Colectivo das Pedras Galladas

15/06/2026

LUMES NUNCA MÁIS!✊🏼🔥

🌿💬 Mesa redonda Lumes, a pegada da destrución

📅Mércores 17 de xuño
📍Na Casa da Cultura de Verín
🕔 Ás 20:30 h

Un asunto, por desgraza, de gran relevancia e actualidade ambiental que debullaremos da man de seis persoas con distintas ópticas e experiencias.

Acude e comparte!

15/06/2026

🔥 GALIZA ARDE, E NON É SÓ POLO LUME

Este verán o lume volveu cedo a Galicia. E aínda que falamos diso como se fose o tempo, ou a mala sorte, a verdade é que ten moito que ver coas decisións que se toman sobre a nosa terra... e con quen as toma.
Mentres o monte arde, sobre el seguen pesando ameazas que o deixan cada vez máis débil:

🏭 Altri segue intentando instalar a súa macrocelulosa en Palas de Rei. Cae unha porta e bátena noutra: a empresa e a Xunta non a dan por morta.

⛏️ A mina de Touro quere reabrir, mesmo despois de que o propio organismo da UNESCO pedise que se anule por non respectar o Camiño de Santiago nin o territorio.

🏭 A planta de biogás da Laracha suma outro macroproxecto industrial nunha zona que xa carga con moito.

⛽ No Valiñas, o noso río en custodia, xa houbo problemas serios cunha gasolineira (con expediente por vertidos). Agora están a construír asegunda.

⚡ No Monte Xalo, a central reversible de Meirama ameaza un ecosistema xa moi tocado, e podería afectar á auga da que bebe A Coruña.

👉 Todos estes proxectos comparten algo: chegan a territorios xa esgotados, e prométennos que esta vez será diferente. E son soamente algúns dos proxectos destructivos contra os que se está loitando agora mesmo.

E mentres tanto... 🚒 quen apaga o lume cada verán segue traballando en condicións indignas. Contratos precarios, temporadas curtas que deixan ao persoal sen cobertura o resto do ano, falta de medios e de persoal suficiente. Os bombeiros e bombeiras forestais sosteñen o monte cos seus corpos mentres a administración mira para outro lado.

A política de lumes en Galiza segue sendo a mesma de sempre: reactiva, insuficiente, e cargada sobre as costas de quen menos ten. Mentres non haxa un cambio real, máis prevención, persoal estable e ben pagado, e un territorio que non se esgota a base de monocultivos e macroproxectos, o lume seguirá gañando.

Onte, máis de 10.000 persoas saíron á rúa e ao mar en Arousa para dicir non a Altri e á mina de Touro. Non estamos soas nesta loita.

Grazas as persoas e organizacións que non deixan que isto caía no esquecemento e que levan por bandeira a loita diaria por coidar da nosa terra e da nosa xente!

Desde As Pedras Galladas seguimos vixiando o Valiñas, defendendo o Xalo e apoiando todas as mobilizacións e ao persoal que defende o monte cada día. A Galiza non se vende, non se queima, e non se sostén sobre traballo precario. 🌳💧✊

25/05/2026

Templarios, piratas, mercaderes, xenerais británicos, tropas francesas. Todos cruzaron a Ponte do Burgo. E ti tamén podes.

O que hoxe é un paseo tranquilo á beira da ría foi durante séculos o paso obrigado para entrar e saír de A Coruña, e a propia imaxe da ponte é o elemento máis destacado do escudo do concello de Culleredo.

A súa historia arrinca na Baixa Idade Media, cando a familia Andrade, os mesmos señores feudais que construíron a Torre de Celas, financiaron a súa construción. Se cruzas a ponte e ollas cara á marxe de Culleredo, podes ver aínda a reprodución dos escudos das familias Andrade e Moscoso gravados nunha pedra. Os orixinais do século XIV gárdanse na Igrexa de Santiago do Burgo, a poucos metros de alí.

Logo chegaron os templarios protexendo peregrinos, os mercaderes cargados de mercancía, e en xaneiro de 1809, o momento máis dramático: as tropas inglesas do xeneral Moore, perseguidas polo exército francés, cruzaron a ponte en retirada cara a A Coruña... e voárona. Querían gañar tempo para embarcar. Os franceses cruzaron igualmente, perseguíronos ata Elviña, e alí Moore caeu ferido de morte. Os dous bandos conseguiron o que querían.

A ponte que ves hoxe foi reconstruída en 1992 polos alumnos da Escola Taller "Ponte do Burgo". Dos once arcos orixinais consérvanse os centrais e os da marxe da Barcala, con restos do pavimento medieval descubertos durante a restauración.

Está aí, para que o visites calquera tarde e deixes voar a imaxinación tentando imaxinar todo o que viron esas pedras! Ademais, se tes moita sorte, igual ves a lontra cruzalo por debaixo! 🦦

20/05/2026

Que sorte de lugar no que vivimos!
Cada primavera, o paseo marítimo de Culleredo convértese nun dos mellores sitios para non facer nada un ratiño, nada de rutina, quero dicir 😉 Só parar, mirar cara á auga e deixarse sorprender.

A ría do Burgo ten vida todo o ano, pero nesta época ten algo especial. Hai aves que están aquí porque criaron aquí, porque é a súa casa. E hai outras que paran uns días de camiño cara ao norte, cubrindo centos de quilómetros sen GPS nin mapa, guiadas por algo que nós case nin entendemos. Case sempre podemos ver garzas, garzotas, corvos mariños, martiños peixeiros... e agora, tamén moitas limícolas: zarapitos trinadores, virapedras, ostreiros, andarríos... todas convivindo nun mesmo espazo que temos literalmente ao carón de casa.

E aquí vai algo que nos parece importante recordar: estas aves están tan acostumadas á nosa presenza que se deixan ver moi de preto. Iso é un agasallo!

Para que siga sendo así, podemos facer a nosa parte:
🔇 Sen ruídos bruscos nin movementos repentinos preto delas
🚫 Non baixar á marisma nin á beira da auga, e controlar as mascotas para que non o fagan, as persigan ou espanten
🗑️ Non deixar lixo
🍞 Non darlles pan ou alimentos ao chou, sabemos que parece un xesto bonito, pero o pan non ten valor nutricional para elas: éncheas sen alimentalas de verdade.

A ría é delas. Nós somos a visita. E que fortuna temos de poder desfrutar deste entorno, pese as obras e pouco coidado que está a recibir, así que podemos poñer o noso gran de area e coidar a ría un pouquiño máis cando a visitemos💚

RespetoÁNatureza

18/05/2026

Na charla que tivemos fai uns meses nas Pedras Galladas con sobre liberdade dixital saíu moitas veces o mesmo nome: Signal. Hoxe explicamos por que.

O WhatsApp sabe con quen falas, cando e durante canto tempo. E esa información vale moito diñeiro. Existe unha alternativa que non quere saber nada de ti: Signal.

Entón, que é Signal? Unha app de mensaxería como WhatsApp, pero creada por unha fundación sen ánimo de lucro. Sen accionistas que contentar, sen publicidade que financiar. O único obxectivo é que as túas conversas sexan privadas de verdade.

Imaxina que escribes unha carta, a metes nun sobre con dous candados e só a persoa que a recibe ten a chave para abrila. Iso é o cifrado de extremo a extremo: as mensaxes saen do teu móbil xa pechadas e nin Signal as pode ler. É o mesmo sistema que usan os xornalistas de investigación para protexer as súas fontes.

Tres cousas que Signal non sabe de ti: con quen falas, o que dis e cando o dis.

E o que si podes facer: mensaxes, chamadas, videochamadas e grupos. Exactamente igual que WhatsApp. Tamén podes configurar que as conversas se borren soas ao cabo dun tempo. Sen rastro.

Como se instala? Na Play Store ou na App Store busca "Signal", rexístrate co teu número e en cinco minutos está listo. Se xa tes F-Droid, tamén está alí 😉
É gratis. Mantense con doazóns. O produto non es ti.

16/05/2026

“A miña maneira de ver o mundo é a dunha persoa galega e feminista.”
Begoña Caamaño

Cada día é o día da nosa lingua e da nosa cultura, pero hoxe celebrámolas especialmente e lembramos a Begoña Caamaño, escritora e xornalista comprometida co feminismo, coa comunicación e coa creación en galego.

A súa obra e o seu pensamento reivindicaron a lingua galega como un lugar desde o que contar e loitar con identidade propia, cuestionar os relatos establecidos e poñer no centro outras maneiras de entender a memoria, os afectos e a sociedade.

Nun contexto no que o galego segue precisando espazos, coidado e defensa, lembrar figuras como Begoña é tamén lembrar a importancia de seguir vivindo, creando e pensando na nosa lingua!

15/05/2026

11/05/2026

🌿💧 Nova xornada de inspección dentro do Proxecto Ríos

O vindeiro sábado 16 ás 10:30h realizaremos unha nova actividade de seguimento e inspección fluvial dentro do Proxecto Ríos de Asociación Ecoloxista ADEGA en colaboración co Centro Social Ledoñés, que ten en custodia un tramo do río un pouco máis abaixo do que temos en custodia nas Pedras Galladas.

Durante a xornada observaremos o estado do río e da súa ribeira, identificaremos posibles impactos ambientais e aprenderemos máis sobre a importancia da custodia do territorio e da conservación dos ecosistemas fluviais.

📍 O punto de encontro será no Centro Ledoñés. Dende alí camiñaremos ata a zona de inspección, no acceso ás Naveiras desde a rotonda do polígono de Ledoño:https://maps.app.goo.gl/z9BDqfFfLWjiriB39. Se preferides agardarnos no punto de encontro, alí nos vemos!

ℹ️ Na nosa web deixamos toda a información da actividade: www.pedrasgalladas.gal

Coñecer o río é o primeiro paso para coidalo e defendelo 💧🌱