05/04/2026
Zëri i gruas-forcë që bashkon komunitetin
Në kuadër të shënimit të 8 Marsit, Ditës Ndërkombëtare të Gruas, SHFSH “Dora d’Istria”, në bashkëpunim me Konsullaten e Përgjithshme e Republikës së Kosovës në Dyseldorf, organizoi një aktivitet me temën “Zëri i gruas – forcë për komunitetin”.
Ky takim mblodhi gra nga komuniteti, profesioniste dhe aktiviste, të cilat ndanë mendime dhe përvoja mbi rolin e gruas në familje, në komunitet dhe në shoqëri në përgjithësi. Bisedat ishin të hapura dhe të sinqerta, duke reflektuar realitetin dhe sfidat që gratë përballen çdo ditë, por edhe forcën që ato sjellin në jetën e përbashkët.
Gjatë aktivitetit u theksua rëndësia e fuqizimit të grave, barazisë gjinore dhe nevoja për më shumë bashkëpunim mes institucioneve dhe organizatave të komunitetit shqiptar në diasporë. Fjalë rasti mbajtën zv. konsullja znj.Albulena Haziri-Korça dhe drejtuesja e Shoqatës “Dora d’Istria”Lindita Hoti Kryeziu, të cilat vunë në dukje rolin e pazëvendësueshëm të gruas në ndërtimin e një komuniteti të qëndrueshëm.
Me praninë dhe fjalën e saj përshëndetëse, mbrëmjen e nderoi edhe Kryetarja e Akademisë së Shkencave dhe Arteve të Kosovës, znj. Justina Shiroka-Pula.
Një pjesë e rëndësishme e programit ishte paneli i diskutimit, ku u trajtuan tema që prekin drejtpërdrejt jetën e grave në mërgatë. Fitore Fazliu # nga SHFSH “Dora d’Istria” foli për sfidat e rritjes së fëmijëve mes dy kulturave, duke e parë gruan si një urë lidhëse mes tyre. Ndërsa Teuta Abazi, Kryetare e Këshillit të Integrimit në qytetin e Gelsenkirchenit, ndau rrugëtimin e saj nga integrimi drejt përfaqësimit, duke sjellë një shembull konkret të angazhimit dhe përkushtimit.
Pas panelit, znj. Albulena Haziri Korça shtjelloi si temë të veçantë historikun dhe domethënien e 8 Marsit, duke e lidhur atë me realitetin dhe sfidat e sotme të grave në shoqëri.
Gjatë mbrëmjes pati edhe një moment të veçantë vlerësimi. Nga Akademia e Shkencave dhe Arteve të Kosovës, për kontributin e tyre të palodhur për komunitetin shqiptar, u ndanë mirënjohje të shoqëruara me nga një libër dhe medalje për Kryetaren e SHFSH “Dora d’Istria”, Lindita Kryeziu, për znj. Albulena Haziri Korça dhe për znj. Teuta Abazi.
Mbrëmja kishte një atmosferë të veçantë. Krahas diskutimeve, pjesëmarrëset patën mundësi të kalojnë kohë së bashku në një darkë të përbashkët, ku u ndje qartë fryma e bashkimit dhe respektit të ndërsjellë.
Programi u pasurua edhe me momente artistike. Marta , nga Lidhja e Shkrimtarëve, Artistëve dhe Krijuesve Shqiptarë në Gjermani, recitoi poezinë “Një forcë që vetëm vdekja mund ta mund”, duke prekur fort emocionet e të pranishmëve.
Pjesëmarrëset e përshkruan këtë aktivitet si një përvojë të veçantë, që solli frymëzim, energji pozitive dhe ndjenjë afërsie. Një falënderim i sinqertë iu drejtua organizatorëve për këtë nismë, e cila jo vetëm që vlerëson rolin e gruas, por edhe forcon lidhjet brenda komunitetit tonë në diasporë.
