17/05/2026
Hai palabras que non precisan tradución porque levan dentro unha maneira de vivir, de sentir e de entender o mundo. A nosa.
Unha lingua que non naceu nos despachos. Unha lingua que sobreviviu grazas á nosa xente,grazas ás aldeas, ao mar, ao campo, ás fábricas e ás casas cando falar galego non era o máis doado.
Por iso hoxe, no Día das Letras Galegas, queremos reivindicar que o galego é patrimonio de todas e de todos,e debemos coidalo.
Pero tamén debemos entendelo desde a liberdade e desde o respecto. Porque cando algo aperta demasiado, acaba doendo. E ás veces tamén cometemos ese erro coa lingua: apertámola, utilizámola para dividir ou tentamos levala ao terreo da confrontación.
E o galego nunca foi iso.
O galego foi refuxio. Foi memoria. Foi resistencia. Foi dignidade.
Defender o galego non é impoñelo nin convertelo nunha bandeira contra ninguén. Defender o galego é falalo con alegría, transmitilo con orgullo e garantir que nunca se perda aquilo que tantas xeracións mantiveron vivo con valentía,esforzo e amor pola súa terra.
Porque esta lingua xa estaba aquí moito antes ca nós. E chegou deixando dor e sufrimento por utilizala.
Que nunca esquezamos iso.
Desde a Unión Comarcal de Comisións Obreiras de Lugo queremos celebrar hoxe unha lingua viva, libre e sen donos. Un galego que una, que emocione e que siga formando parte do futuro deste país.
Porque hai palabras que non só se pronuncian.
Hai palabras que se herdaron.
Hai palabras,que con só escoitalas,enchen o corazón.
Saúde ❤️
Feliz Día das Letras Galegas.
