21/10/2026
БАЙГАЛЬ ОРЧНЫ НӨЛӨӨЛЛИЙН ҮНЭЛГЭЭНИЙ ЖУРАМ, ТӨСЛИЙН АНГИЛАЛ БАТЛАГДЛАА
Байгаль орчинд нөлөөлөх байдлын үнэлгээний тухай хуулийн нэмэлт, өөрчлөлт 2026 оны 05 дугаар сарын 22-ны өдөр Улсын Их Хурлаар батлагдаж, 2026 оны 08 дугаар сарын 01-ний өдрөөс хэрэгжиж эхэлсэнтэй холбоотойгоор “Байгаль орчны стратегийн болон хуримтлагдах нөлөөллийн үнэлгээний журам”, “Байгаль орчин, нийгмийн нөлөөллийн үнэлгээний журам”, “Байгаль орчны нөлөөллийн үнэлгээний төслийн ангилал”-ыг Засгийн газрын хуралдаанаар хэлэлцүүлэн батлууллаа.
✅Хуулийн нэмэлт, өөрчлөлтийн зохицуулалтын хүрээнд төслийн ангилал зэрэглэлийг гурван түвшинд ангилж, төслийн үйл ажиллагааны чиглэл, хүчин чадал, байгаль орчинд үзүүлж болзошгүй нөлөөллийн хэмжээ, экологийн чухал бүс нутагт хамаарах эсэх болон эдийн засгийн үйл ажиллагааны салбарын ангиллыг харгалзан нарийвчлан тогтоохоор тусгасан. Ингэснээр байгаль орчинд үзүүлэх нөлөөлөл их болон дунд төслүүдэд байгаль орчны үнэлгээ, шаардлагыг тогтоож, нөлөөлөл багатай төслүүдийн хувьд үнэлгээ шаардахгүй, захиргааны шат дамжлагыг бууруулах эрх зүйн үндэс бүрдлээ.
✅Энэ нь байгаль орчны хамгааллын шаардлагыг бууруулах бус, үнэлгээний нөөц, төрийн хяналт, мэргэжлийн чадавхыг байгаль орчинд бодитой нөлөөлөл үзүүлэх эрсдэлтэй төслүүдэд чиглүүлэх нөхцөл бүрдүүлж байгаа юм.
✅Байгаль орчин, нийгмийн нөлөөллийн үнэлгээтэй холбоотой үнэлгээний шинжилгээ, хянан магадалгаа, ерөнхий үнэлгээ хийх харьяалал, дүйцүүлэн хамгаалал, нэмэлт тодотгол, олон нийтийн оролцоо, нийгмийн нөлөөллийн үнэлгээний асуудлыг журмаар нарийвчлан зохицуулсан. Тухайлбал, Олон нийтийн оролцооны хувьд төслийн нөлөөлөлд өртөх иргэдийн 70-аас доошгүй хувийг хамруулж санал авах бөгөөд нөлөөллийн бүсэд өртөх айл өрх байхгүй, эсхүл тогтоосон хүрээнд санал авах боломжгүй тохиолдолд тухайн баг, хорооны 25 хувиас доошгүй өрхийг хамруулахаар тусгасан.
✅Энэхүү журмыг хэрэгжүүлснээр төсөл хэрэгжүүлэгч, хөрөнгө оруулагчдад тулгарч буй бичиг баримтын бүрдүүлэлт, хүлээлт, төрийн байгууллага хоорондын шат дамжлага, олон нийтийн оролцоотой холбоотой асуудал тодорхой болж нийгмийн нөлөөллийн үнэлгээг олон улсын жишгийн дагуу хийх боломж бүрдэх, санхүүгийн алдагдал хүлээх эрсдэлийг бууруулах мөн төрийн захиргааны төв байгууллагын ачааллыг бууруулж, төвлөрлийг сааруулах, орон нутгийн шинжээчийн эрх, үүргийг тодорхой болгох, төрийн үйлчилгээг шуурхай хүргэх, мэргэшсэн хүний нөөцийн оролцоог нэмэгдүүлэх боломж бүрдэх юм.
Монгол Улсын Засгийн газар
Цэндийн Сандаг-Очир
