05/06/2026
🎶🎸 𝐁𝐀𝐈𝐎𝐍𝐀 𝐏𝐑𝐄𝐒𝐄𝐍𝐓𝐀 𝐎 𝐒𝐎𝐍𝐒 𝐃𝐎 𝐂𝐀𝐒𝐂𝐎 𝟐𝟎𝟐𝟔 𝐂𝐎𝐍 𝟏𝟓 𝐀𝐂𝐓𝐔𝐀𝐂𝐈Ó𝐍𝐒 𝐄𝐍 𝐍𝐎𝐕𝐄 𝐄𝐒𝐂𝐄𝐍𝐀𝐑𝐈𝐎𝐒 𝐃𝐎 𝐂𝐀𝐒𝐂𝐎 𝐇𝐈𝐒𝐓Ó𝐑𝐈𝐂𝐎.
🎶🎸 O Concello de Baiona presentou hoxe a edición 2026 do festival Sons do Casco, que se celebrará os días 13 e 14 de xuño no casco histórico da vila. O acto contou coa presenza da concelleira de Festexos, Ruth Álvarez, do alcalde Jesús Vázquez Almuiña e do presidente de ACEBA, Marcos Comesaña, quen destacaron a importancia desta cita para impulsar a actividade cultural e económica fóra da tempada estival.
🎶🎸 O evento reunirá un total de 15 actuacións musicais repartidas en nove escenarios, convertendo as rúas e prazas do centro histórico nun gran percorrido musical aberto a veciños e visitantes. O cartel combina grupos e artistas locais de Baiona con formacións procedentes doutros puntos de Galicia, ofrecendo unha programación variada para todos os públicos.
🎶🎸 O sábado 13 de xuño actuarán Los Atómicos, Dieguitos y Mafaldas, Pablo Alonso, Mettro Pop Rock, Betozzz, Sin Reserva Acústico, BRAAVA! e A Polémica Banda. Pola súa banda, o domingo 14 será a quenda de Biversión, El Hechizo de Nora, Álari, Pop Rock & Café con Leche, BN Branco e Negro, Mondieu e Los del Barro.
🎶🎸 Durante a presentación, Ruth Álvarez destacou que o festival continúa medrando e consolidándose como unha das propostas culturais máis atractivas do municipio, mentres que o alcalde Jesús Vázquez Almuiña subliñou a capacidade do evento para dinamizar as rúas, apoiar aos artistas e atraer visitantes nunha época diferente ao verán. Pola súa banda, Marcos Comesaña resaltou o impacto positivo que Sons do Casco ten para o comercio e a hostalaría local.
