ng tinatawag na provincial rate, mas malala ang kalagayan sa mga probinsya sa labas ng Maynila. Ang pasahod ay hindi bababa sa ₱400—at mas mababa pa ito para sa mga manggagawang bukid. Katiting lang ang nangyayaring umento sa sahod na hindi naman tugma sa mabilis na pagsirit ng presyo ng bilihin.
Umiiral pa rin ang di makataong mga patakaran sa paggawa kagaya na lamang ng kontraktwalisasyon. Sa halip na mag-arkila ng regular na manggagawa ang mga kumpanya at empresa, mga manggagawang nakatali sa panandaliang kontrata ang mas pinapaboran upang makatipid sa mga benepisyo kagaya na lamang ng insurance at PhilHealth. May mga naitatala ring kaso ng diskriminasyon laban sa mga kababaihan at LGBTQIA+ na manggagawa sa kabila ng pagpapatupad ng mga batas sa pagtataguyod ng pagkakapantay-pantay sa lugar-paggawa.
Ngunit kahit ganito ang kalagayan ng manggagawang Pilipino, patuloy pa rin silang lumalaban, katuwang ang iba't ibang sektor, at nag-oorganisa para sa kanilang mga kahilingan. Pinakakongkretong halimbawa nito ay ang napagtagumpayan ng mga manggagawa sa Kowloon House West nitong nakaraang Abril na ₱40 dagdag na wage compliance sa loob ng dalawang taon at pagbabalik sa hindi naibigay na service charge at iba pang porma ng benepisyo sa matagal na panahon.
Ang mga manggagawa sa Kowloon House West ay kabilang sa milyun-milyong manggagawa sa Pilipinas at sa buong daigdig na nakikibaka sa pagkakamit ng kahilingan para sa sahod, trabaho, at karapatan. Istorikong tungkulin nila ang pamunuan ang pakikibaka ng mga demokratikong pwersa para sa tunay na kalayaan at demokrasya.
Bilang magiging mga manggagawa rin, hindi nalalayo ang mga ipinaglalaban nila sa ipinaglalaban nating mga kabataan. Upang mapanday ang pinakamatalas na potensyal natin tungo sa pagiging tanglaw ng pag-asa, harapin natin ang kasalukuyan. Ang landas tungo rito ay ang paglubog sa karanasan, pagsanib sa batayang sektor ng masang anakpawis, at pagtangan sa kanilang oryentasyon at paninindigan na lumaban.
𝗠𝗔𝗡𝗚𝗚𝗔𝗚𝗔𝗪𝗔 𝗡𝗚 𝗟𝗔𝗛𝗔𝗧 𝗡𝗚 𝗕𝗔𝗡𝗦𝗔, 𝗠𝗔𝗚𝗞𝗔𝗜𝗦𝗔!
𝗠𝗔𝗕𝗨𝗛𝗔𝗬 𝗔𝗡𝗚 𝗣𝗔𝗡𝗗𝗔𝗜𝗚𝗗𝗜𝗚𝗔𝗡𝗚 𝗣𝗥𝗢𝗟𝗘𝗧𝗔𝗥𝗬𝗔𝗗𝗢!
🖋️: John Denrick Lim | Center Leader for Politics & Governance
🖼️: Mon Artur Barrera | Center Leader for Humanities & Arts
