02/09/2026
Durante estes últimos meses fúchedes cómplices, a través das nosas redes sociais, dalgunhas das experiencias que fomos compartindo no marco de Mulleres en Acción, o noso proxecto de apoderamento feminino en saúde mental, financiado nun 90 % pola Consellería de Política Social e Igualdade, con cargo ao 0,7 % do IRPF e do Imposto de Sociedades (BS623D).
Hoxe chega o momento de poñerlle punto e final a estes meses de encontros, aprendizaxes, reflexións e, sobre todo, de compartir 🫂
Durante este tempo vivimos momentos que queremos gardar para nós. Momentos que nos recordaron o importante que é contar cun espazo propio e seguro, un lugar no que poder falar de aquilo que nos atravesa como mulleres, coidarnos, escoitarnos, expresarnos con liberdade e poñer no centro o noso propio benestar.
Pero tamén houbo moitas cousas que queremos compartir convos. 💜
Porque Mulleres en Acción foi medrar, aprender e vivir novas experiencias. Foi coñecernos mellor, valorarnos, socializar, escoitarnos e aprender a escoitar ás demais. Foi falar de autoestima, de autocoidados e de autonomía. Foi aprender a ser máis asertivas, poñer límites, tomar as nosas propias decisións e expresar aquilo que necesitamos.
Foi tamén reconciliarnos cos nosos corpos, cuestionar os mandatos que nos impuxeron, comprender que existen moitas formas de ser, sentir e expresarnos. Así como, aprender a ocupar o espazo que merecemos.
E, sobre todo, foi descubrir a importancia de apoiarnos entre nós, ser sororas e unir as nosas voces para seguir construíndo unha sociedade máis xusta, igualitaria e libre de violencias.
Todo isto é o que queremos deixar aquí. Porque detrás de cada actividade, de cada dinámica e de cada encontro hai mulleres que se cuestionaron, que aprenderon, que se descubriron e que medraron xuntas.
💜 Estas son algunhas das imaxes que gardamos destes meses 📷🎞.
Grazas a todas as mulleres que fixeron posible Mulleres en Acción. Por participar, por compartir, por confiar, por escoitar, por falar e por deixar unha pequena parte de vós neste proxecto.
✨ Seguimos en acción. Seguimos avanzando. Seguimos sendo Mulleres en Acción✨💜✊
