09/06/2026
Coñecido o ditame de ICOMOS que recomenda NON INSCREBER A RIBEIRA SACRA NA LISTAXE A PATRIMONIO MUNDIAL DA HUMANIDADE, e agardando facer unha análise máis pormenorizada desde a Xunta directiva, queremos para xa subliñar que foi determinante o dossier que desde a FEARS remitimos a ICOMOS -en galego e inglés-, pois contiña ponto por ponto o que agora se ditamina.
Queremos incidir nisto porque a FEARS ten padecido desde o comezo tentativas de boicote e marxinación, mais é en momentos coma iste cando podemos ver até onde é de valorar o labor da Federación ao longo dos anos, a pesar de non termos a mesma visibilidade mediática da candidatura vía fondos públicos dilapidados desde a Xunta.
Por isto, o apoio das asociaciós e a participación son fundamentais. Só a FEARS ten demostrado que somos algo máis que "patrimonio do caciquismo" e que temos ferramentas para analizar e entender a realidade sen que desde Santiago ou Madrid nos inventen a historia, a interpretación da paisaxe ou até a nosa identidade. A pesar de que nós non cobramos centos de milleiros de euros coma quen deseñou e avalou unha candidatura sen pés nen cabeza.
Parabéns, pois, colectivos para todas e todos os que integran a FEARS. O tempo e o comité científico internacional veñen darnos a razón e reforzan a nosa razón de ser, diferenciándonos dos silencios cómplices ou calculados e demostrando quen sempre estivo a carón das persoas e do territorio.
