07/12/2025
Paru dans La République des Pyrénées du jeudi 4 décembre
La « tricicléte »
Ҫo qui éy mau-aysit à imayina entau tipe qui a ûe tourroumbiole, qu’éy, qu’û die, ne poùchque pas méy serbi-s’en.
Qu’éy ço qui dits Prospèr de Pissoû en bében lou pintoû dap lous amics enço de Sidòni.
- « À qui pénses, ce-u demande Fernan dou Hanguè
- Que pénsi à touts lous qui soun atau e que-n’y a hères.
- You, tan qui poùchqui counduìse, que tirerèy en daban atau, ce respoun Yanteloû de la Tiste.
- E après ?
- Arroun… tè, que bederam… »
Que-n’y a û qui escoute aco, chéns dìse arré, qu’éy Poulite de Mounach.
- Que-m demoure encoère drin de téms enta mia l’oto, més arroun, ne béy pas ço qui pouderèy ha. La hémne n’a pas lou permis e lous dròlles que bìben trop loégn ta ha lous chofurs. Qu’aberèy à coumpta s’ous àutes ta-m carreya.
- Que-p tròbi hère enquièts, ce hè Adolfe de l’Escoube qui perseguéch : quoan escoubàbi las carrères de Pau, qu’en èy bis moùnde qui n’anaben à pè, dap la tourroumbiole, dap la moto, la bicicléte e mème dap la tricicléte.
- Dap la tricicléte, que baleré miélhe ta quàuque-ûs qui counèchi, quoan sòrten de’ci sus las dues arrodes, s’en arrit la machante loéngue d’Aristide de Musprim.
Ta-us estaubia quàuques proutestacioûs, Moussu Gastoû que couménce lou soû prouséy :
- Quoàte céns ans a, la tricicléte, hère au daban de la becicléte, qu’esté embentade per û aleman. Aquéth pràube òmi, qui nou poudè pas méy marcha, qu’abè troubat aquéth sistèmi ta desplaçà-s. Bién segu, qu’an ameliourat l’engibane e adare la tricicléte que hè beroy serbìci, sustout taus petits liuraméns per las biles.
- Ta tourna ta Sén Espedit, ce hournéch Aristide, que pénsi que la coumune e pouderé croumpa ûe tricicléte au mande-coumû. Lou soû tribalh qu’en seré méy aysit e atau que pouderé demoura assedut, chéns abé à bacha ni puya dou velo à tout pip-pap.
- E sustout quoan acabe las tournades lous dies de hèste, ce clabe l’Aristide.
Û de las cadières.
